ಬಳ್ಳಾರಿ: ಇಲ್ಲಿನ ಜೆಎಂಎಫ್ಸಿ ನ್ಯಾಯಾಲಯದ ಆವರಣದಲ್ಲಿ ಕರ್ನಾಟಕ ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರದ ಕಾರ್ಯನಿರ್ವಾಹಕ ಅಧ್ಯಕ್ಷರಾದ ನ್ಯಾಯಾಧೀಶ ಅರವಿಂದ ಕುಮಾರ, ಮತ್ತೋರ್ವ ನ್ಯಾಯಾಧೀಶ ಅಲೋಕ ಅರಾಧ್ಯ ಸಮಕ್ಷಮದಲ್ಲಿ ಮೆಗಾ ಇ- ಲೋಕ ಅದಾಲತ್ ನ ಸ್ವರೂಪದ ಕುರಿತು ವಿಡಿಯೋ ಕಾನ್ಫರೆನ್ಸ್ ಮುಖೇನ ಮಾಧ್ಯಮದವರಿಗೆ ತಿಳಿಸಲಾಯಿತು.
ಮೊದಲ ಬಾರಿಗೆ ಮೆಗಾ ಇ-ಲೋಕ ಅದಾಲತ್ ಆಯೋಜಿಸಿದ್ದು, ಕೋವಿಡ್ ಸಂದರ್ಭದಲಿ ಕಕ್ಷಿದಾರರು ರಾಜೀ ಸಂಧಾನಕ್ಕೆ ಇಚ್ಛಿಸಿದ್ದಲ್ಲಿ ಇ-ಲೋಕ ಅದಾಲತ್ನಲ್ಲಿ ಬಗೆಹರಿಸಿಕೊಳ್ಳಬಹುದಾಗಿದೆ. ತಮ್ಮಲ್ಲಿರುವ ಸಣ್ಣ ಮೊಬೈಲ್ ಮೂಲಕವೂ ಕೂಡ ಈ ಲೋಕ ಅದಾಲತ್ನಲ್ಲಿ ಹಾಜರಿರುವ ಜಡ್ಜ್ ಗೆ ಕರೆ ಮಾಡಿದರೆ ಸಾಕು. ನಿಮ್ಮ ರಾಜೀ ಸಂಧಾನದ ಪ್ರಕ್ರಿಯೆಯನ್ನ ಆಲಿಸಿ, ಪರ-ವಿರೋಧ ಕಕ್ಷಿದಾರರ ಒಪ್ಪಿಗೆ ಮೇರೆಗೆ ಬಗೆಹರಿಸುವ ಪ್ರಯತ್ನ ಇಲ್ಲಿ ನಡೆಸಲಾಗುವುದೆಂದು ಹೈಕೋರ್ಟಿನ ನ್ಯಾಯಾಧೀಶ ಅರವಿಂದ ಕುಮಾರ ತಿಳಿಸಿದರು.
ವಿಡಿಯೋ ಕಾನ್ಫರೆನ್ಸ್ ಮುಗಿದ ಬಳಿಕ ಜಿಲ್ಲಾ ಜೆಎಂಎಫ್ಸಿ ಕೋರ್ಟಿನ ನ್ಯಾಯಾಧೀಶ ಕೃಷ್ಣ ಬಿ. ಅಸೋಡೆ ಅವರು ಸುದ್ದಿಗಾರರೊಂದಿಗೆ ಮಾತನಾಡಿ, ಸೆಪ್ಟೆಂಬರ್ 19 ರಂದು ನಡೆಯಲಿರುವ ಮೆಗಾ ಇ-ಲೋಕ ಅದಾಲತ್ನಲ್ಲಿ ರಾಜೀ ಸಂಧಾನದ ಮೂಲಕ ಬಗೆಹರಿಸಿಕೊಳ್ಳಬಯಸುವ ಕಕ್ಷಿದಾರರು ತಮ್ಮ ವಕೀಲರ ಮೂಲಕ ಅಥವಾ ಮನೆಯಲ್ಲೇ ಕುಳಿತುಕೊಂಡು ಮೊಬೈಲ್ ಸಂಖ್ಯೆಗೆ ಕರೆಮಾಡಬಹುದು.
ಜಿಲ್ಲೆಯಲ್ಲಿರುವ ಅಂದಾಜು 27044 ಪ್ರಕರಣಗಳ ಪೈಕಿ ಸರಿಸುಮಾರು 4796 ಪ್ರಕರಣಗಳನ್ನು ಈ ರಾಜೀ ಸಂಧಾನ ಮೂಲಕ ಬಗೆಹರಿಸಿಕೊಳ್ಳುವ ವ್ಯಾಜ್ಯಗಳೆಂದು ಗುರುತಿಸಿದ್ದು, ಆಸಕ್ತ ಕಕ್ಷಿದಾರರು ಮೆಗಾ ಇ-ಲೋಕ ಅದಾಲತ್ನಲ್ಲಿ ಭಾಗವಹಿಸಬಹುದಾಗಿದೆ ಎಂದು ತಿಳಿಸಿದರು.
ಜಿಲ್ಲೆಯಲ್ಲಿ ಬಾಕಿಯಿರುವ ಪ್ರಕರಣಗಳನ್ನು ರಾಜೀ ಸಂಧಾನದ ಮೂಲಕ ಇತ್ಯರ್ಥಪಡಿಸಿಕೊಳ್ಳಲು ಬಳ್ಳಾರಿ ಜಿಲ್ಲಾ ನ್ಯಾಯಾಲಯದ ಇ-ಮೇಲ್, ballari.dlsa@gmail.com ಅಥವಾ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ದೂ: 08392-278077 ಸಂಪರ್ಕಿಸಬಹುದು.
