ಮುಂಬೈ: ನೀವು ಚಿನ್ನದ ಮೇಲೆ ಹೂಡಿಕೆ ಮಾಡಲು ಬಯಸುವವರಾಗಿದ್ದರೆ 'ಸಾವರಿನ್ ಗೋಲ್ಡ್ ಬಾಂಡ್'ಗಳಲ್ಲಿ ಹಣ ಹೂಡಿಕೆ ಮಾಡಲು ಭಾರತೀಯ ರಿಸರ್ವ್ ಬ್ಯಾಂಕ್(ಆರ್ಬಿಐ) ನಿಮಗೊಂದು ಸುವರ್ಣಾವಕಾಶ ಒದಗಿಸಿದೆ.
ಆರ್ಬಿಐ ಇತ್ತೀಚೆಗೆ ಆರಂಭಿಸಿದ ರೀಟೆಲ್ ಡೈರೆಕ್ಟ್ ಪೋರ್ಟಲ್ನಲ್ಲಿ 'ಸಾವರಿನ್ ಗೋಲ್ಡ್ ಬಾಂಡ್'ಗಳ ಖರೀದಿಗೆ ಅವಕಾಶ ನೀಡಿದೆ. 2021-22ನೇ ಸಾಲಿನ 8ನೇ ಸರಣಿಯ ಸಾವರಿನ್ ಗೋಲ್ಡ್ ಬಾಂಡ್ಗಳನ್ನು ಆರ್ಬಿಐ ಬಿಡುಗಡೆ ಮಾಡಿದೆ. ಡಿಸೆಂಬರ್ 3 ರವರೆಗೆ ಬಾಂಡ್ಗಳ ನೋಂದಣಿ, ಖರೀದಿಗೆ ಮುಕ್ತಗೊಳಿಸಲಾಗಿದೆ.
ಇದು ಆರ್ಬಿಐನ ರಿಟೇಲ್ ಡೈರೆಕ್ಟ್ ಪೋರ್ಟಲ್ನಲ್ಲಿ(https://rbiretaildirect.org.in) ಲಭ್ಯವಿದ್ದು, ಹೂಡಿಕೆದಾರರು ಬಾಂಡ್ಗಳನ್ನು ಖರೀದಿಸಿ ಚಿನ್ನದ ಮೇಲೆ ಹಣವನ್ನು ಹೂಡಿಕೆ ಮಾಡಬಹುದು ಎಂದು ಕೇಂದ್ರ ಬ್ಯಾಂಕ್ ಗುರುವಾರ ತಿಳಿಸಿದೆ.
ಸಾವರಿನ್ ಗೋಲ್ಡ್ ಬಾಂಡ್ ಎಂದರೇನು?
'ಸಾವರಿನ್ ಗೋಲ್ಡ್ ಬಾಂಡ್' ಚಿನ್ನದ ಮೇಲೆ ಹೂಡಿಕೆ ಮಾಡುವ ಮೂಲವಾಗಿದೆ. ನಿಗದಿ ಮಾಡಿದ ದರಗಳ ಬಾಂಡ್ಗಳನ್ನು ಖರೀದಿಸಿ ಅವುಗಳನ್ನು ಚಿನ್ನದ ಮೇಲೆ ಹೂಡಿಕೆ ಮಾಡಬಹುದಾಗಿದೆ.
ಇಲ್ಲಿಯವರೆಗೆ ಸಾವರಿನ್ ಗೋಲ್ಡ್ ಬಾಂಡ್ಗಳನ್ನು ನಿಗದಿತ ಬ್ಯಾಂಕ್ಗಳು(ಸಣ್ಣ ಹಣಕಾಸು ಮತ್ತು ಪಾವತಿ ಬ್ಯಾಂಕ್ ಹೊರತುಪಡಿಸಿ), ಸ್ಟಾಕ್ ಹೋಲ್ಡಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್(SHCIL), ನಿಗದಿತ ಅಂಚೆ ಕಚೇರಿಗಳು ಮತ್ತು ಮಾನ್ಯತೆ ಪಡೆದ ಸ್ಟಾಕ್ ಎಕ್ಸ್‌ಚೇಂಜ್‌ಗಳಾದ ನ್ಯಾಷನಲ್ ಸ್ಟಾಕ್ ಎಕ್ಸ್‌ಚೇಂಜ್ ಆಫ್ ಇಂಡಿಯಾ ಲಿಮಿಟೆಡ್ ಮತ್ತು ಬಾಂಬೆ ಸ್ಟಾಕ್ ಎಕ್ಸ್‌ಚೇಂಜ್ ಮೂಲಕ ಮಾತ್ರ ಮಾರಾಟ ಮಾಡಲಾಗುತ್ತಿತ್ತು.
ಇದನ್ನೂ ಓದಿ: 2022ರ ಜನವರಿಯಿಂದ ಮಾರುತಿ ಸುಜುಕಿ ಕಾರುಗಳ ದರದಲ್ಲಿ ಏರಿಕೆ
ಇದೀಗ ಆರ್ಬಿಐ ರೀಟೆಲ್ ಪೋರ್ಟಲ್ ಅನ್ನು ಹೊಸದಾಗಿ ಆರಂಭಿಸಿದ್ದು, ಪೋರ್ಟಲ್ನಲ್ಲಿ 'ಸಾವರಿನ್ ಗೋಲ್ಡ್ ಬಾಂಡ್'ಗಳ ಖರೀದಿ ಮತ್ತು ನೋಂದಣಿಗೆ ಅವಕಾಶ ನೀಡಿದೆ. ಕಳೆದ ತಿಂಗಳು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಆರ್ಬಿಐ ರಿಟೇಲ್ ಡೈರೆಕ್ಟ್ ಸ್ಕೀಮ್ ಅನ್ನು ಲೋಕಾರ್ಪಣೆ ಮಾಡಿದ್ದರು.
