10 ಸಾವಿರ ಲೀಡ್‌ನಲ್ಲಿ ಗೆಲುವು ಖಚಿತ:ಕುಸುಮಾ ಶಿವಳ್ಳಿ ವಿಶ್ವಾಸ

ಕಾಂಗ್ರೆಸ್​ ಅಭ್ಯರ್ಥಿ ಕುಸುಮಾ ಶಿವಳ್ಳಿ ಹಾಗೂ ಮಗಳು ರೂಪಾ ಶಿವಳ್ಳಿ ಇಂದು ನಡೆದ ವಿಧಾನಸಭೆ ಉಪಚುನಾವಣೆಯಲ್ಲಿ ಮತಚಲಾವಣೆ ಮಾಡಿ ಗೆಲುವಿನ ವಿಶ್ವಾಸ ವ್ಯಕ್ತಪಡಿಸಿದರು.

ಹುಬ್ಬಳ್ಳಿ: ಕುಂದಗೋಳ ವಿಧಾನಸಭೆ ಕ್ಷೇತ್ರದಲ್ಲಿ ಸಿ.ಎಸ್.ಶಿವಳ್ಳಿ ಅವರು ಮಾಡಿದ ಅಭಿವೃದ್ಧಿ ಕಾರ್ಯಗಳು,ಜನರೊಂದಿಗೆ ಹೊಂದಿದ್ದ ಒಡನಾಟ ನನ್ನ ಕೈ ಹಿಡಿಯುವ ನಿರೀಕ್ಷೆ ಇದೆ. ಹಾಗಾಗಿ ಸುಮಾರು 10,000 ಸಾವಿರ ಮತಗಳ ಅಂತರದಿಂದ ಗೆಲುವು ಖಚಿತ ಎಂದು ಮೈತ್ರಿ ಅಭ್ಯರ್ಥಿ ಕುಸುಮಾ ಶಿವಳ್ಳಿ ವಿಶ್ವಾಸ ವ್ಯಕ್ತಪಡಿಸಿದರು.

ಕುಂದಗೋಳ ತಾಲೂಕಿನ ಯರಗುಪ್ಪಿ ಗ್ರಾಮದಲ್ಲಿನ ಮತಗಟ್ಟೆ ಸಂಖ್ಯೆ 23ರಲ್ಲಿ ಮಗಳು ರೂಪಾ ಜೊತೆಗೆ ಬಂದು ಅವರು ಮತದಾನ ಮಾಡಿದರು. ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು,ಈ ಕ್ಷೇತ್ರದಲ್ಲಿ ಸಿ.ಎಸ್.ಶಿವಳ್ಳಿಯವರು ಜನತೆಯೊಂದಿಗೆ ನಡೆದುಕೊಂಡಿದ್ದ ರೀತಿಯೇ ನನ್ನ ಕೈ ಹಿಡಿಯಲಿದೆ.ನನಗೆ ಸುಮಾರು ಹತ್ತು ಸಾವಿರ ಮತಗಳ ಅಂತರದಲ್ಲಿ ಗೆಲ್ಲುವ ಭರವಸೆ ಇದೆ ಎಂದರು.

ಇದೇ ಪುತ್ರಿ ರೂಪಾ ಶಿವಳ್ಳಿ ಮತದಾನ ಮಾಡಿ ಮಾತನಾಡುತ್ತಾ, ನನ್ನ ಮೊದಲ ಮತ ಅಪ್ಪನಿಗೆ ಹಾಕಬೇಕು ಅಂತ ಆಸೆ ಇತ್ತು. ಆದರೆ ಅಪ್ಪ ಇಲ್ಲದ ಕಾರಣ ಅಮ್ಮನಿಗೆ ನನ್ನ ಮೊದಲ ಮತ ಹಾಕಿದ್ದೇನೆ. ಅಪ್ಪ ಇದ್ದಾಗ ಮತ ಹಾಕಬೇಕು, ಮತದಾನ ನಮ್ಮ ಹಕ್ಕು ಎನ್ನುತ್ತಿದ್ದರು. ನನ್ನ ಮೊದಲ ಮತ ಅಮ್ಮನಿಗೆ ಹಾಕಿದ್ದು ಖುಷಿಯಾಗಿದೆ, ಅಮ್ಮ ಗೆಲ್ಲುವ ಭರವಸೆ ಇದೆ ಎಂದರು.