ಬೆಂಗಳೂರು: ಸಾಂಕ್ರಾಮಿಕ ಪಿಡುಗು ಕೋವಿಡ್-19 ಬಂದ ಬಳಿಕ ಜನರಲ್ಲಿ ಸ್ವಚ್ಛತೆಯ ಅರಿವು ಅಗಾಧವಾಗಿ ಬೆಳೆದಿದ್ದು, ಬಿಬಿಎಂಪಿ ಎಲ್ಲಾ ವಾರ್ಡ್ನಲ್ಲೂ ನಿರಂತರ ಸ್ಯಾನಿಟೈಸ್ ಸಿಂಪಡಿಸುವ ಮೂಲಕ ಸ್ವಚ್ಛಾನಗರಿಯನ್ನಾಗಿ ಪರಿವರ್ತಿಸಿದೆ.
ಇತ್ತ ಪಾಲಿಕೆಯ ಘನತ್ಯಾಜ್ಯ ನಿರ್ವಹಣೆ ವಿಭಾಗವು ನಗರದ ಬ್ಲಾಕ್ಸ್ಪಾಟ್ಗಳಲ್ಲಿರುವ ಕಸ ತೆರವುಗೊಳಿಸಿ, ಸ್ವಚ್ಛಗೊಳಿಸಿ ರಂಗೋಲಿ ಹಾಕಿಸಿದೆ. ಕಸ ಹಾಕುವ ಜಾಗಗಳಲ್ಲಿ ಜಾಗೃತಿ ಚಿತ್ರಗಳನ್ನು ಬಿಡಿಸಲಾಗಿದೆ. ಅಲ್ಲದೆ, ಎಲ್ಲೆಂದರಲ್ಲಿ ಕಸ ಎಸೆಯುವವರಿಗೆ ಕಟ್ಟುನಿಟ್ಟಾಗಿ ದಂಡ ವಿಧಿಸುತ್ತಿದೆ. ಮಾಸ್ಕ್ ಧರಿಸುವುದನ್ನು ಕಡ್ಡಾಯ ಮಾಡಲಾಗಿದ್ದು, ಅವರಿಂದ ಜೂನ್ನಿಂದ ಸೆ.23ರವರೆಗೆ 1,10,767 ಜನರಿಂದ ₹ 2.51 ಕೋಟಿ ದಂಡ ಸಂಗ್ರಹವಾಗಿದೆ.
ಜನರು ಸ್ವಚ್ಛತೆಗೆ ಹೆಚ್ಚು ಆದ್ಯತೆ ನೀಡಿದ ಕಾರಣ ಪ್ರತಿ ವರ್ಷ ಈ ಸಮಯದಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಡೆಂಗ್ಯೂ, ಮಲೇರಿಯಾ ಪ್ರಕರಣಗಳಲ್ಲಿ ತೀವ್ರ ಇಳಿದಿದೆ. ಮಳೆಗಾಲದ ಮಧ್ಯೆ ಬಿಸಿಲು ಬಂದಾಗ ನಿಂತ ನೀರಲ್ಲಿ ಸೊಳ್ಳೆ ಉತ್ಪತ್ತಿಯಾಗಿ, ಸಾಂಕ್ರಾಮಿಕ ರೋಗಗಳಾದ ಚಿಕೂನ್ ಗುನ್ಯಾ, ಡೆಂಗ್ಯೂ, ಕಾಲರಾ, ಶೀತಜ್ವರ, ಟೈಫಾಯ್ಡ್ ಜ್ವರಗಳು ಈ ವರ್ಷ ಕಡಿಮೆ ಪ್ರಮಾಣದಲ್ಲಿ ಬಾಧಿಸಿವೆ.
2019ರಲ್ಲಿ 7,273 ಮಂದಿಯಲ್ಲಿ ಡೆಂಗ್ಯೂ ಜ್ವರ ಕಾಣಿಸಿಕೊಂಡಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಗಣನೀಯ ಇಳಿಕೆ ಕಂಡಿವೆ. ಈ ಬಾರಿ ಕೋವಿಡ್ ನಡುವೆಯೂ ಬರೀ 1,295 ಪ್ರಕರಣಗಳು (ಜನವರಿಯಿಂದ ಸೆಪ್ಟೆಂಬರ್ 2ರವರೆಗೆ) ಕಾಣಿಸಿಕೊಂಡಿವೆ. ಇನ್ನು ಈ ವರ್ಷ 100 ಜನರಲ್ಲಿ ಮಾತ್ರ ಚಿಕೂನ್ ಗುನ್ಯಾ ಕಾಣಿಸಿಕೊಂಡಿದೆ. 2018ರಲ್ಲಿ 99, 2019ರಲ್ಲಿ 210 ಪ್ರಕರಣಗಳು ದಾಖಲಾಗಿದ್ದವು.
1,295 ಪ್ರಕರಣಗಳ ಪೈಕಿ 6 ಮಂದಿಯಲ್ಲಿ ಮೆದುಳಿನ ಉರಿಯೂತ (ಜಾಪ್ನಿಸ್ ಎನ್ಸಫಲಿಟೀಸ್), 141 ಟೈಫಾಯ್ಡ್, 34 ಯಕೃತ್ತಿನ ಸೋಂಕು (ವೈರಲ್ ಹೆಪಟೈಟಿಸ್), 467 ಕಾಲರಾ, ಹಾಗೂ 635 ಮಂದಿಗೆ ಶೀತ ಜ್ವರ ಕಾಣಿಸಿಕೊಂಡಿದೆ. ಹಾಗೆಯೇ ಟೈಫಾಯ್ಡ್ 285 ಪ್ರಕರಣಗಳು ಈ ಬಾರಿ 141ಕ್ಕೆ, ಶೀತಜ್ವರ 1,101 ರಿಂದ 635ಕ್ಕೆ ಇಳಿದಿದ್ದರೆ, ಕಾಲರಾ ಮಾತ್ರ 4 ರಿಂದ 467ಕ್ಕೆ ಏರಿಕೆ ಕಂಡಿದೆ.
ಈ ಬಗ್ಗೆ ಈಟಿವಿ ಭಾರತಕ್ಕೆ ಮಾಹಿತಿ ನೀಡಿದ ಬಿಬಿಎಂಪಿ ಸಾರ್ವಜನಿಕ ಆರೋಗ್ಯದ ಮುಖ್ಯ ಆರೋಗ್ಯಾಧಿಕಾರಿ ವಿಜಯೇಂದ್ರ, ಈ ಬಾರಿ ಸಾಂಕ್ರಾಮಿಕ ರೋಗಗಳು ಗಮನಾರ್ಹವಾಗಿ ಕಡಿಮೆ ಆಗಿದೆ. ಇದಕ್ಕೆ ಕಾರಣ ಕೋವಿಡ್ ಹಿನ್ನೆಲೆ ಜನರ ಸ್ವಚ್ಛತೆಗೆ ಆದ್ಯತೆ ನೀಡುತ್ತಿರುವುದೇ ಕಾರಣ. ಪಾಲಿಕೆಯ 141 ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಉಚಿತವಾಗಿ ಪರೀಕ್ಷೆ ನಡೆಸಲಾಗುತ್ತಿದೆ. ಜೊತೆಗೆ ಮೊಬೈಲ್ ವಾಹನ, ಫಿವರ್ ಕ್ಲಿನಿಕ್ಗಳಲ್ಲೂ ಪರೀಕ್ಷೆ ಮಾಡಿಸಲಾಗುತ್ತದೆ. ಒಂದು ವೇಳೆ ಕೋವಿಡ್ ನೆಗೆಟಿವ್ ಬಂದೂ, ಜ್ವರ ಮುಂದುವರೆದರೆ ಡೆಂಗ್ಯೂ, ಚಿಕೂನ್ ಗುನ್ಯಾ ಪರೀಕ್ಷೆ ಮಾಡಿಸಲಾಗುತ್ತದೆ ಎಂದರು.
