ಹೆಣ್ಣಿನ ವಿಷಯಕ್ಕೆ ಹೆಣವಾದ ಮಾಜಿ ಸಿಎಂ ಪುತ್ರ... ರೋಹಿತ್​ ತಿವಾರಿ ಕೊಲೆ ರಹಸ್ಯ ಭೇದಿಸಿದ ಖಾಕಿಪಡೆ!

ಮೇಲ್ನೋಟಕ್ಕೆ ರೋಹಿತ್​​ ಅಕಾಲಿಕ ನಿಧನ ಕೊಲೆ ಎಂದು ತೀರ್ಮಾನಕ್ಕೆ ಬಂದಿದ್ದ ಪೊಲೀಸರು ಮಿಂಚಿನ ಕಾರ್ಯಾಚರಣೆ ನಡೆಸಿ ಈ ಸವಾಲಿನ ಭೇದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಹೆಣ್ಣಿನ ಸಖ್ಯವೇ ತಿವಾರಿ ಕೊಲೆಗೆ ಕಾರಣವೆಂದು ಪೊಲೀಸರು ಷರಾ ಬರೆದಿದ್ದಾರೆ.

ನವದೆಹಲಿ: ಉತ್ತರ ಪ್ರದೇಶ ಹಾಗೂ ಉತ್ತರಾಖಂಡ ರಾಜ್ಯದ ಮಾಜಿ ಸಿಎಂ ಎನ್​.ಡಿ ತಿವಾರಿ ಪುತ್ರ ರೋಹಿತ್ ಶೇಖರ್​ ತಿವಾರಿ ಅಕಾಲಿಕ ನಿಧನ ರಾಷ್ಟ್ರಮಟ್ಟದಲ್ಲಿ ಸಂಚಲನ ಮೂಡಿಸಿತ್ತು.

ಆಸ್ಪತ್ರೆಗೆ ಕರೆತರುವ ವೇಳೆಯೇ ಸಾವನ್ನಪ್ಪಿದ್ದ ರೋಹಿತ್ ಶೇಖರ್​ ನಿಧನ ಪೊಲೀಸರಿಗೆ ಅನುಮಾನ ಮೂಡಿಸಿತ್ತು. ಇದಕ್ಕೆ ಪೂರಕ ಎನ್ನುವಂತೆ ರೋಹಿತ್​ ಸಾವು ಅಸ್ವಾಭಾವಿಕ ಎಂದು ಪೋಸ್ಟ್ ಮಾರ್ಟಮ್ ವರದಿ ಹೇಳಿತ್ತು.

ಮೇಲ್ನೋಟಕ್ಕೆ ಇದು ಕೊಲೆ ಎಂದು ತೀರ್ಮಾನಕ್ಕೆ ಬಂದಿದ್ದ ಪೊಲೀಸರಿಗೆ ಕೊಲೆಗಾರನನ್ನು ಹುಡುಕುವುದೇ ಅತಿದೊಡ್ಡ ಸವಾಲಿನ ಕೆಲಸವಾಗಿತ್ತು. ಸದ್ಯ ಈ ಸವಾಲಿನ ಪ್ರಕರಣವನ್ನು ಖಾಕಿ ಪಡೆ ಪಡೆ ಭೇದಿಸಿ ನಿಟ್ಟುಸಿರು ಬಿಟ್ಟಿದ್ದಾರೆ.

ತಂದೆಯೊಂದಿಗೆ ರೋಹಿತ್​ ಶೇಖರ್​ ತಿವಾರಿ

ಹೆಣ್ಣಿನ ಸ್ನೇಹದಲ್ಲಿ ಹೆಣವಾದ ತಿವಾರಿ..!

ರೋಹಿತ್​ ತಿವಾರಿ ಪತ್ನಿ ಅಪೂರ್ವ ಶುಕ್ಲಾಗೆ ಪತಿಯ ಕೆಲವೊಂದು ವಿಚಾರಗಳು ಕೋಪಗೊಳ್ಳುವಂತೆ ಮಾಡುತ್ತಿತ್ತು. ಸೋದರ ಸಂಬಂಧಿಯ ಪತ್ನಿ ಜೊತೆಗೆ ಅತ್ಯಂತ ನಿಕಟವಾಗಿ ವರ್ತಿಸುವುದು ಇಷ್ಟವಾಗುತ್ತಿರಲಿಲ್ಲ.

ಏಪ್ರಿಲ್​ 10ರಂದು ರೋಹಿತ್​​​, ಮತದಾನ ಮಾಡಲು ಉತ್ತರಾಖಂಡದ ಹಲ್ದ್ವಾನಿಗೆ ಇದೇ ಸೋದರ ಸಂಬಂಧಿಯ ಪತ್ನಿಯ ಜೊತೆಗೆ ತೆರಳಿದ್ದರು. ಹಿಂತಿರುಗುವ ವೇಳೆಯಲ್ಲಿ ಪತ್ನಿ ಅಪೂರ್ವ ಶುಕ್ಲಾ ಪತಿಗೆ ವಿಡಿಯೋ ಕಾಲ್​ ಮಾಡಿದ್ದಳು. ಈ ವೇಳೆ ಪತಿ ಮದ್ಯಪಾನ ಮಾಡುತ್ತಿರುವುದು ಹಾಗೂ ಪತಿ ಹಾಗೂ ಸೋದರ ಸಂಬಂಧಿಯ ಪತ್ನಿ ಒಂದೇ ಗ್ಲಾಸ್​ನಲ್ಲಿ ಮದ್ಯ ಸೇವಿಸುವುದನ್ನು ಗಮನಿಸಿ ಕುಪಿತಳಾಗಿದ್ದಳು.

ಸಂಬಂಧಿತ ಸುದ್ದಿ:

ರಾತ್ರಿ ಹತ್ತರ ವೇಳೆ ರೋಹಿತ್ ಹಾಗೂ ಸೋದರ ಸಂಬಂಧಿಯ ಪತ್ನಿ​ ಮನೆ ತಲುಪುತ್ತಾರೆ. ತಾಯಿ ಉಜ್ವಲಾ ಶರ್ಮಳೊಂದಿಗೆ ಊಟ ಮಾಡಿ ರೋಹಿತ್​​​ ತನ್ನ ರೂಮ್​ಗೆ ತೆರಳುತ್ತಾರೆ. ತಾಯಿ ತಿಲಕ್​ ಲೇನ್ ಬಂಗಲೆಗೆ ಮರಳುತ್ತಾರೆ.

ಮಧ್ಯರಾತ್ರಿ 12.45ರ ವೇಳೆ ಅಪೂರ್ವ ಶುಕ್ಲಾ ಪತಿಯ ರೂಮ್​​ಗೆ ಹೋಗಿ ಒಂದಷ್ಟು ಮಾತಿನ ಚಕಮಕಿ ನಡೆಸುತ್ತಾಳೆ. ಜಗಳದ ವೇಳೆ ಪತ್ನಿ ಶುಕ್ಲಾ ಪತಿಯನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾಳೆ. ಪೋಸ್ಟ್​ ಮಾರ್ಟಮ್​ನಲ್ಲಿ ರಾತ್ರಿ ಒಂದು ಗಂಟೆಯ ಅಸುಪಾಸಿನಲ್ಲಿ ರೋಹಿತ್ ಸಾವನ್ನಪ್ಪಿದ್ದಾರೆ ಎನ್ನುವುದು ಉಲ್ಲೇಖವಾಗಿರುವುದು ಈ ಎಲ್ಲ ಘಟನಾವಳಿಗೆ ಪೂರಕವಾಗಿದೆ ಎಂದು ಹೆಚ್ಚುವರಿ ಪೊಲೀಸ್ ಆಯುಕ್ತ ರಾಜೀವ್ ರಂಜನ್ ಹೇಳಿದ್ದಾರೆ.

ಲಾಯರ್​​ ಬ್ರೈನ್​​ ಎಡವಿದ್ದೆಲ್ಲಿ..?

ರೋಹಿತ್​ ಪತ್ನಿ ಅಪೂರ್ವ ಶುಕ್ಲಾ ಮೂಲತಃ ವಕೀಲೆ. ತನಿಖೆಯ ಆರಂಭದಿಂದಲೂ ತನ್ನ ಲಾಯರ್​​ ಜಾಣ್ಮೆಯನ್ನೇ ತೋರಿಸುತ್ತಾ ಬಂದು ಪೊಲೀಸರ ದಿಕ್ಕು ತಪ್ಪಿಸುವ ಕೆಲಸ ಮಾಡಿದ್ದಳು. ಬರೋಬ್ಬರಿ ನಾಲ್ಕು ದಿನದ ಸತತ ವಿಚಾರಣೆಯ ಫಲವಾಗಿ ಸಂಪೂರ್ಣ ಘಟನಾವಳಿಗಳು ಪೊಲೀಸರಿಗೆ ತಿಳಿದು ಬಂದಿದ್ದು, ಪತ್ನಿಯೇ ತನ್ನ ಪತಿಯನ್ನು ಕೊಲೆ ಮಾಡಿದ್ದು ರುಜುವಾತಾಗಿದೆ.

ಅಪೂರ್ವ ಶುಕ್ಲಾ

ಕೊಲೆ ನಡೆದ ದಿನ ಆ ಮನೆಯಲ್ಲಿ ಆರು ಮಂದಿ ಇದ್ದರು. ಅದರಲ್ಲಿ ಪತ್ನಿ ಅಪೂರ್ವ ಶುಕ್ಲಾ, ಸಹಾಯಕ ಗೋಲು ಹಾಗೂ ಡ್ರೈವರ್​​​​​ ಅಖಿಲೇಶ್​​ಗೆ ಮಾತ್ರ ಮಾತ್ರ ರೋಹಿತ್​​ ಮಲಗುವ ಮೊದಲನೇ ಅಂತಸ್ತಿನಲ್ಲಿರುವ ಕೊಠಡಿಗೆ ಪ್ರವೇಶಿಸುವ ಅನುಮತಿ ಇತ್ತು.

ಹಲವಾರು ಸುತ್ತಿನ ವಿಚಾರಣೆಯಲ್ಲಿ ಗೋಲು ಹಾಗೂ ಅಖಿಲೇಶ್​​ ತಮ್ಮ ಹೇಳಿಕೆಗೆ ಬದ್ಧರಾಗಿಯೇ ಉಳಿದಿದ್ದರು. ಇದು ಪೊಲೀಸರಿಗೆ ಅಪೂರ್ವ ಶುಕ್ಲಾ ಮೇಲೆ ಅನುಮಾನ ಮೂಡವಂತೆ ಮಾಡಿತ್ತು. ಜೊತೆಗೆ ಸಿಸಿಟಿವಿ ದೃಶ್ಯಗಳ ಆಧಾರದಂತೆ ರೋಹಿತ್​ ಸಂಬಂಧಿಗಳು ಆತನ ರೂಮಿಗೆ ಹೋಗಿರಲಿಲ್ಲ.

ಮಾರನೇ ದಿನ 2.30ರ ಸುಮಾರಿಗೆ ಮನೆಗೆ ಬಂದ ರೋಹಿತ್ ತಾಯಿ ಉಜ್ವಲಾ ಶರ್ಮ, ಮಗನ ಬಗ್ಗೆ ವಿಚಾರಿಸುತ್ತಾರೆ. ಈ ವೇಳೆ ಅಪೂರ್ವ, ಆತ ಇನ್ನೂ ಮಲಗಿಯೇ ಇದ್ದಾನೆ ಎಂದು ಹೇಳುತ್ತಾಳೆ. ರೋಹಿತ್​ಗೆ ಇನ್ಸೋಮ್ನಿಯಾ ಇರುವ ವಿಚಾರ ತಿಳಿದಿದ್ದ ಉಜ್ವಲಾ ಶರ್ಮ, ಅಪೂರ್ವ ಮಾತಿನಿಂದ ಸುಮ್ಮನಾಗುತ್ತಾರೆ.

ಸಂಜೆ ನಾಲ್ಕರ ಸುಮಾರಿಗೆ ಓರ್ವ ಮನೆ ಕೆಲಸದವ ರೋಹಿತ್​ ಯಾವುದೇ ರೀತಿಯಾಗಿ ಪ್ರತಿಕ್ರಿಯಿಸುತ್ತಿಲ್ಲ ಮತ್ತು ಮೂಗಿನಲ್ಲಿ ರಕ್ತ ಸೋರುತ್ತಿದೆ ಎಂದು ಉಜ್ವಲಾ ಶರ್ಮಳಿಗೆ ಫೋನ್​​ ಮಾಡುತ್ತಾನೆ. ತಕ್ಷಣವೇ ಆಕೆ ಆ್ಯಂಬುಲೆನ್ಸ್​ ಕರೆತಂದು ರೋಹಿತ್​ನನ್ನು ಆಸ್ಪತ್ರೆಗೆ ಕರೆದೊಯ್ಯುತ್ತಾಳೆ. ಆದರೆ ಅದಾಗಲೇ ರೋಹಿತ್​​ ಅಸುನೀಗಿದ್ದ ಎಂದು ವೈದ್ಯರು ಹೇಳುತ್ತಾರೆ.

ವಿಚಾರಣೆಯಲ್ಲಿ ಅಪೂರ್ವ ವಿಭಿನ್ನ ಹೇಳಿಕೆ:

ವಿಚಾರಣೆ ವೇಳೆ ಅಪೂರ್ವ ಶುಕ್ಲಾ ಪ್ರತೀ ಬಾರಿಯೂ ಹೇಳಿಕೆಯನ್ನೂ ಬದಲಾಯಿಸುತ್ತಲೇ ಇರುತ್ತಿದ್ದಳು. ತಾನು ಆಕಸ್ಮಿಕವಾಗಿ ಪತಿಯನ್ನು ಉಸಿರುಗಟ್ಟಿಸಿದ್ದಾಗಿ ಒಂದು ಬಾರಿ ಹೇಳಿಕೆ ನೀಡಿದ್ದಳು. ಹೇಳಿಕೆಯನ್ನು ಬದಲಿಸುತ್ತಲೇ ಪ್ರಕರಣದಿಂದ ಜಾರಿಕೊಳ್ಳುವ ಪ್ರಯತ್ನ ಮಾಡುತ್ತಿದ್ದಳು. ಕೊಲೆ ಮಾಡಿ ತನ್ನ ರೂಮಿಗೆ ಬಂದಿದ್ದ ಅಪೂರ್ವ, ಆ ರಾತ್ರಿಯಿಡೀ ನಿದ್ದೆಯೇ ಮಾಡಿರಲಿಲ್ಲ.

ವಿಚಾರಣೆಯ ಒಂದು ಹಂತದ ಬಳಿಕ ಅಪೂರ್ವ ಶುಕ್ಲಾ ಕೊಲೆ ಮಾಡಿದ್ದು ಎನ್ನುವುದು ಸ್ಪಷ್ಟವಾಗಿತ್ತು. ಆದರೆ ಕೋರ್ಟ್​ನಲ್ಲಿ ಪ್ರಬಲ ಸಾಕ್ಷ್ಯ ನೀಡುವ ಸಲುವಾಗಿ ನಿಧಾನವಾಗಿ ಎಲ್ಲ ಸಾಕ್ಷ್ಯಗಳನ್ನು ಸಂಗ್ರಹಿಸಿದ್ದೇವೆ ಎಂದು ಪೊಲೀಸ್ ಅಧಿಕಾರಿ ಹೇಳಿದ್ದಾರೆ.

ಈ ಕೊಲೆ ಪೂರ್ವ ಯೋಜಿತವಲ್ಲ, ಆ ಕ್ಷಣದ ಕೋಪದಲ್ಲಿ ನಡೆದ ಒಂದು ಅಚಾತುರ್ಯ ಎನ್ನುವುದು ಮೇಲ್ನೋಟಕ್ಕೆ ತಿಳಿದು ಬಂದಿದೆ ಎಂದು ಹೆಚ್ಚುವರಿ ಪೊಲೀಸ್ ಆಯುಕ್ತ ರಾಜೀವ್ ರಂಜನ್ ಹೇಳಿದ್ದಾರೆ.

ಮುರಿದು ಬಿದ್ದ ರಾಜಕೀಯದ ಆಸೆ, ಹಳಸಿದ ವಿವಾಹ ಸಂಬಂಧ..!

35 ವರ್ಷದ ಅಪೂರ್ವ ಶುಕ್ಲಾ ಮ್ಯಾಟ್ರಿಮೋನಿಯಲ್​ ವೆಬ್​ಸೈಟ್​ನಲ್ಲಿ ರೋಹಿತ್​ನನ್ನು ನೋಡಿರುತ್ತಾಳೆ. ಆತ ಮಾಜಿ ಸಿಎಂ ಪುತ್ರ ಎನ್ನುವುದು ಗೊತ್ತಾದ ಬಳಿಕ ಅಕೆಗೆ ರಾಜಕೀಯದಲ್ಲಿ ಬೆಳೆಯುವ ಆಸೆ ಚಿಗುರಿತ್ತು.

2018ರ ಮಧ್ಯಭಾಗದಲ್ಲಿ ರೋಹಿತ್ ಹಾಗೂ ಅಪೂರ್ವ ಶುಕ್ಲಾ ಮದುವೆಯಾಗಿದ್ದರು. ಮದುವೆಯ ಬಳಿಕ ರೋಹಿತ್​​ ರಾಜಕಾರಣದಲ್ಲಿ ಅಷ್ಟೊಂದು ಪ್ರಭಾವಿಯಲ್ಲ ಎನ್ನುವುದು ಸ್ಪಷ್ಟವಾಗುತ್ತದೆ. ಐಷಾರಾಮಿ ಜೀವನದ ಕನಸಿನಲ್ಲಿದ್ದ ಅಪೂರ್ವ ಹತಾಶೆಗೊಳ್ಳುತ್ತಾಳೆ. ವಿವಾಹವಾದ ಹದಿನೈದೇ ದಿನದಲ್ಲಿ ಇಬ್ಬರೂ ಪ್ರತ್ಯೇಕವಾಗಿ ಜೀವಿಸಲು ಆರಂಭಿಸಿದ್ದರು.

ಅಪೂರ್ವ ಶುಕ್ಲಾ ಹಾಗೂ ರೋಹಿತ್​ ಶೇಖರ್​ ತಿವಾರಿ

ಆಗಸ್ಟ್​ 2018ರಲ್ಲಿ ಅಪೂರ್ವ ತನ್ನ ಪತಿಯೊಂದಿಗೆ ಕಾನೂನು ಹೋರಾಟ ಆರಂಭಿಸಿದ್ದಳು. ರೋಹಿತ್​​ ಉತ್ತಮ ಪತಿಯಲ್ಲ ಎಂದು ನೋಟಿಸ್​ ಕಳುಹಿಸಿದ್ದಳು.

ರೋಹಿತ್​ ಪರ ವಕೀಲ ವೇದಾಂತ ವರ್ಮ ಹೇಳುವಂತೆ ರೋಹಿತ್​​​ ವಿಚ್ಛೇದನಕ್ಕೆ ಮುಂದಾಗಿದ್ದರು. ಆ ಕುರಿತಂತೆ ಮಾತುಕತೆಯೂ ನಡೆದಿತ್ತು ಎಂದು ವೇದಾಂತ ವರ್ಮ ಹೇಳಿದ್ದಾರೆ. ಆದರೆ, ಸೋದರ ಸಂಬಂಧಿ ಪತ್ನಿಯ ಜೊತೆಗೆ ಅಕ್ರಮ ಸಂಬಂಧ ಇತ್ತು ಎನ್ನುವುದನ್ನು ವೇದಾಂತ ವರ್ಮ ತಳ್ಳಿಹಾಕಿದ್ದಾರೆ.

ಅಮ್ಮನ ಆಸ್ತಿ ಹಂಚಿಕೆ ಮುಳ್ಳಾಯಿತಾ..?

ರೋಹಿತ್​ ತಾಯಿ ಉಜ್ವಲಾ ಶರ್ಮ ತನ್ನ ಬಳಿಯಿದ್ದ ಕೋಟ್ಯಂತರ ಬೆಲೆ ಬಾಳುವ ಆಸ್ತಿಯನ್ನು ಮೊದಲನೇ ಗಂಡನಿಂದ ಹುಟ್ಟಿದ ಪುತ್ರ ಸಿದ್ಧಾರ್ಥ್​ಗೆ ಶೇ.40 ಹಾಗೂ ರೋಹಿತ್​​ಗೆ ಶೇ.60 ಎಂದು ಹಂಚಿಕೆ ಮಾಡಿ ವಿಲ್​​ ಬರೆಸಿದ್ದಳು. ಒಂದು ವೇಳೆ ಇಬ್ಬರಲ್ಲಿ ಒಬ್ಬರು ಸಾವನ್ನಪ್ಪಿದರೆ ಮತ್ತೊಬ್ಬ ಪುತ್ರನಿಗೆ ಇಲ್ಲವೇ ತಾಯಿಗೆ ಆಸ್ತಿ ವರ್ಗಾವಣೆಯಾಗುತ್ತದೆ ಎಂದು ಉಯಿಲಿನಲ್ಲಿತ್ತು.

ವಿಲ್​ ಪ್ರಕಾರ ಆಸ್ತಿ ಹಂಚಿಕೆಯಲ್ಲಿ ಅಪೂರ್ವ ಶುಕ್ಲಾಗೆ ಯಾವುದೇ ಪಾಲು ಇರಲಿಲ್ಲ. ತನ್ನ ಆಸ್ತಿಯ ಪಾಲನ್ನು ಒಂಭತ್ತು ವರ್ಷದ ಮಗನಿಗೆ ಹಸ್ತಾಂತರಿಸುವುದಾಗಿ ರೋಹಿತ್​​ ಹೇಳಿಕೊಂಡಿದ್ದರು. ಈ ವಿಚಾರ ಅಪೂರ್ವಾಳಿಗೆ ಕೋಪ ತರಿಸಿತ್ತು ಎಂದು ಪೊಲೀಸ್​ ಅಧಿಕಾರಿ ತಿಳಿಸಿದ್ದಾರೆ.

ಉಜ್ವಲಾ ಶರ್ಮ ಹಾಗೂ ಎನ್​.ಡಿ.ತಿವಾರಿ

ಆಸ್ತಿ ಹಂಚಿಕೆಯಲ್ಲಿ ಸೇ.40ರಷ್ಟು ಪಾಲು ಪಡೆದಿದ್ದ ಸಿದ್ದಾರ್ಥ್​ ಪತ್ನಿಯೊಂದಿಗೆ ರೋಹಿತ್​​ ನಿಕಟ ಬಾಂಧವ್ಯ ಹೊಂದಿದ್ದರು.ಕೊಲೆಗೆ ಆಸ್ತಿ ಹಂಚಿಕೆ ಕಾರಣ ಎನ್ನುವುದು ಕಾರಣವಾಗಿ ಕಾಣಿಸುತ್ತಿಲ್ಲ. ರೋಹಿತ್​ ವಾಸವಿದ್ದ ಮನೆಯೂ ಆತನ ತಾಯಿಯ ಹೆಸರಲ್ಲಿತ್ತು ಎಂದು ರೋಹಿತ್​ ಪರ ವಕೀಲ ವೇದಾಂತ ವರ್ಮ ಹೇಳಿದ್ದಾರೆ.

ಒಟ್ಟಿನಲ್ಲಿ ಕಳೆದೊಂದು ವಾರದಿಂದ ಪೊಲೀಸರಿಗೆ ಕಗ್ಗಂಟಾಗಿದ್ದ ಹೈಪ್ರೊಫೈಲ್​ ಕೇಸ್​ ಬಗೆಹರಿದಿದೆ. ಕೊಲೆ ಮಾಡಿದ ತಪ್ಪಿಗೆ ಅಪೂರ್ವ ಶುಕ್ಲಾ ಜೈಲು ಸೇರಿದ್ದಾಳೆ. ಹಲವು ತಿರುವು ಹಾಗೂ ರೋಚಕತೆಯಿಂದ ಕೂಡಿದ್ದ ಈ ಪ್ರಕರಣ ಮುಂದಿನ ದಿನಗಳಲ್ಲಿ ಥ್ರಿಲ್ಲರ್​ ಸಿನಿಮಾಗಳಿಗೆ ಸ್ಫೂರ್ತಿಯಾದರೆ ಅಚ್ಚರಿಯಿಲ್ಲ.