ವಾಷಿಂಗ್ಟನ್: ನಕಲಿ ಖಾತೆಗಳ ನಿಖರತೆಗಾಗಿ ನಿಂತಿದ್ದ ಟ್ವಿಟ್ಟರ್ ಖರೀದಿ ಒಪ್ಪಂದ ಕೊನೆಗೂ ಚುಕ್ತಾ ಆಗಿದ್ದು, ವಿಶ್ವದ ನಂ.1 ಶ್ರೀಮಂತ ಎಲಾನ್ ಮಸ್ಕ್ ಮೊದಲು ಆಫರ್ ಮಾಡಿದಂತೆಯೇ ಪ್ರತಿ ಷೇರಿಗೆ 54.20 ಡಾಲರ್ ನೀಡಿ ಖರೀದಿಸಲು ಒಪ್ಪಿದ್ದಾರೆ ಎಂದು ಟ್ವಿಟ್ಟರ್ ಅಧಿಕೃತವಾಗಿ ಘೋಷಿಸಿದೆ.
ಸಾಮಾಜಿಕ ಮಾಧ್ಯಮ ದೈತ್ಯ ಟ್ವಿಟ್ಟರ್ ಅನ್ನು 44 ಶತಕೋಟಿಗೆ ಖರೀದಿಸಲು ಎಲಾನ್ ಮಸ್ಕ್ ವರ್ಷಾರಂಭದಲ್ಲಿ ಒಪ್ಪಂದ ಮಾಡಿಕೊಂಡಿದ್ದರು. ಬಳಿಕ ನಕಲಿ ಖಾತೆಗಳ ವಿಚಾರಕ್ಕೆ ಒಪ್ಪಂದವನ್ನು ಕಡಿದುಕೊಳ್ಳುವುದಾಗಿ ಹೇಳಿದ್ದರು.
ಇದರ ವಿರುದ್ಧ ಟ್ವಿಟ್ಟರ್ ಕಾನೂನು ಹೋರಾಟ ನಡೆಸಿತ್ತು. ಶೇ.5 ಕ್ಕಿಂತ ನಕಲಿ ಖಾತೆಗಳಿವೆ ಎಂದು ಕಂಪನಿ ಮಾಹಿತಿ ನೀಡಿತ್ತು. ಆದರೆ, ಅದಕ್ಕಿಂತಲೂ ಹೆಚ್ಚಿವೆ ಎಂದು ಎಲಾನ್ ವಾದಿಸಿ ಒಪ್ಪಂದವನ್ನೇ ಮುರಿದುಕೊಳ್ಳುವುದಾಗಿ ಹೇಳಿದ್ದರು.
ಇದೀಗ ಮನಸು ಬದಲಾಯಿಸಿರುವ ವಿಶ್ವದ ಶ್ರೀಮಂತ ಎಲಾನ್ ಮಸ್ಕ್ "ತಾನು ಮೊದಲು ನೀಡಿದ ಆಫರ್ನಂತೆಯೇ ಪ್ರತಿ ಷೇರಿಗೆ 54.20 ಡಾಲರ್ಗೆ ಟ್ವಿಟ್ಟರ್ ಖರೀದಿ ಮಾಡುವುದಾಗಿ ಟ್ವಿಟ್ಟರ್ಗೆ ಪತ್ರ ಬರೆದಿದ್ದಾರೆ.
ಹೆಚ್ಚಿದ ಟ್ವಿಟ್ಟರ್ ಷೇರು, ಇಳಿದ ಟೆಸ್ಲಾ: ಎಲಾನ್ ಮಸ್ಕ್ ಟ್ವಿಟ್ಟರ್ ಖರೀದಿ ಮಾಡಲಿದ್ದಾರೆ ಎಂಬ ಸುದ್ದಿ ಹೊರಬಿದ್ದ ಬಳಿಕ ಷೇರು ಮಾರುಕಟ್ಟೆಯಲ್ಲಿ ಟ್ವಿಟ್ಟರ್ ದರಗಳು 12.7 ರಷ್ಟು ಏರಿಕೆ ಕಂಡಿವೆ. ಇದೇ ವೇಳೆ ಟೆಸ್ಲಾದ ಷೇರುಗಳು ಶೇ.3 ರಷ್ಟು ಕುಸಿದಿವೆ. ಒಪ್ಪಂದವನ್ನು ಮುಂದುವರಿಸುವುದಾಗಿ ಎಲಾನ್ ಮಸ್ಕ್ ಘೋಷಿಸಿದ್ದರಿಂದ ತನ್ನ ವಿರುದ್ಧದ ಪ್ರಕರಣವನ್ನು ವಜಾಗೊಳಿಸುವಂತೆ ಕೋರಿದ್ದಾರೆ.
ಓದಿ: ಸೆಪ್ಟೆಂಬರ್‌ನಲ್ಲಿ 11 ಲಕ್ಷ ಕೋಟಿ ರೂ ಮೈಲಿಗಲ್ಲು ದಾಟಿದ ಯುಪಿಐ ಪೇಮೆಂಟ್
