ಮುಂಬೈ: ತನ್ನ ಉಳಿವಿಗಾಗಿ ತೀವ್ರ ಸಂಕಷ್ಟಪಡುತ್ತಿರುವ ಏರ್ ಇಂಡಿಯಾ, ಇನ್ನಾರು ತಿಂಗಳಲ್ಲಿ ಖಾಸಗಿ ಖರೀದಿದಾರರು ಮುಂದೆ ಬಾರದಿದ್ದರೆ ಜೂನ್ ವೇಳೆಗೆ ಸೇವೆ ಸ್ಥಗಿತಗೊಳಿಸಬೇಕಾಗುತ್ತದೆ ಎಂದು ಹಿರಿಯ ವಿಮಾನ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ರಾಷ್ಟ್ರೀಯ ವಾಹಕದ ಭವಿಷ್ಯವು ತೂಗುಯ್ಯಾಲೆಯಂತಾಗಿದೆ. ಈಗಾಗಲೇ ಕಾರ್ಯಾಚರಣೆ ನಿಲ್ಲಿಸಿದ 12 ವಿಮಾನಗಳನ್ನು ಪುನರಾರಂಭಿಸಲು ಹಣದ ಅವಶ್ಯಕತೆಯಿದೆ ಎಂದು ಅಧಿಕಾರಿ ಹೇಳಿದರು. ಏರ್ ಇಂಡಿಯಾ ಸಂಸ್ಥೆಯು ಸುಮಾರು 60,000 ಕೋಟಿ ರೂ.ಗಳಷ್ಟು ಸಾಲದ ವಿಷ ವರ್ತುಲದಲ್ಲಿ ಸಿಲುಕಿದೆ. ಸರ್ಕಾರವು ಇನ್ನೂ ಹೂಡಿಕೆ ಮಾಡುವ ವಿಧಾನಗಳ ಬಗ್ಗೆ ಯೋಚಿಸುತ್ತಿದೆ. ಮುಂದಿನ ವರ್ಷ ಜೂನ್ ವೇಳೆಗೆ ನಿರೀಕ್ಷಿತ ಖರೀದಿದಾರರು ಬರದಿದ್ದರೆ ಏರ್ ಇಂಡಿಯಾ ಜೆಟ್ ಏರ್ವೇಸ್ ಹಾದಿಯಲ್ಲಿ ಸಾಗಲಿದೆ ಎಂದು ಎಚ್ಚರಿಸಿದ್ದಾರೆ.
ಖಾಸಗೀಕರಣದ ಯೋಜನೆಗಳ ಮಧ್ಯೆ ಧನಸಹಾಯ ಮಾಡಲು ಕೇಂದ್ರ ಸರ್ಕಾರ ನಿರಾಕರಿಸಿದೆ. ತೆವಳುತ್ತಾ ಸಾಗುತ್ತಿರುವ ವಿಮಾನಯಾನ ಸಂಸ್ಥೆ ದೀರ್ಘಕಾಲ ಉಳಿಯುವುದು ಅಸಂಭವವಾಗಿದೆ ಎಂದು ಅಧಿಕಾರಿ ಅಸಮಾಧಾನ ವ್ಯಕ್ತಪಡಿಸಿದರು.
ಟಾಟಾ ಸನ್ಸ್ನ ಉದ್ಯಮಿ ಜೆಆರ್ಡಿ ಟಾಟಾ ಅವರು 1932ರಲ್ಲಿ ಟಾಟಾ ಏರ್ಲೈನ್ಸ್ ಸ್ಥಾಪಿಸಿದ್ದರು. ಇವರು ದೇಶದ ಮೊದಲ ಪೈಲಟ್ ಕೂಡ ಹೌದು. ಕರಾಚಿಯಿಂದ ಮುಂಬೈವರೆಗೆ ದೇಶದ ಮೊದಲ ವಿಮಾನ ಹಾರಾಟ ನಡೆಸಿದ್ದ ಹೆಗ್ಗಳಿಕೆಯೂ ಇವರ ಹೆಸರಿನಲ್ಲಿದೆ. ದ್ವಿತೀಯ ಮಹಾಯುದ್ಧದ ಬಳಿಕ ಸಾರ್ವಜನಿಕರಿಂದ ಹಣ ಸಂಗ್ರಹಿಸಿ ಪಬ್ಲಿಕ್ ಲಿಮಿಟೆಡ್ ಕಂಪನಿಯಾಗಿ ಮುಂದೆ ಏರ್ ಇಂಡಿಯಾ ಎಂದು ಬದಲಾಯಿತು. 87 ವರ್ಷ ಆಗಸದಲ್ಲಿ ಮಹಾರಾಜನಂತೆ ಮೆರೆದ ಏರ್ ಇಂಡಿಯಾ ಇನ್ನು ಕೆಲವೇ ತಿಂಗಳಲ್ಲಿ ಮುಚ್ಚುವ ಭೀತಿಯಲ್ಲಿದೆ.
