ಬೆಂಗಳೂರು : ರಾಜ್ಯದಲ್ಲಿ ಸದ್ಯ ಮಸೀದಿಗಳ ಮೇಲೆ ಅಳವಡಿಸಿರುವ ಧ್ವನಿವರ್ಧಕ ತೆರವಿಗೆ ಹಿಂದೂ ಸಂಘಟನೆಗಳ ಆಗ್ರಹ ಜೋರಾಗಿದೆ. ಈ ನಡುವೆ ಬೆಂಗಳೂರಿನಲ್ಲಿ ಮಸೀದಿಗಳೇ ಹೆಚ್ಚು ನಿಯಮ ಉಲ್ಲಂಘಿಸಿರುವುದು ಕಂಡು ಬಂದಿರುವುದು ಪೊಲೀಸ್ ಇಲಾಖೆ ಹೈಕೋರ್ಟ್‌ಗೆ ನೀಡಿರುವ ದಾಖಲೆಗಳಿಂದ ತಿಳಿದು ಬಂದಿದೆ.
ಲಭ್ಯ ದಾಖಲೆಯ ಪ್ರಕಾರ ಧಾರ್ಮಿಕ ಕೇಂದ್ರಗಳಲ್ಲಿ ಧ್ವನಿವರ್ಧಕಗಳ ಬಳಕೆ‌ಯ ನಿಯಮವನ್ನು ಮೀರಿರುವುದಕ್ಕೆ 2021ರಿಂದ 2022ರ ಫೆಬ್ರವರಿಯವರೆಗೆ ಒಟ್ಟು 301 ನೋಟಿಸ್ಗಳನ್ನು ಪೊಲೀಸರು ನೀಡಿದ್ದಾರೆ. ಇದರಲ್ಲಿ 125 ನೋಟಿಸ್ಗಳನ್ನು ಮಸೀದಿಗಳಿಗೆ ಜಾರಿ ಮಾಡಲಾಗಿದೆ. ಉಳಿದಂತೆ ದೇವಸ್ಥಾನಗಳಿಗೆ 83 ಹಾಗೂ ಚರ್ಚ್ಗಳಿಗೆ 22 ನೋಟಿಸ್ಗಳನ್ನು ನೀಡಲಾಗಿದೆ.
ವಿಶ್ವ ಹಿಂದೂ ಪರಿಷತ್‌ನ ಗಿರೀಶ್ ಭಾರದ್ವಾಜ್ ಎನ್ನುವರು ಈ ಹಿಂದೆ ಧಾರ್ಮಿಕ ಕೇಂದ್ರಗಳ ಧ್ವನಿವರ್ಧಕಗಳನ್ನ ನಿಷೇಧಿಸುವಂತೆ ಕೋರಿ ಹೈಕೋರ್ಟ್ ಮೆಟ್ಟಿಲೇರಿದ್ದರು. ವಿಚಾರಣೆಯ ವೇಳೆ ಹೈಕೋರ್ಟ್ ಕೇಳಿದ ಮಾಹಿತಿಯನ್ನು ಪೊಲೀಸ್ ಇಲಾಖೆ ಒದಗಿಸಿತ್ತು.
ಬೆಂಗಳೂರಿನ ಒಟ್ಟು 7 ವಿಭಾಗದ ಪೊಲೀಸರು ಬಾರ್ ಅಂಡ್ ರೆಸ್ಟೊರೆಂಟ್, ಪಬ್, ಕ್ಲಬ್, ಕೈಗಾರಿಕೆಗಳು, ಮಸೀದಿಗಳು, ದೇವಸ್ಥಾನಗಳು, ಚರ್ಚ್ಗಳಿಗೆ ಎಷ್ಟು ನೋಟಿಸ್ ನೀಡಿದ್ದಾರೆ ಎಂಬುದನ್ನು ಹೈಕೋರ್ಟ್ ಕೇಳಿತ್ತು. ದೇವಸ್ಥಾನ ಹಾಗೂ ಚರ್ಚ್ಗಳಿಗೆ ಹೋಲಿಸಿದರೆ ಮಸೀದಿಗಳಲ್ಲೆ ಹೆಚ್ಚು ಶಬ್ದ ಮಾಲಿನ್ಯ ನಿಯಮ ಮೀರಿರುವುದು ಕಂಡು ಬಂದಿದೆ.
ಅಲ್ಲದೇ, ಪಬ್, ಬಾರ್ ಅಂಡ್ ರೆಸ್ಟೋರೆಂಡ್ಗಳು ಸೇರಿದಂತೆ ಕೈಗಾರಿಕಾ ವಲಯಗಳು ಕೂಡ ಶಬ್ದ ಮಾಲಿನ್ಯದ ನಿಯಮ ಮೀರಿವೆ. ಈ ಸಂಬಂಧ ಪಬ್, ಬಾರ್ ಅಂಡ್ ರೆಸ್ಟೋರೆಂಟ್ಗಳಿಗೆ 59 ಹಾಗೂ ಕೈಗಾರಿಕೆಗಳಿಗೆ 12 ನೋಟಿಸ್ಗಳನ್ನು ನೀಡಲಾಗಿದೆ.
