ಬಾಡಿಗೆ ಮೇಲೆ ಶೇ 18 ಜಿಎಸ್‌ಟಿ: ಯಾರಿಗೆಲ್ಲ ಅನ್ವಯ?

ಹೊಸ ಜಿಎಸ್​ಟಿ ನಿಯಮ ಜಾರಿ. ಬಾಡಿಗೆದಾರರು ಜಿಎಸ್​ಟಿ ಪಾವತಿಸುವುದು ಕಡ್ಡಾಯ. ಎಲ್ಲ ಬಾಡಿಗೆದಾರರಿಗೆ ಅನ್ವಯಿಸಲ್ಲ ಹೊಸ ರೂಲ್ಸ್​.

ಬೆಂಗಳೂರು: ಬಾಡಿಗೆ ಅಥವಾ ಲೀಸ್​ಗೆ ನೀಡಿದ ಕಚೇರಿ ಅಥವಾ ಅಂಗಡಿಯಂಥ ವಾಣಿಜ್ಯ ಆಸ್ತಿ ಕಟ್ಟಡಗಳಿಗೆ ಮಾತ್ರ ಈ ಮುಂಚೆ ಜಿಎಸ್​ಟಿ ವಿಧಿಸಲಾಗುತ್ತಿತ್ತು. ಆದರೆ ಇನ್ನು ಮುಂದೆ ಜಿಎಸ್​ಟಿ ಅಡಿಯಲ್ಲಿ ನೋಂದಾಯಿಸಿಕೊಂಡ ಬಾಡಿಗೆದಾರನು ಕೂಡ ಶೇ 18ರಷ್ಟು ಜಿಎಸ್​ಟಿ ಪಾವತಿಸಬೇಕಾಗಿದೆ. ಈ ನಿಯಮ ಜುಲೈ 18 ರಿಂದಲೇ ಜಾರಿಯಾಗಿದೆ. ಆದರೆ ಈ ನಿಯಮ ಎಲ್ಲರಿಗೂ ಅನ್ವಯಿಸುವುದಿಲ್ಲ. ಹಾಗಾದರೆ ಯಾರಿಗೆಲ್ಲ ನಿಯಮ ಅನ್ವಯಿಸುತ್ತದೆ ಎಂಬ ಮಾಹಿತಿ ಇಲ್ಲಿದೆ.

ಬಾಡಿಗೆದಾರನೊಬ್ಬ ಜಿಎಸ್​ಟಿ ನೋಂದಾಯಿತನಾಗಿದ್ದು, ಅಂದರೆ ಜಿಎಸ್​ಟಿ ನೋಂದಾಯಿಸಿ ಅದರಡಿಯಲ್ಲಿ ವ್ಯಾಪಾರ ವಹಿವಾಟು ನಡೆಸುತ್ತಿದ್ದರೆ, ಆಗ ತಾನು ಪಾವತಿಸುವ ಬಾಡಿಗೆಯ ಮೇಲೆ ಶೇ 18 ರಷ್ಟು ಜಿಎಸ್​ಟಿ ಪಾವತಿಸಬೇಕಾಗುತ್ತದೆ. ಈ ಮುಂಚೆ ಬಾಡಿಗೆ ಅಥವಾ ಲೀಸ್​ಗೆ ಪಡೆದ ವಾಣಿಜ್ಯ ಮಾತ್ರ ಕಟ್ಟಡಗಳಿಗೆ ಜಿಎಸ್​ಟಿ ಪಾವತಿಸಬೇಕಿತ್ತು. ಆದರೆ ಗೃಹಬಳಕೆ ಕಟ್ಟಡಗಳನ್ನು ಬಾಡಿಗೆ ಅಥವಾ ಲೀಸ್ ಪಡೆಯುವ ಕಂಪನಿ ಅಥವಾ ವ್ಯಕ್ತಿಗಳು ಜಿಎಸ್​ಟಿ ಪಾವತಿಸಬೇಕಿರಲಿಲ್ಲ.

ಆದರೆ ಬದಲಾದ ನಿಯಮಗಳ ಪ್ರಕಾರ ಜಿಎಸ್​ಟಿ ನೋಂದಾಯಿತ ಬಾಡಿಗೆದಾರನೊಬ್ಬ ಜಿಎಸ್​ಟಿ ಪಾವತಿಸಬೇಕಿದೆ. ರಿವರ್ಸ್ ಚಾರ್ಜ್ ಮೆಕ್ಯಾನಿಸಂ (reverse charge mechanism -RCM) ಪ್ರಕಾರ ಹೊಸ ನಿಯಮ ರೂಪಿಸಲಾಗಿದೆ. ಬಾಡಿಗೆದಾರನು ತಾನು ಪಾವತಿಸಿದ ಜಿಎಸ್​ಟಿ ಮೊತ್ತವನ್ನು ಇನ್​ಪುಟ್​ ಟ್ಯಾಕ್ಸ್​ ಕ್ರೆಡಿಟ್​ ಅಡಿಯಲ್ಲಿ ಡಿಡಕ್ಷನ್ ಆಗಿ ಕ್ಲೇಮ್ ಮಾಡಬಹುದು.

ಬಾಡಿಗೆದಾರನು ಜಿಎಸ್​ಟಿ ನೋಂದಾಯಿತನಾಗಿದ್ದು, ಜಿಎಸ್​ಟಿ ರಿಟರ್ನ್​ ಫೈಲ್ ಮಾಡುತ್ತಿದ್ದರೆ ಮಾತ್ರ ಈ ತೆರಿಗೆ ಅನ್ವಯವಾಗುತ್ತದೆ. ಬಾಡಿಗೆ ಕಟ್ಟಡದ ಮಾಲೀಕರು ಯಾವುದೇ ಜಿಎಸ್​ಟಿ ಪಾವತಿಸಬೇಕಿಲ್ಲ.

ಉದಾಹರಣೆಗೆ ನೋಡುವುದಾದರೆ- ಸಾಮಾನ್ಯ ವೇತನದಾರನೊಬ್ಬ ವಸತಿಗಾಗಿ ಮನೆ ಅಥವಾ ಫ್ಲಾಟ್ ಅನ್ನು ಬಾಡಿಗೆ ಅಥವಾ ಲೀಸ್​ಗೆ ತೆಗೆದುಕೊಂಡಿದ್ದರೆ, ಆತ ಜಿಎಸ್​ಟಿ ಪಾವತಿಸಬೇಕಿಲ್ಲ. ಆದರೆ ವ್ಯಾಪಾರ ಅಥವಾ ವೃತ್ತಿಯನ್ನು ನಿರ್ವಹಿಸುವ ಜಿಎಸ್​ಟಿ ನೋಂದಾಯಿತ ವ್ಯಕ್ತಿಯು ಪಾವತಿಸುವ ಬಾಡಿಗೆಯ ಮೇಲೆ ಶೇಕಡಾ 18 ರಷ್ಟು ಜಿಎಸ್​ಟಿಯನ್ನು ಪಾವತಿಸಬೇಕು.

ಜಿಎಸ್‌ಟಿ ನೋಂದಾಯಿತ ವ್ಯಕ್ತಿಯೊಬ್ಬ ಬಾಡಿಗೆಗೆ ಪಡೆದ ವಸತಿ ಕಟ್ಟಡದಿಂದ ವ್ಯಾಪಾರ ವಹಿವಾಟು ನಡೆಸಿದರೆ ಆತ ಶೇಕಡಾ 18 ರಷ್ಟು ತೆರಿಗೆಯನ್ನು ಪಾವತಿಸಬೇಕು.

ಜಿಎಸ್​ಟಿ ಕಾನೂನಿನ ಪ್ರಕಾರ ನೋಂದಾಯಿತ ವ್ಯಕ್ತಿ ಎಂದರೆ ವ್ಯಕ್ತಿ ಮತ್ತು ಕಾರ್ಪೊರೇಟ್ ಸಂಸ್ಥೆ ಎಂದರ್ಥ. ವ್ಯಾಪಾರ ಅಥವಾ ವೃತ್ತಿಯನ್ನು ನಡೆಸುತ್ತಿರುವ ವ್ಯಕ್ತಿಯು ನಿರ್ದಿಷ್ಟ ಮಿತಿಗಿಂತ ಹೆಚ್ಚಿನ ವಾರ್ಷಿಕ ವಹಿವಾಟನ್ನು ತಲುಪಿದಾಗ ಜಿಎಸ್​ಟಿ ನೋಂದಣಿ ಕಡ್ಡಾಯವಾಗಿರುತ್ತದೆ.