ನವದೆಹಲಿ : ಪರಾರಿಯಾದ ವಜ್ರದ ಉದ್ಯಮಿ ಮೆಹುಲ್ ಚೋಕ್ಸಿಯನ್ನು ಡೊಮಿನಿಕಾದಿಂದ ಮರಳಿ ಕರೆತರಲು ಭಾರತ ಕಳುಹಿಸಿದ ಕತಾರ್ ಏರ್‌ವೇಸ್‌ನ ಖಾಸಗಿ ಜೆಟ್ ಸುಮಾರು ಏಳು ದಿನಗಳ ನಂತರ ಕೆರಿಬಿಯನ್ ದ್ವೀಪ ದೇಶ ತೊರೆದಿದೆ ಎಂದು ಸಾರ್ವಜನಿಕ ವೈಮಾನಿಕ ಹಾರಾಟದ ಅಂಕಿ-ಅಂಶಗಳು ತಿಳಿಸಿವೆ.
ಕತಾರ್ ಎಕ್ಸಿಕ್ಯೂಟಿವ್ ವಿಮಾನ ಎ7 ಸಿಇಇ ದೆಹಲಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಮೇ 28ರಂದು ಮುಂಜಾನೆ 3.44ಕ್ಕೆ ಚೋಕ್ಸಿ ವಿರುದ್ಧದ ಪ್ರಕರಣಗಳಿಗೆ ಸಂಬಂಧಿಸಿದ ದಾಖಲೆಗಳನ್ನು ಹೊತ್ತುಕೊಂಡು ಸಾಗಿತ್ತು. ಚೋಕ್ಸಿಯ ವಕೀಲರು ಡೊಮಿನಿಕಾ ಹೈಕೋರ್ಟ್ ಮುಂದೆ ಹೇಬಿಯಸ್ ಕಾರ್ಪಸ್ ಅರ್ಜಿ ಸಲ್ಲಿಸಿದ್ದರಿಂದ, ಅದು ಮ್ಯಾಡ್ರಿಡ್ ಮೂಲಕ ಡೊಮಿನಿಕಾದ ಮಾರಿಗೋಟ್‌ಗೆ ಪ್ರಯಾಣಿಸಿತ್ತು.
13,500 ಕೋಟಿ ರೂ. ಪಂಜಾಬ್ ನ್ಯಾಷನಲ್ ಬ್ಯಾಂಕ್ (ಪಿಎನ್‌ಬಿ) ಸಾಲ ಹಗರಣದಲ್ಲಿ ಸಿಲುಕಿರುವ ಚೋಕ್ಸಿಯನ್ನು ಭಾರತಕ್ಕೆ ಕರೆತರಲು ವಿಮಾನವನ್ನು ಸುಮಾರು ಏಳು ದಿನಗಳ ಕಾಲ ಮಾರಿಗೋಟ್‌ನಲ್ಲಿ ನಿಲ್ಲಿಸಲಾಗಿತ್ತು.
ಜೂನ್ 3ರಂದು (ಸ್ಥಳೀಯ ಸಮಯ) ರಾತ್ರಿ 8.09ಕ್ಕೆ ಡೊಮಿನಿಕಾದ ಮೆಲ್ವಿಲ್ಲೆ ಹಾಲ್ ವಿಮಾನ ನಿಲ್ದಾಣದಿಂದ ಜೆಟ್ ಹೊರಟಿತು. ಚೋಕ್ಸಿ ಅವರ ಅರ್ಜಿಯ ವಿಚಾರಣೆಯನ್ನು ಹೈಕೋರ್ಟ್ ಗುರುವಾರ ಮುಂದೂಡಿದ್ದರಿಂದ, ಹಾರಾಟವನ್ನು ತಾತ್ಕಾಲಿಕವಾಗಿ ತಡೆಹಿಡಿಯಲಾಗಿತ್ತು. ಸಾರ್ವಜನಿಕವಾಗಿ ಲಭ್ಯವಿರುವ ವಿಮಾನ ಮಾರ್ಗವು ಜೆಟ್ ಮ್ಯಾಡ್ರಿಡ್ ಕಡೆಗೆ ಪ್ರಯಾಣಿಸುತ್ತಿರುವುದನ್ನು ತೋರಿಸುತ್ತದೆ.
ಚೋಕ್ಸಿಯನ್ನು ಮರಳಿ ಕರೆತರಲು ಹೋದ ತಮ್ಮ ತಂಡಗಳು ವಿಮಾನದಲ್ಲಿ ಮರಳುತ್ತಿದೆಯೇ ಎಂದು ಭಾರತೀಯ ಏಜೆನ್ಸಿಗಳು ಖಚಿತಪಡಿಸಿಲ್ಲ. ನ್ಯಾಯಾಧೀಶ ಬರ್ನಿ ಸ್ಟೀಫನ್ಸನ್ ಅವರು ಎರಡೂ ಕಡೆಯವರನ್ನು ಭೇಟಿಯಾದ ನಂತರ ಚೋಕ್ಸಿ ಪ್ರಕರಣದ ಮುಂದಿನ ವಿಚಾರಣೆಯ ದಿನಾಂಕವನ್ನು ನಿರ್ಧರಿಸಲಿದ್ದಾರೆ ಎಂದು ಆಂಟಿಗುವಾ ನ್ಯೂಸ್ ರೂಮ್ ವರದಿ ಮಾಡಿದೆ.
