ನವದೆಹಲಿ: ಇತ್ತೀಚೆಗೆ ಭಾರತದಲ್ಲಿ ಬಿಡುಗಡೆಯಾದ ದೇಶೀಯ ವಾರ್ ಗೇಮ್ ಫೌಜಿ ಜಾಗತಿಕ ಮಟ್ಟಕ್ಕೆ ಸಾಗಿದೆ. ಈಗ ಇದು ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ವಿಶ್ವಾದ್ಯಂತ ಡೌನ್ಲೋಡ್ ಮಾಡಲು ಲಭ್ಯವಾಗಲಿದೆ.
ಚೀನಾ ಮೂಲದ ಪಬ್ಜಿಗೆ ಪರ್ಯಾಯವಾಗಿ ಆ್ಯಕ್ಷನ್ ಗೇಮ್ 'ಫಿಯರ್‌ಲೆಸ್ ಮತ್ತು ಯುನೈಟೆಡ್ ಗಾರ್ಡ್ಸ್' ಅಥವಾ ಫೌಜಿಯನ್ನು ಭಾರತದ 72ನೇ ಗಣರಾಜ್ಯೋತ್ಸವದಂದು ಬಿಡುಗಡೆ ಮಾಡಲಾಯಿತು. ಆದರೆ, ಇದು ಆಂಡ್ರಾಯ್ಡ್ ಸಾಧನಗಳಿಗೆ ಮಾತ್ರ ಲಭ್ಯವಿದೆ. ಗೇಮ್ನ ಐಒಎಸ್ ಆವೃತ್ತಿ ಇನ್ನೂ ಬಿಡುಗಡೆಯಾಗಿಲ್ಲ. ಇದು ಐಒಎಸ್ ಬಳಕೆದಾರರಿಗೆ ಯಾವಾಗ ಲಭ್ಯವಾಗಲಿದೆ ಎಂಬುದರ ಕುರಿತು ಪ್ರಸ್ತುತ ಯಾವುದೇ ಸ್ಪಷ್ಟನೆ ಇಲ್ಲ.
ಬೆಂಗಳೂರು ಮೂಲದ ಎನ್‌ಕೋರ್ ಗೇಮ್ಸ್ ಅಭಿವೃದ್ಧಿಪಡಿಸಿದ ಫೌಜಿ ಈಗ ವಿಶ್ವದಾದ್ಯಂತ ಲಭ್ಯವಿದೆ. ಭಾರತದಲ್ಲಿ ಅಭಿವೃದ್ಧಿಪಡಿಸಿದ ಫಿಯರ್ ಫ್ರೀ ಫೌಜಿ ಜಾಗತಿಕವಾಗಿ ಲಗ್ಗೆಯಿಟ್ಟು, ಈಗ ವಿಶ್ವದಾದ್ಯಂತ ಲಭ್ಯವಿದೆ ಎಂದು ಡೆವಲಪರ್ ಟ್ವಿಟರ್‌ನಲ್ಲಿ ತಿಳಿಸಿದ್ದಾರೆ.
ಇದನ್ನೂ ಓದಿ: 15 ರಾಷ್ಟ್ರಗಳಿಗೆ ಕೊರೊನಾ ಲಸಿಕೆ ಪೂರೈಕೆ, ಇನ್ನೂ 25 ದೇಶಗಳಿಂದ ಬೇಡಿಕೆ: ಜೈ ಶಂಕರ್
ಇದರೊಂದಿಗೆ ಮೊಬೈಲ್ ಸ್ಮಾರ್ಟ್‌ಫೋನ್ ಗೇಮ್ ಈಗ ಭಾರತದ ಹೊರಗಿನ ಜನರಿಗೆ ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಡೌನ್ಲೋಡ್ ಮಾಡಲು ಲಭ್ಯವಿರುತ್ತದೆ. ಅವರು ತಮ್ಮ ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ಗಳಲ್ಲಿ ಗೇಮ್ ಅನ್ನು ಡೌನ್ಲೋಡ್ ಮಾಡಬಹುದು.
ಭದ್ರತಾ ನಿಯಮ ಉಲ್ಲಂಘಿಸಿದ ಆಪಾದನೆಯಡಿ ನಿಷೇಧಕ್ಕೆ ಒಳಗಾಗಿರುವ ಚೀನಾ ಮೂಲದ ಜನಪ್ರಿಯ ವಿಡಿಯೋ ಗೇಮಿಂಗ್ ಆ್ಯಪ್ ಪಬ್ಜಿಗೆ ಸೆಡ್ಡು ಹೊಡೆಯಲು ಬಾಲಿವುಡ್ ನಟ ಅಕ್ಷಯ್ ಕುಮಾರ್ ಅವರ ತಂಡ ಅಭಿವೃದ್ಧಿಪಡಿಸಿದೆ.
