ನವದೆಹಲಿ: ಪುಣೆಯ ಹಿಂಜೇವಾಡದಲ್ಲಿರುವ ತನ್ನ ಕ್ಯಾಂಪಸ್‌ಗಳಲ್ಲಿ ಒಂದನ್ನು ನಾಲ್ಕು ವಾರಗಳಲ್ಲಿ 450 ಹಾಸಿಗೆಗಳ ಮಧ್ಯಮ ಹಂತದ ಕೋವಿಡ್ -19 ಸೋಂಕಿತರ ಆರೈಕೆಯ ಆಸ್ಪತ್ರೆ ನಿರ್ಮಿಸಲು ಮಹಾರಾಷ್ಟ್ರ ಸರ್ಕಾರ ಜತೆ ಒಪ್ಪಂದ ಮಾಡಿಕೊಂಡಿರುವುದಾಗಿ ಐಟಿ ಕಂಪನಿ ವಿಪ್ರೋ ತಿಳಿಸಿದೆ.
ಈ ಆಸ್ಪತ್ರೆಯನ್ನು ಮೇ 30 ಒಳಗೆ ರಾಜ್ಯ ಸರ್ಕಾರಕ್ಕೆ ಹಸ್ತಾಂತರಿಸಲಾಗುವುದು. ಒಂದು ವರ್ಷದ ನಂತರ ಆಸ್ಪತ್ರೆಯನ್ನು ಮತ್ತೆ ಐಟಿ ಸೌಲಭ್ಯಕ್ಕೆ ಪರಿವರ್ತಿಸಲಾಗುವುದು ಎಂದು ಪ್ರಕಟಣೆಯಲ್ಲಿ ಹೇಳಿದೆ.
450 ಹಾಸಿಗೆಗಳ ಆಸ್ಪತ್ರೆಯಲ್ಲಿ ಮಧ್ಯಮ ಹಂತದ ಪ್ರಕರಣಗಳಿಗೆ ಚಿಕಿತ್ಸೆ ನೀಡಲು ಸಜ್ಜುಗೊಳ್ಳಲಿದ್ದು, ನಿರ್ಣಾಯಕ ರೋಗಿಗಳನ್ನು ತೃತೀಯ ಆರೈಕೆಗೆ ಸ್ಥಳಾಂತರಿಸುವ ಮುನ್ನ 12 ಹಾಸಿಗೆಗಳು ಲಭ್ಯವಿರುತ್ತವೆ ಎಂದಿದೆ.
ಪ್ರತ್ಯೇಕವಾದ ಕೋವಿಡ್-19 ಎಂದು ಮೀಸಲಾದ ಕಟ್ಟಡ ಇದಾಗಿರಲಿದ್ದು, ವೈದ್ಯರು ಮತ್ತು ವೈದ್ಯಕೀಯ ಸಿಬ್ಬಂದಿಗೆ ಸ್ಥಳಾವಕಾಶ ಕಲ್ಪಿಸಲು 24 ಸುಸಜ್ಜಿತ ಕೊಠಡಿಗಳನ್ನು ಸಹ ಒಳಗೊಂಡಿದೆ ಎಂದು ಕಂಪನಿ ತಿಳಿಸಿದೆ.
