ನವದೆಹಲಿ: ತಕ್ಷಣದಿಂದ ಜಾರಿಗೆ ಬರುವಂತೆ ಮಹೀಂದ್ರಾ ಅಂಡ್ ಮಹೀಂದ್ರಾ (ಎಂ&ಎಂ) ತನ್ನ ಪರ್ಸನಲ್ ಮತ್ತು ವಾಣಿಜ್ಯ ವಾಹನಗಳ ದರವನ್ನು ಶೇ 1.9ರಷ್ಟು ಹೆಚ್ಚಿಸುವುದಾಗಿ ಪ್ರಕಟಿಸಿದೆ.
19.4 ಬಿಲಿಯನ್ ಡಾಲರ್ನ ಮಹೀಂದ್ರಾ ಗ್ರೂಪ್ನ ಭಾಗವಾಗಿರುವ ಮಹೀಂದ್ರಾ ಅಂಡ್ ಮಹೀಂದ್ರಾದ (ಎಂ&ಎಂ) ವೈಯಕ್ತಿಕ ಮತ್ತು ವಾಣಿಜ್ಯ ವಾಹನಗಳ ಶ್ರೇಣಿಯ ಬೆಲೆಯಲ್ಲಿ 4,500 - 40,000 ರೂ. ತನಕ ಏರಿಕೆ ಆಗಲಿದೆ. ಈ ದರ ಹೆಚ್ಚಳವು ವಿವಿಧ ಮಾದರಿಯ ವಾಹನಗಳನ್ನು ಅವಲಂಭಿಸಿರುತ್ತದೆ ಎಂದು ಮುಂಬೈ ಮೂಲದ ವಾಹನ ತಯಾರಕ ನಿಯಂತ್ರಕ ಫೈಲಿಂಗ್ನಲ್ಲಿ ತಿಳಿಸಿದ್ದಾರೆ.
ಹೊಸ ಥಾರ್‌ನ ಬಿಡುಗಡೆಯ ಪ್ರಸ್ತುತ ಬೆಲೆ ಹೆಚ್ಚಳವು 2020ರ ಡಿಸೆಂಬರ್ 1 ಮತ್ತು 2021ರ ಜನವರಿ 7ರ ನಡುವೆ ಮಾಡಿದ ಎಲ್ಲ ಬುಕ್ಕಿಂಗ್‌ಗಳಿಗೆ ಅನ್ವಯಿಸಲಿದೆ. 2021ರ ಜನವರಿ 8ರಿಂದ ಹೊಸ ಥಾರ್‌ಗೆ ನೂತನ ಬುಕ್ಕಿಂಗ್ಗಳ ವಿತರಣಾ ದಿನಾಂಕದಂದು ಅನ್ವಯವಾಗುವಂತೆ ದರ ಹೊಂದಿರುತ್ತದೆ ಎಂದು ಕಂಪನಿ ತಿಳಿಸಿದೆ.
ಇದನ್ನೂ ಓದಿ: ದಶಕದ ದಾಖಲೆ ಬರೆದ ನಿಫ್ಟಿ: ಸೀತಾರಾಮನ್ ಬಜೆಟ್ ಮೇಲೆ ಭರವಸೆಯ ಹೊರೆ!
ಕಳೆದ ಹಲವು ತಿಂಗಳಿಂದ ಸರಕುಗಳ ಬೆಲೆಯಲ್ಲಿ ಹೆಚ್ಚಳ ಮತ್ತು ಇತರ ಇನ್ಪುಟ್ ವೆಚ್ಚಗಳಿಂದಾಗಿ ಬೆಲೆ ಏರಿಕೆ ಅಗತ್ಯವಾಗಿದೆ ಎಂದು ಎಂ&ಎಂ ಆಟೋಮೋಟಿವ್ ವಿಭಾಗದ ಸಿಇಒ ವಿಜಯ್ ನಕ್ರಾ ತಿಳಿಸಿದ್ದಾರೆ.
ನಮ್ಮ ವೆಚ್ಚವನ್ನು ಕಡಿಮೆ ಮಾಡಲು ನಾವು ಎಲ್ಲ ಪ್ರಯತ್ನಗಳನ್ನು ಮಾಡಿದ್ದೇವೆ. ಬೆಲೆ ಹೆಚ್ಚಳವನ್ನು ಕೆಲ ಅವಧಿವರೆಗೂ ಮುಂದೂಡಿದ್ದೆವು. ಆದರೆ, ಇನ್ಪುಟ್ ವೆಚ್ಚ ಹೆಚ್ಚಳದ ಪ್ರಮಾಣದಿಂದಾಗಿ ನಾವು 2021ರ ಜನವರಿ 8ರಿಂದ ಈ ಬೆಲೆ ಹೆಚ್ಚಳ ನಿರ್ಧಾರ ತೆಗೆದುಕೊಳ್ಳುತ್ತಿದ್ದೇವೆ ಎಂದು ಹೇಳಿದರು.
ಕಳೆದ ತಿಂಗಳು ಜನವರಿ 1ರಿಂದ ತನ್ನ ಸಂಪೂರ್ಣ ಶ್ರೇಣಿಯ ಪ್ರಯಾಣಿಕ ಮತ್ತು ವಾಣಿಜ್ಯ ವಾಹನಗಳ ಬೆಲೆಯನ್ನು ಹೆಚ್ಚಿಸುವುದಾಗಿ ಕಂಪನಿ ಹೇಳಿತ್ತು.
