ನವದೆಹಲಿ/ಬರ್ನ್: ಕಪ್ಪು ಹಣ ಸಂಗ್ರಹಿಸಿಡಲು ಅತ್ಯಂತ ಸುರಕ್ಷಿತ ತಾಣ ಎನಿಸಿಕೊಂಡಿರುವ ಸ್ವಿಸ್ ಬ್ಯಾಂಕ್ಗಳಲ್ಲಿ ಭಾರತೀಯರು ಬಚ್ಚಿಡುತ್ತಿದ್ದ ಕಾಳಧನದ ಕುರಿತು ಮಾಹಿತಿ ಪಡೆಯಲು ಶತಪ್ರಯತ್ನ ನಡೆಸುತ್ತಿದ್ದ ಭಾರತಕ್ಕೆ ಮತ್ತೊಂದು ಯಶಸ್ಸು ಲಭಿಸಿದೆ.
ಸ್ವಿಟ್ಜರ್ಲೆಂಡ್ನ ಸ್ವಿಸ್ ಬ್ಯಾಂಕ್ ತನ್ನಲ್ಲಿರುವ ಖಾತೆಗಳ ಬಗೆಗಿನ ಎರಡನೇ ಹಂತದ ವಿವರಗಳನ್ನು ಸ್ವಯಂಚಾಲಿತವಾಗಿ ವಿನಿಮಯ ಮಾಡಿಕೊಂಡಿದೆ. ಫೆಡರಲ್ ಟ್ಯಾಕ್ಸ್ ಅಡ್ಮಿನಿಸ್ಟ್ರೇಷನ್ (ಎಫ್ಟಿಎ), ಈ ವರ್ಷ ಸ್ವಯಂಚಾಲಿತ ಮಾಹಿತಿ ವಿನಿಮಯದಡಿ (ಎಇಒಐ) ಜಾಗತಿಕ ಮಾನದಂಡಗಳ ಚೌಕಟ್ಟಿನ ಒಳಗೆ ಹಣಕಾಸು ಖಾತೆಗಳ ಮಾಹಿತಿ ವಿನಿಮಯ ಮಾಡಿಕೊಂಡ 86 ದೇಶಗಳಲ್ಲಿ ಭಾರತವೂ ಸೇರಿದೆ.
ಭಾರತವು 2019ರ ಸೆಪ್ಟೆಂಬರ್ನಲ್ಲಿ ಎಇಒಐ ಅಡಿ ಸ್ವಿಟ್ಜರ್ಲೆಂಡ್‌ನಿಂದ ಮೊದಲ ಬಾರಿಗೆ ಖಾತೆಯ ವಿವರಗಳನ್ನು ಪಡೆದುಕೊಂಡಿತ್ತು. ಸ್ವಿಸ್ ಬ್ಯಾಂಕ್‌ಗಳಲ್ಲಿರುವ ಭಾರತೀಯರ ಕಪ್ಪು ಹಣ ವಾಪಸ್‌ ತರುವ ನರೇಂದ್ರ ಮೋದಿ ಸರ್ಕಾರ 2018ರಲ್ಲಿ ಭಾರತ - ಸ್ವಿಟ್ಜರ್ಲೆಂಡ್ ನಡುವೆ ಮಾಹಿತಿ ವಿನಿಮಯದ ಒಪ್ಪಂದ ಮಾಡಿಕೊಂಡಿತ್ತು. ಅದರ ಫಲಪ್ರದವಾಗಿ ಎರಡನೇ ಬಾರಿ ಕಾಳಧನಿಕರ ಮಾಹಿತಿ ಸ್ವೀಕರಿಸಿದೆ.
ಈ ವರ್ಷ ಮಾಹಿತಿ ವಿನಿಮಯವು ಸುಮಾರು 3.1 ಮಿಲಿಯನ್ (31 ಲಕ್ಷ) ಹಣಕಾಸು ಖಾತೆಗಳನ್ನು ಒಳಗೊಂಡಿದೆ ಎಂದು ಎಫ್ಟಿಎ ಪ್ರಕಟಣೆಯಲ್ಲಿ ತಿಳಿಸಿದೆ. ಮಾಹಿತಿ ಹಂಚಿಕೊಂಡ 86 ದೇಶಗಳಲ್ಲಿ ಭಾರತವನ್ನು ಸ್ಪಷ್ಟವಾಗಿ ಹೆಸರಿಸಿಲ್ಲ ಎಂದು ಅಧಿಕಾರಿಗಳು ಪಿಟಿಐಗೆ ತಿಳಿಸಿದ್ದಾರೆ. ಸ್ವಿಸ್ ಬ್ಯಾಂಕ್ಗಳು ಮತ್ತು ಇತರ ಹಣಕಾಸು ಸಂಸ್ಥೆಗಳ ಗ್ರಾಹಕರ ಖಾತೆಗಳ ಬಗ್ಗೆ ಸ್ವಿಟ್ಜರ್ಲೆಂಡ್ ಹಂಚಿಕೊಂಡಿರುವ ಪ್ರಮುಖ ದೇಶಗಳಲ್ಲಿ ಭಾರತವೂ ಸೇರಿದೆ ಎಂಬುದು ಗಮನಾರ್ಹ ಅಂಶ.
ಈ ವರ್ಷದ 86 ದೇಶಗಳಿಗೆ ಸಂಬಂಧಿಸಿದ ಸ್ವಿಟ್ಜರ್ಲೆಂಡ್ನ ಮೂರು ದಶಲಕ್ಷಕ್ಕೂ ಅಧಿಕ ಖಾತೆಗಳ ಮಾಹಿತಿ ವಿನಿಮಯದಲ್ಲಿ ಭಾರತೀಯ ನಾಗರಿಕರ ಮತ್ತು ಸಂಸ್ಥೆಗಳು ಗಣನೀಯ ಪ್ರಮಾಣದಲ್ಲಿ ಇವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ತೆರಿಗೆ ವಂಚನೆ ಸೇರಿದಂತೆ ಅಕ್ರಮ ಹಣಕಾಸಿನ ಬಗ್ಗೆ ಮಾಹಿತಿ ನೀಡುವಂತೆ ಆಡಳಿತಾತ್ಮಕ ನೆರವಿನಡಿ ಬಂದ ಮನವಿಗಳನ್ನು ಸ್ವೀಕರಿಸಿದ ಸ್ವಿಸ್ ಅಧಿಕಾರಿಗಳು, ಕಳೆದ ಒಂದು ವರ್ಷದಲ್ಲಿ 100ಕ್ಕೂ ಅಧಿಕ ಭಾರತೀಯ ನಾಗರಿಕರ ಮತ್ತು ಸಂಸ್ಥೆಗಳ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ.
ಈ ಪ್ರಕರಣಗಳಲ್ಲಿ ಪನಾಮ, ಬ್ರಿಟಿಷ್ ವರ್ಜಿನ್ ಐಲ್ಯಾಂಡ್, ಕೇಮನ್ ದ್ವೀಪಗಳಂತಹ ನಾನಾ ಸಾಗರೋತ್ತರದಲ್ಲಿ ಭಾರತೀಯರು ಸ್ಥಾಪಿಸಿದ ಘಟಕಗಳಿವೆ. ಇದರಲ್ಲಿ ಉದ್ಯಮಿಗಳು ಮತ್ತು ಕೆಲವು ರಾಜಕಾರಣಿಗಳು, ಹಿಂದಿನ ರಾಜವಂಶಸ್ಥರ ಮತ್ತು ಅವರ ಕುಟುಂಬ ಸದಸ್ಯರೂ ಸೇರಿದ್ದಾರೆ.
ವಿನಿಮಯ ಚೌಕಟ್ಟು ನಿಯಂತ್ರಿಸುವ ಕಠಿಣ ಗೌಪ್ಯತೆ ಷರತ್ತುಗಳನ್ನು ಉಲ್ಲೇಖಿಸಿದ ಸ್ವಿಸ್, ನಿಖರವಾದ ಸಂಖ್ಯೆಯ ಖಾತೆಗಳು, ಭಾರತೀಯರ ಖಾತೆಗಳಲ್ಲಿರುವ ಆಸ್ತಿ ಮೌಲ್ಯದ ಪ್ರಮಾಣವನ್ನು ಹಂಚಿಕೊಳ್ಳಲು ಅಧಿಕಾರಿಗಳು ನಿರಾಕರಿಸಿದರು.
ಸ್ವಿಸ್ ಅಧಿಕಾರಿಗಳು ಹಂಚಿಕೊಂಡ ಮಾಹಿತಿಯಲ್ಲಿ ಖಾತೆದಾರರ ಹೆಸರು, ವಿಳಾಸ, ವಾಸಿಸುವ ದೇಶ ಮತ್ತು ತೆರಿಗೆ ಗುರುತಿನ ಸಂಖ್ಯೆ, ಖಾತೆ ಹಾಗೂ ಹಣಕಾಸಿನ ಮಾಹಿತಿ ಒಳಗೊಂಡಿದೆ. ಜೊತೆಗೆ ವರದಿ ಮಾಡುವ ಹಣಕಾಸು ಸಂಸ್ಥೆ, ಖಾತೆ ಬಾಕಿ ಮತ್ತು ಬಂಡವಾಳ ಆದಾಯದ ಮಾಹಿತಿ ಸಹ ಸೇರ್ಪಡೆಯಾಗಿದೆ.
ವಿನಿಮಯವಾದ ಮಾಹಿತಿಯು ತೆರಿಗೆದಾರರು ತಮ್ಮ ತೆರಿಗೆ ರಿಟರ್ನ್‌ಗಳಲ್ಲಿ ತಮ್ಮ ಹಣಕಾಸು ಖಾತೆಗಳನ್ನು ಸರಿಯಾಗಿ ಘೋಷಿಸಿದ್ದಾರೆಯೇ ಎಂದು ಪರಿಶೀಲಿಸಲು ಅಧಿಕಾರಿಗಳಿಗೆ ಅವಕಾಶ ನೀಡಲಿದೆ. ಮುಂದಿನ ವಿನಿಮಯ 2021ರ ಸೆಪ್ಟೆಂಬರ್ನಲ್ಲಿ ನಡೆಯಲಿದೆ.
ಈ ವರ್ಷ ಎಇಒಐ ವ್ಯಾಪ್ತಿಗೆ ಬರುವ 86 ದೇಶಗಳಲ್ಲಿ ಆಂಗ್ವಿಲ್ಲಾ, ಅರುಬಾ, ಬಹಾಮಾಸ್, ಬಹ್ರೇನ್, ಗ್ರೆನಡಾ, ಇಸ್ರೇಲ್, ಕುವೈತ್, ಮಾರ್ಷಲ್ ದ್ವೀಪ, ನೌರು, ಪನಾಮ ಮತ್ತು ಯುಎಇ ಸೇರಿವೆ ಎಂದು ಎಫ್ಟಿಎ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಪ್ರಸ್ತುತ ಸುಮಾರು 8,500 ಹಣಕಾಸು ಸಂಸ್ಥೆಗಳು (ಬ್ಯಾಂಕ್ಗಳು, ಟ್ರಸ್ಟ್‌ಗಳು, ವಿಮಾದಾರರು ಇತ್ಯಾದಿ) ಎಫ್ಟಿಎ ಪಟ್ಟಿಯಲ್ಲಿವೆ. ಕಳೆದ ವರ್ಷ ಸುಮಾರು 7,500 ರಷ್ಟಿದ್ದವು. ಈ ವರ್ಷ ಅವುಗಳ ಸಂಖ್ಯೆ ಹೆಚ್ಚಾಗಿದೆ. ಎಫ್ಟಿಎ ಸುಮಾರು 3.1 ಮಿಲಿಯನ್ ಹಣಕಾಸು ಖಾತೆಗಳ ಮಾಹಿತಿ ಪಾಲುದಾರ ರಾಷ್ಟ್ರಗಳಿಗೆ ಕಳುಹಿಸಿ, ಅವರಿಂದ ಸುಮಾರು 8,15,000 ಹಣಕಾಸು ಖಾತೆಗಳ ಮಾಹಿತಿ ಪಡೆಯಿತು.
