ನವದೆಹಲಿ : ಫೇಮ್ ಇಂಡಿಯಾ ಯೋಜನೆ ಅಡಿಯಲ್ಲಿ ಎರಡು ಹಂತಗಳಲ್ಲಿ ಮಂಜೂರಾದ ಎಲೆಕ್ಟ್ರಿಕ್ ವೆಹಿಕಲ್ ಚಾರ್ಜಿಂಗ್ ಸ್ಟೇಷನ್ಗಳಲ್ಲಿ ಮೊದಲ ಹಂತದ ಚಾರ್ಜಿಂಗ್ ಸ್ಟೇಷನ್ಗಳು ಎರಡನೇ ಹಂತದ ಚಾರ್ಜಿಂಗ್ ಸ್ಟೇಷನ್ಗಿಂತ ಅಗ್ಗವಾಗಿದೆ ಎಂದು ಸಂಸದೀಯ ಸಮಿತಿ ಹೇಳಿದೆ. ಈ ಬಗ್ಗೆ ಇವಿ ನೀತಿಯ ಮೌಲ್ಯ ಮಾಪನದಲ್ಲಿ ಅನುದಾನದ ಅಸಮರ್ಪಕ ಬಳಕೆಯನ್ನು ತಪ್ಪಿಸಲು ಸರ್ಕಾರ ಲೆಕ್ಕಪರಿಶೋಧನೆ(ಆಡಿಟ್) ನಡೆಸಬೇಕೆಂದು ಸಂಸದೀಯ ಸಮಿತಿ ಆಗ್ರಹಿಸಿದೆ.
ಫೇಮ್ ಇಂಡಿಯಾ ಯೋಜನೆಯಡಿ ಮಂಜೂರಾದ ಮೊದಲ ಹಂತದ ಚಾರ್ಜಿಂಗ್ ಸ್ಟೇಷನ್ಗಳ ಸರಾಸರಿ ಬೆಲೆ ಸುಮಾರು 8.27 ಲಕ್ಷ ರೂಪಾಯಿ ಇತ್ತು. ಎರಡನೇ ಹಂತದ ಯೋಜನೆಯಲ್ಲಿ ಬಿಡುಗಡೆಯಾದ ಚಾರ್ಜಿಂಗ್ ಸ್ಟೇಷನ್ಗಳ ಬೆಲೆ ಸರಾಸರಿ 22.45 ಲಕ್ಷಕ್ಕೆ ಏರಿಕೆ ಆಗಿದೆ ಎಂದು ಸಮಿತಿ ಹೇಳಿದೆ. 2015ರಲ್ಲಿ ಮೊದಲ ಹಂತದ ಫೇಮ್ ಇಂಡಿಯಾ ಯೋಜನೆ ಅಡಿಯಲ್ಲಿ ಕೈಗಾರಿಕಾ ಸಚಿವಾಲಯವು (ಎಂಹೆಚ್ಐ) 43 ಕೋಟಿ ರೂ.ನಲ್ಲಿ 520 ಚಾರ್ಜಿಂಗ್ ಸ್ಟೇಷನ್ಗಳನ್ನು ಮಂಜೂರು ಮಾಡಿತ್ತು. 2019ರಲ್ಲಿ ಎರಡನೇ ಹಂತದ ಫೇಮ್ ಇಂಡಿಯಾ ಯೋಜನೆಯಡಿಯಲ್ಲಿ ಸುಮಾರು 1,000 ಕೋಟಿ ರೂಗಳನ್ನು ಎಲೆಕ್ಟ್ರಿಕ್ ವಾಹನಗಳಿಗೆ ಮೂಲ ಸೌಕರ್ಯ ಒದಗಿಸಲು ಮಂಜೂರು ಮಾಡಿತ್ತು.
ವರದಿಯ ಪ್ರಕಾರ, ಫೇಮ್ ಇಂಡಿಯಾದ ಎರಡನೇ ಹಂತದ ಯೋಜನೆ ಅಡಿಯಲ್ಲಿ ಕೈಗಾರಿಕಾ ಸಚಿವಾಲಯವು ಒಟ್ಟು 68 ನಗರಗಳಲ್ಲಿ 2877 ಎಲೆಕ್ಟ್ರಿಕ್ ಚಾರ್ಜಿಂಗ್ ಸ್ಟೇಷನ್ಗಳನ್ನು ಮತ್ತು 9 ಎಕ್ಸ್ಪ್ರೆಸ್ ಹೈವೇ ಮತ್ತು 16 ಹೈವೇಗಳಲ್ಲಿ ಒಟ್ಟು 1576 ಚಾರ್ಜಿಂಗ್ ಸ್ಟೇಷನ್ಗಳನ್ನು ಮಂಜೂರು ಮಾಡಿದೆ. ಅಲ್ಲದೇ ಯೋಜನೆಯ ಎರಡು ಹಂತಗಳ ಹೋಲಿಕೆಯಲ್ಲಿ ಚಾರ್ಜಿಂಗ್ ಸ್ಟೇಷನ್ಗಳ ವೆಚ್ಚದಲ್ಲಿ ಗಣನೀಯ ಏರಿಕೆಯನ್ನು ಇದು ನಿರ್ದಿಷ್ಟವಾಗಿ ಗುರುತು ಮಾಡಿ ತಿಳಿಸಿದೆ.
ಫೇಮ್ ಇಂಡಿಯಾ ಯೋಜನೆಯ ಒಂದನೇ ಹಂತದಲ್ಲಿ ಮಂಜೂರಾದ ಚಾರ್ಜಿಂಗ್ ಸ್ಟೇಷನ್ಗಳ ಸರಾಸರಿ ವೆಚ್ಚ 8.27 ಲಕ್ಷ ಇದ್ದು, ಆದರೆ ಯೋಜನೆಯ ಎರಡನೇ ಹಂತದಲ್ಲಿ ಮಂಜೂರಾದ ಚಾರ್ಜಿಂಗ್ ಸ್ಟೇಷನ್ಗಳು ಸರಾಸರಿ 22.45 ಲಕ್ಷ ರೂ.ನಿಂದ ಗಣನೀಯ ಹೆಚ್ಚಳವಾಗಿದೆ ಎಂದು ತಿಳಿಸಿದೆ. ಹಣದ ಗಣನೀಯ ಹೆಚ್ಚಳಕ್ಕೆ ಸಂಬಂಧಿಸಿದಂತೆ ಲೆಕ್ಕಪರಿಶೋಧನೆ ನಡೆಸುವಂತೆ ಸಮಿತಿ ಸರ್ಕಾರವನ್ನು ಒತ್ತಾಯಿಸಿದೆ.
ಅಲ್ಲದೇ ಚಾರ್ಜಿಂಗ್ ಸ್ಟೇಷನ್ ಸ್ಥಾಪನೆಯಲ್ಲಿ ನಿಧಾನಗತಿಯ ಪ್ರಗತಿ ಬಗ್ಗೆಯೂ ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಫೇಮ್ ಯೋಜನೆ ಅಡಿಯಲ್ಲಿ ಮಂಜೂರಾದ 520 ಚಾರ್ಜಿಂಗ್ ಸ್ಟೇಷನ್ಗಳ ಪೈಕಿ 479 ಚಾರ್ಜಿಂಗ್ ಸ್ಟೇಷನ್ ಮತ್ತು ಎರಡನೇ ಹಂತದಲ್ಲಿ 2022ರ ಡಿಸೆಂಬರ್ವರೆಗೆ 2,877 ಚಾರ್ಜಿಂಗ್ ಸ್ಟೇಷನ್ಗಳಲ್ಲಿ ಕೇವಲ 50 ಚಾರ್ಜಿಂಗ್ ಸ್ಟೇಷನ್ಗಳು ಮಾತ್ರ ಅಳವಡಿಸಬಹುದೆಂದು ವರದಿ ತಿಳಿಸಿತ್ತು. ಈ ಹಿನ್ನೆಲೆಯಲ್ಲಿ ಇವಿ ಸ್ಟೇಷನ್ಗಳ ಅಳವಡಿಕೆಯಲ್ಲಿ ಉಂಟಾಗುತ್ತಿರುವ ವಿಳಂಬವನ್ನು ಪರಿಶೀಲಿಸಬೇಕೆಂದು ಎಂದು ಸಮಿತಿ ಕೇಳಿದೆ.
ವಿದ್ಯುತ್ ಸಚಿವಾಲಯದ ಮಾರ್ಗಸೂಚಿ ಪ್ರಕಾರ, ಪ್ರತಿ 25 ಕಿಲೋಮೀಟರ್‌ಗಳಿಗೆ ಹೆದ್ದಾರಿಯ ಎರಡೂ ಬದಿಗಳಲ್ಲಿ ಕನಿಷ್ಠ ಒಂದು ಚಾರ್ಜಿಂಗ್ ಸ್ಟೇಷನ್ ಮತ್ತು ಪ್ರತಿ 100 ಕಿಲೋಮೀಟರ್‌ಗಳಿಗೆ ಹೆದ್ದಾರಿಯ ಎರಡೂ ಬದಿಗಳಲ್ಲಿ ಲಾಂಗ್ ರೇಂಜ್/ಹೆವಿ ಡ್ಯೂಟಿ ಇವಿಗಳಿಗಾಗಿ ಕನಿಷ್ಠ ಒಂದು ಚಾರ್ಜಿಂಗ್ ಸ್ಟೇಷನ್ ಇರಬೇಕು. ಸದ್ಯ ಫೇಮ್ ಇಂಡಿಯಾ ಯೋಜನೆ ಅಡಿಯಲ್ಲಿ ಮಂಜೂರಾದ ಇವಿ ಚಾರ್ಜಿಂಗ್ ಸ್ಟೇಷನ್ಗಳ ಸಂಖ್ಯೆ ತುಂಬಾ ಕಡಿಮೆಯಾಗಿದೆ. ಏಕೆಂದರೆ ಭಾರತವು ಸುಮಾರು 63.73 ಲಕ್ಷ ಕಿಮೀ ರಸ್ತೆ ಸಂಪರ್ಕ ಹೊಂದಿದ್ದು, ಇದು ವಿಶ್ವದ ಅತಿ ಎರಡನೇ ದೊಡ್ಡ ರಸ್ತೆ ಸಂಪರ್ಕವಾಗಿದೆ.
ಇನ್ನು, ರಸ್ತೆಯಲ್ಲಿ ಎಲೆಕ್ಟ್ರಿಕ್ ವಾಹನಗಳು ಹೆಚ್ಚಾದಂತೆ ಇ-ಚಾರ್ಜಿಂಗ್ ಸ್ಟೇಷನ್ಗಳು ರಸ್ತೆ ಸಂಚಾರವನ್ನು ಸುಗಮಗೊಳಿಸುತ್ತದೆ ಎಂದು ಸಂಸದೀಯ ಸಮಿತಿ ಅಭಿಪ್ರಾಯಪಟ್ಟಿದೆ. ಅಂತಿಮವಾಗಿ ಹೆದ್ದಾರಿಗಳು ಮತ್ತು ಎಕ್ಸ್‌ಪ್ರೆಸ್‌ವೇಗಳು ಇ-ಹೆದ್ದಾರಿಗಳಾವುದು ಅಗತ್ಯ. ಈ ನಿಟ್ಟಿನಲ್ಲಿ ವಿವಿಧ ಇಲಾಖೆಗಳು ಸಮನ್ವಯ ಸಾಧಿಸಿಕೊಂಡು ಕ್ರಮ ಕೈಗೊಳ್ಳುವುದು ಅಗತ್ಯ ಎಂದು ಸಮಿತಿ ತಿಳಿಸಿದೆ.
ಇದನ್ನೂ ಓದಿ : ಭಾರತದ ಇವಿ ಕನಸಿಗೆ ವೇಗ ನೀಡಲಿದೆ ಕಣಿವೆ ರಾಜ್ಯದ ಲಿಥಿಯಂ ನಿಕ್ಷೇಪ!
