ನವದೆಹಲಿ: ಭಾರತದ ಬಂಡವಾಳ ಮಾರುಕಟ್ಟೆಗಳಿಗೆ ಒಳಹರಿವು ಆಕರ್ಷಿಸಲು ಇಂಡಿಯಾ- ಯುಕೆ ಫೈನಾನ್ಷಿಯಲ್ ಪಾರ್ಟ್‌ನರ್‌ಶಿಪ್ (ಐಯುಕೆಎಫ್‌ಪಿ) ಸಹಭಾಗಿತ್ವದಲ್ಲಿ ಸಿಟಿ ಆಫ್ ಲಂಡನ್ ಕಾರ್ಪೊರೇಷನ್ ನೇತೃತ್ವದ ಯುಕೆ-ಇಂಡಿಯಾ ಕ್ಯಾಪಿಟಲ್ ಮಾರ್ಕೆಟ್ಸ್ ವರ್ಕಿಂಗ್ ಗ್ರೂಪ್‌ನ ಕಾರ್ಯವು ಭಾರತದ ಆರ್ಥಿಕತೆಗೆ ನೆರವಾಗುತ್ತಿದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿದರು.
10ನೇ ಭಾರತ-ಇಂಗ್ಲೆಂಡ್ ಆರ್ಥಿಕ ಮತ್ತು ಹಣಕಾಸು ಸಂವಾದ (ಇಎಫ್‌ಡಿ) ಕಾರ್ಯಕ್ರಮ ಉದ್ದೇಶಿಸಿ ವಿಡಿಯೋ ಕಾನ್ಫರೆನ್ಸ್ ಮೂಲಕ ಮಾತನಾಡಿದ ಅವರು, ಭಾರತ-ಯುಕೆ ಕಾರ್ಯತಂತ್ರ ಸಹಯೋಗವು 2020ರಲ್ಲಿ ಗಿಫ್ಟ್ ಸಿಟಿಯಲ್ಲಿ ಸ್ಟ್ಯಾಂಡರ್ಡ್ ಚಾರ್ಟರ್ಡ್ ಮತ್ತು ಎಚ್‌ಎಸ್‌ಬಿಸಿ ಆರಂಭಿಕ ಕಚೇರಿಗಳ ಜೊತೆಗೆ ಗಿಫ್ಟ ನಗರದ ಅಭಿವೃದ್ಧಿಯನ್ನು ವೇಗಗೊಳಿಸಲು ಸಹಾಯ ಮಾಡಿತು. ಇದು ಅಂತಾರಾಷ್ಟ್ರೀಯ ಬ್ಯಾಂಕಿಂಗ್ ಘಟಕ ನಿರ್ವಹಿಸಲು ಪರವಾನಗಿ ಪಡೆದ ಮೊದಲ ವಿದೇಶಿ ಬ್ಯಾಂಕ್ ಎಂದರು.
ಭಾರತ-ಯುಕೆ ನಡುವಿನ ಆರ್ಥಿಕ ಸಂಬಂಧಗಳು ಮುಖ್ಯವಾಗಿದೆ ಎಂದ ಸೀತಾರಾಮನ್, ಒಟ್ಟಾರೆಯಾಗಿ 5 ಟ್ರಿಲಿಯನ್ಗಿಂತ ಹೆಚ್ಚಿನ ಜಿಡಿಪಿ ಹೊಂದಿರುವ ವಿಶ್ವದ ಅಗ್ರ ಏಳು ಆರ್ಥಿಕತೆಗಳಲ್ಲಿ ಈ ಎರಡು ರಾಷ್ಟ್ರಗಳಿವೆ. 2007ರಲ್ಲಿ ಮೊದಲ ಇಎಫ್‌ಡಿಯ ನಂತರ ಭಾರತ-ಯುಕೆ ವ್ಯಾಪಾರವು ದ್ವಿಗುಣಗೊಂಡಿದೆ. ದ್ವಿಪಕ್ಷೀಯ ಹೂಡಿಕೆಯು ಎರಡೂ ದೇಶಗಳಲ್ಲಿ ಅರ್ಧ ಮಿಲಿಯನ್ ಉದ್ಯೋಗಗಳಿಗೆ ಬೆಂಬಲವಾಗಿ ನಿಂತಿವೆ ಎಂದು ಹೇಳಿದರು.
ಕೊರೊನಾ ವೈರಸ್ ತೀವ್ರತೆಗೆ ಕಾರಣವಾಗುವ ಅಂಶಗಳ ಸಂಶೋಧನೆಗಾಗಿ ಭಾರತ ಮತ್ತು ಯುಕೆ ತಮ್ಮ ಜೈವಿಕ ತಂತ್ರಜ್ಞಾನ ವಿಭಾಗಗಳಲ್ಲಿ 8 ಮಿಲಿಯನ್ ಪೌಂಡ್‌ಗಳ ಜಂಟಿ ಹೂಡಿಕೆ ಹೊಂದಿವೆ ಎಂದು ಸೀತಾರಾಮನ್ ತಿಳಿಸಿದರು.
ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಪಿಪಿಇ ಉತ್ಪಾದಕನಾಗಿರುವುದು ಶ್ಲಾಘನೀಯ ಎಂದು ಯುಕೆ ಚಾನ್ಸೆಲರ್ ರಿಷಿ ಸುನಕ್ ಅವರು ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ಅವರಿಗೆ ತಿಳಿಸಿದರು.
ಯುಕೆ-ಇಂಡಿಯಾ ಫಿನ್‌ಟೆಕ್ ಜಂಟಿ ಕಾರ್ಯನಿರತ ಗುಂಪು 2020ರ ಮಾರ್ಚ್ನಲ್ಲಿ ಸಭೆ ಸೇರಿ ಯುಕೆನಲ್ಲಿ ರುಪೇ ಕಾರ್ಡ್‌ಗಳ ಹೆಚ್ಚಿನ ಸ್ವೀಕಾರಕ್ಕೆ ಮನವಿ ಮಾಡಿದೆ. ಎಸ್‌ಐಡಿಬಿಐ ಮತ್ತು ಯುಕೆ ಸರ್ಕಾರದ ಬೆಂಬಲದೊಂದಿಗೆ ಯುಕೆ-ಇಂಡಿಯಾ ಫಾಸ್ಟ್-ಟ್ರ್ಯಾಕ್ ಸ್ಟಾರ್ಟ್-ಅಪ್ ಫಂಡ್ ಆರಂಭಿಕ ಹಂತದ ಟೆಕ್ ಸ್ಟಾರ್ಟ್-ಅಪ್‌ಗಳಿಗೆ ತಾಂತ್ರಿಕ ನೆರವಿನ ಜೊತೆಗೆ ಸಾಮರ್ಥ್ಯ ವೃದ್ಧಿ, ನೀತಿಗಳ ವಕಾಲತ್ತು ಮತ್ತು ಉದ್ಯಮಶೀಲತೆಯ ಸಂಪರ್ಕಗಳತ್ತ ಕೇಂದ್ರೀಕರಿಸಿದೆ ಎಂದು ಸೀತಾರಾಮನ್ ಹೇಳಿದರು.
