ಬೀಜಿಂಗ್: ಅಲಿಬಾಬಾ ಗ್ರೂಪ್ ಸಂಸ್ಥಾಪಕ ಜಾಕ್ ಮಾ ಅವರು ಚೀನಾದ ಇ- ಕಾಮರ್ಸ್ ಉದ್ಯಮದ ಚಿತ್ರಣವನ್ನೇ ಬದಲಾಯಿಸಿದ್ದು, ಈಗ ಬ್ಯಾಂಕಿಂಗ್ ವಲಯದತ್ತ ದೃಷ್ಟಿ ನೆಟ್ಟಿದ್ದಾರೆ.
ಮೈಬ್ಯಾಂಕ್ (MYbank) ಆರಂಭಿಸಿ 2 ಟ್ರಿಲಿಯನ್ ಯುವಾನ್ (₹ 20.02 ಲಕ್ಷ ಕೋಟಿ) ಮೂಲಕ 16 ಮಿಲಿಯನ್ (1.6 ಕೋಟಿ) ಸಣ್ಣ ಉದ್ಯಮಿಗಳಿಗೆ ನೇರವಾಗಿ ಸಾಲ ವಿತರಣೆ ಮಾಡಿದ್ದಾರೆ. ಮಾ ಅವರ ಮೈಬ್ಯಾಂಕ್ನಿಂದ ಚೀನಾದ ಸಣ್ಣ- ಪುಟ್ಟ ಉದ್ಯಮಿಗಳಿಗೆ ಸುಲಭವಾಗಿ ಸಾಲ ಸಿಗುತ್ತಿದ್ದು, ಚೀನಾದ್ಯಂತ ಕಿರು ಉದ್ಯಮದ ಕ್ರಾಂತಿ ನಡೆಯುತ್ತಿದೆ.
ಉದ್ಯಮ ನಡೆಸುವ ಇಚ್ಛೆ ಹೊಂದಿರುವವರು ತಮ್ಮ ಸ್ಮಾರ್ಟ್ಫೋನ್ಲ್ಲಿಯೇ ಸಾಲಕ್ಕೆ ಅರ್ಜಿ ಸಲ್ಲಿಸುವ ಅವಕಾಶವಿದೆ. ಅರ್ಜಿದಾರ ಸಲ್ಲಿಸಿದ್ದ ಎಲ್ಲ ದಾಖಲೆಗಳು ಸರಿಯಾಗಿದ್ದರೆ ಕೆವಲ 3 ನಿಮಿಷಗಳಲ್ಲಿ ಸಾಲ ಲಭ್ಯವಾಗುತ್ತದೆ. ಸಾಲದ ವಸೂಲಾತಿ ಮೊತ್ತ ಸಹ ಉತ್ತವಾಗಿದ್ದು, ಒಟ್ಟು ಸುಸ್ತಿದಾರರ ಪ್ರಮಾಣ ಶೇ. 1ಕ್ಕಿಂತ ಕಡಿಮೆ ಆಗಿದೆ.
ತಂತ್ರಜ್ಞಾನದ ನೆರವಿನಿಂದ ಹಣಕಾಸಿನ ವಹಿವಾಟಿನಲ್ಲಿ ಕ್ಷಿಪ್ರತೆ ಕಂಡುಕೊಂಡು ವಿಶ್ವದಲ್ಲಿಯೇ ಇ-ಪೇಮೆಂಟ್ ಮಾರುಕಟ್ಟೆಯನ್ನು ಚೀನಾ ಅಗಾಧವಾಗಿ ವಿಸ್ತರಿಸಿಕೊಳ್ಳುತ್ತಿದೆ. ಪಾವತಿ ವ್ಯವಸ್ಥೆಯಡಿ ಬರುವ ಸಾಲಗಾರರ ವೈಯಕ್ತಿಕ ದಾಖಲಾತಿಯನ್ನು ಸೋಷಿಯಲ್ ಮೀಡಿಯಾ ಹಾಗೂ ಇತರೆ ಮೀಡಿಯಾಗಳಿಂದ ಸಂಗ್ರಹಿಸುತ್ತಿದೆ. ಈ ಮುಖೇನ ತ್ವರಿತವಾಗಿ ಸಾಲ ವಿತರಿಸಿ ವಿಳಂಬ ಧೋರಣೆಗೆ ಇತಿಶ್ರೀ ಹಾಡುತ್ತಿದೆ.
2015ರಲ್ಲಿ ಆರಂಭಿಸಿದ ಮೈಬ್ಯಾಂಕ್ ಸಾಲ ವಿತರಣೆಗೆ ಸಂಪೂರ್ಣ ಎಐ ಮತ್ತು ಆಟೋಮೇಷನ್‌ ತಂತ್ರಜ್ಞಾನವನ್ನೇ ಬಳಸಿಕೊಂಡಿದ್ದಾರೆ. ಈ ಪ್ರಕ್ರಿಯೆಗೆ ಬ್ಯಾಂಕ್‌ಗಳಲ್ಲಿ ಉದ್ಯೋಗಿಗಳ ಅಗತ್ಯವಿಲ್ಲ. ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನ ಮತ್ತು ಡೇಟಾವನ್ನು ಗರಿಷ್ಠ ಪ್ರಮಾಣದಲ್ಲಿ ಬಳಸಿಕೊಳ್ಳುತ್ತಿದೆ.
ಈ ನಾಲ್ಕು ವರ್ಷಗಳ ಅವಧಿಯಲ್ಲಿ ಸಾಂಪ್ರದಾಯಿಕ ಸಾಲ ವಿತರಣೆಗಿಂತ ಮೈಬ್ಯಾಂಕ್ನಲ್ಲಿ ಸಾಲ ಪಡೆಯುವವರ ಸಂಖ್ಯೆ ನಾಲ್ಕು ಪಟ್ಟು ಹೆಚ್ಚಾಗಿದೆ. ಕಳೆದ ವರ್ಷ 670 ಮಿಲಿಯನ್ ಯುವಾನ್ ಲಾಭ ಗಳಿಸಿದೆ.
