'ನಾಳೆ ನಿಮಗೆ ಸಂದರ್ಶನ ಇರುತ್ತದೆ. 9 ಗಂಟೆಗೆ ನಾವು ಹೇಳುವ ವಿಳಾಸಕ್ಕೆ ಬಂದುಬಿಡಿ'.. ಈ ಕರೆ ನಿಮ್ಮ ಮನಸ್ಸನ್ನು ಒಂದು ರೀತಿಯ ಚಿಂತೆಗೆ ದೂಡಿಬಿಡುತ್ತದೆ. 'ನಾನೇ ಇಷ್ಟಪಟ್ಟು ಇದೇ ಕಂಪನಿಯಲ್ಲಿ ಕೆಲಸ ಸಿಗಲಿ ಎಂದು ರೆಸ್ಯೂಮ್ ಕಳುಹಿಸಿದ್ದೆ. ಅದರಂತೆ ಅವಕಾಶವು ನನ್ನ ಬಳಿಯೇ ಬಂದಿದೆ. ಆದರೆ ಇಂಟರ್ವ್ಯೂ ಹೇಗೆ ಎದುರಿಸಲಿ?' ಎಂಬ ಆತಂಕ ಈ ವೇಳೆ ನಿಮ್ಮ ಮನಸ್ಸನ್ನು ಆವರಿಸಿಕೊಂಡು ಬಿಡುತ್ತದೆ. ಒಳಗೊಳಗೆ ಏನೋ ಒಂದು ರೀತಿಯ ತಳಮಳ ಶುರುವಾಗಿ ಬಿಡುತ್ತದೆ.
ಕೆಲವೊಮ್ಮೆ ಈ ಟೆನ್ಷನ್ನಿಂದ ಇಂಟರ್ವ್ಯೂನಲ್ಲಿ ಗೊತ್ತಿದ್ದ ಉತ್ತರಗಳು ತಪ್ಪಾಗುವ ಸಾಧ್ಯತೆಗಳು ಹೆಚ್ಚಿರುತ್ತದೆ. ಇದರಿಂದಾಗಿ ಅನೇಕ ಮಂದಿ ಕೆಲಸ ಕಳೆದುಕೊಂಡಿದ್ದಾರೆ. 'ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲವಲ್ಲ' ಎಂಬ ಬೇಸರ ಅವರನ್ನು ಆವರಿಸಿ ಬಿಡುತ್ತದೆ. ಹೀಗಾಗಿ ನೀವು ಇಂಟರ್ವ್ಯೂಗೆ ತೆರಳುವಾಗ ಯಾವುದೇ ರೀತಿಯಲ್ಲಿ ಆತಂಕಕ್ಕೊಳಗಾಗಬೇಡಿ. ಭಯ ಇಲ್ಲದೇ ಧೈರ್ಯದಿಂದ ಇಂಟರ್ವ್ಯೂ ಫೇಸ್ ಮಾಡಿ. ನಿಮ್ಮ ಭಯ, ಆತಂಕವನ್ನು ತೊಡೆದು ಹಾಕಲು ಈ ಕೆಳಗಿನ ಸರಳ ವಿಧಾನಗಳನ್ನು ಜೀವನದಲ್ಲಿ ಅನುಸರಿಸಿ.
ಸಲಹೆಗಳೇನು?: * ಸಂದರ್ಶನಕ್ಕೆ ಹೋಗುವ ಮುನ್ನ ಅಲ್ಲಿ ಯಾವ ರೀತಿಯ ಪ್ರಶ್ನೆಗಳನ್ನು ಕೇಳಬಹುದು ಎಂಬುದನ್ನು ಊಹಿಸಿ. ಅದಕ್ಕೆ ತಕ್ಕಂತೆ ನಿಮ್ಮ ಉತ್ತರಗಳನ್ನು ಸಿದ್ಧಪಡಿಸಿಕೊಳ್ಳಿ. ನಂತರ ನೀವು ಹೋಗುತ್ತಿರುವ ಕಂಪನಿ ಬಗ್ಗೆ ಮುಂಚಿತವಾಗಿ ತಿಳಿದುಕೊಳ್ಳಲು ಪ್ರಯತ್ನಿಸಿ. ಅಲ್ಲಿ ಕೆಲಸ ಮಾಡುವ ಯಾರೊಂದಿಗಾದರೂ ಮಾತನಾಡಿ. ನಿಮಗೆ ಏನಾದರೂ ಅನುಮಾನಗಳಿದ್ದರೆ ಅವರಲ್ಲಿ ಕೇಳಿ ಬಗೆಹರಿಸಿಕೊಳ್ಳಿ. ಮುಂಚಿತವಾಗಿ ನಿಮ್ಮನ್ನು ನೀವು ಸಿದ್ಧಪಡಿಸಿಕೊಂಡಿದ್ದರೆ, ಯಾವುದೇ ಭಯವಿರುವುದಿಲ್ಲ.
ಇದನ್ನೂ ಓದಿ: ಎಐ ಕೌಶಲದಿಂದ ವೃತ್ತಿಜೀವನದಲ್ಲಿ ಏಳಿಗೆ: ಯುವ ಉದ್ಯೋಗಿಗಳ ಅಭಿಪ್ರಾಯ
* ಕೆಲವರು ಏನನ್ನೂ ತಿನ್ನದೇ ಸಂದರ್ಶನಕ್ಕೆ ಹೋಗುತ್ತಾರೆ. ಹಾಗೆಲ್ಲ ಮಾಡಲು ಹೋಗಬೇಡಿ. ಏಕೆಂದರೆ ಬೆಳಗಿನ ಉಪಹಾರ ನಿಮಗೆ ಉತ್ತಮ ಶಕ್ತಿಯನ್ನು ನೀಡುತ್ತದೆ. ಜೊತೆಗೆ ಮೆದುಳು ಕೂಡ ಹೆಚ್ಚು ಕ್ರೀಯಾಶೀಲವಾಗಿರುತ್ತದೆ. ಹಾಗಾಗಿ ನೀವು ಉತ್ಸಾಹದಿಂದ ಇಂಟರ್ವ್ಯೂ ಫೇಸ್ ಮಾಡಬಹುದು. ಯಾವುದೇ ಆತಂಕವಿಲ್ಲದೇ ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸಬಹುದು.
* ನಿಮಗೆ ಸಂದರ್ಶನಕ್ಕೆ ತೆರಳುವಾಗ ಕೆಲಸ ಸಿಗಬಹುದೋ, ಇಲ್ಲವೋ ಎಂಬ ಚಿಂತೆ ಶುರುವಾಗುತ್ತದೆ. ಈ ಸಂದರ್ಭದಲ್ಲಿ ನಿಮ್ಮ ಸ್ನೇಹಿತರು ಅಥವಾ ಕುಟುಂಬ ಸದಸ್ಯರ ಜೊತೆ ಕರೆ ಮಾಡಿ ಮಾತನಾಡಿ. ಹೀಗೆ ಮಾಡಿದರೆ ನಿಮ್ಮ ಮನಸ್ಸಿಗೆ ತುಂಬಾ ನೆಮ್ಮದಿ ಸಿಗುತ್ತದೆ. ನಿಮ್ಮ ಚಿಂತೆ ಎಲ್ಲಾ ದೂರವಾಗುತ್ತದೆ. ಮನಸ್ಸು ಪ್ರಶಾಂತವಾಗುತ್ತದೆ.
* ಎಲ್ಲದಕ್ಕಿಂತಲೂ ಪ್ರಮುಖವಾದದ್ದು ಪೂರ್ವಭ್ಯಾಸ. ಅಂದರೆ, ಸಂದರ್ಶನಕ್ಕೆ ಹೋಗುವ ಮೊದಲು ಕನ್ನಡಿಯಲ್ಲಿ ಯಾವ ರೀತಿ ಮಾತನಾಡಬೇಕೆಂದು ಪೂರ್ವಭ್ಯಾಸ ಮಾಡಿ. ಚೆನ್ನಾಗಿ ಮಾತನಾಡುವುದನ್ನು ಅಭ್ಯಾಸ ಮಾಡಿಕೊಳ್ಳಿ. ಆಗ ನೀವು ಭಯವನ್ನು ಕಳೆದುಕೊಳ್ಳುತ್ತೀರಿ.
ಇದನ್ನೂ ಓದಿ: ಸಾಮಾಜಿಕ ಜಾಲತಾಣದ ಬಳಕೆ ಯುವಜನತೆ ಮತ್ತು ಮಕ್ಕಳಲ್ಲಿ ಖಿನ್ನತೆ ಉಂಟು ಮಾಡಲ್ಲ: ಸಂಶೋಧನೆ
