ಬೆಂಗಳೂರು: ಆರ್ಸಿಬಿಯಿಂದ ಹೊರಬಿದ್ದು ಪಂಜಾಬ್ ತಂಡ ಸೇರಿರುವ ಕ್ರಿಸ್ ಗೇಲ್,ರಾಹುಲ್,ಮಯಾಂಕ್ ಸೇರಿ ಐವರು ಮಾಜಿ ಆರ್ಸಿಬಿ ಆಟಗಾರರಿರುವ ಪಂಜಾಬ್ ಇಂದು ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಕೊಹ್ಲಿ ಬಳಗವನ್ನು ಎದುರಿಸುತ್ತಿದೆ.
ಈ ಹಿಂದಿನ ಸೀಸನ್‌ಗಳಲ್ಲಿ ಆರ್ಸಿಬಿ ತಂಡದಲ್ಲೇ ಆಡಿರುವ ಕ್ರಿಸ್ಗೇಲ್ ಸೇರಿದಂತೆ ಕೆ.ಎಲ್. ರಾಹುಲ್, ಮಯಾಂಕ್ ಅಗರ್ವಾಲ್, ಕರುಣ್ ನಾಯರ್, ಸರ್ಫರಾಜ್ ಖಾನ್,ಮಂದೀಪ್ ಸಿಂಗ್ ಹಾಗು ಮುರುಗನ್ ಅಶ್ವಿನ್ ಇವತ್ತು ತಮ್ಮ ತವರು ತಂಡದ ವಿರುದ್ಧವೇ ಹೋರಾಟ ನಡೆಸಲಿದ್ದಾರೆ. ಅದರಲ್ಲೂ ಗೇಲ್, ರಾಹುಲ್ ಆರ್ಸಿಬಿಯಲ್ಲಿ ಅದ್ಭುತ ಪ್ರದರ್ಶನ ತೋರಿದ ಆಟಗಾರರಾಗಿದ್ದು, ಇವತ್ತೂ ಕೂಡ ರನ್ ಹೊಳೆ ಹರಿಸುತ್ತಾರಾ ಎನ್ನುವುದು ಅಭಿಮಾನಿಗಳ ನಿರೀಕ್ಷೆಯಾಗಿದೆ.
ಈ ಆವೃತ್ತಿಯ 10 ಪಂದ್ಯಗಳಲ್ಲಿ 5 ಜಯ ಮತ್ತು 5 ಬಾರಿ ಸೋಲು ಕಂಡಿರುವ ಪಂಜಾಬ್ಗೆ ಪ್ಲೇ ಆಫ್ ತಲುಪಲು ಈ ಗೆಲುವು ಅತ್ಯಗತ್ಯವಾಗಿದೆ. ಹಾಗಾಗಿ ಆರ್ಸಿಬಿ ವಿರುದ್ಧ ಸಂಘಟಿತ ಯೋಜನೆ ರೂಪಿಸಿರುವ ಪಂಜಾಬ್, ಗೆಲುವಿಗಾಗಿ ಅಬ್ಬರದ ಆಟಕ್ಕೆ ಮುಂದಾಗುವ ಸಾಧ್ಯತೆ ಇದೆ.
ರಾಹುಲ್-ಗೇಲ್ ಜೋಡಿಗೆ ಈ ಪಿಚ್ನಲ್ಲಿ ಆಡಿದ ಅನುಭವ ಬೆನ್ನಿಗಿದ್ದು, ಆರ್ಸಿಬಿಗೆ ಈ ಜೋಡಿ ತಲೆನೋವಾಗಿ ಕಾಡುವ ಸಾಧ್ಯತೆ ದಟ್ಟವಾಗಿದೆ. ಆದರೆ, ಇವರಿಬ್ಬರನ್ನು ಹೊರತುಪಡಿಸಿ ಉಳಿದ ಆಟಗಾರರು ನಿರೀಕ್ಷಿತ ಪ್ರದರ್ಶನ ತೋರದಿರುವ ಕಾರಣಕ್ಕೆ ಪಂಜಾಬ್ ಕೆಲವು ಪಂದ್ಯಗಳನ್ನು ಕಳೆದುಕೊಳ್ಳಬೇಕಾಯಿತು. ಇದು ಆರ್ ಅಶ್ವಿನ್ ಬಳಗದ ಮೈನಸ್‌ ಪಾಯಿಂಟ್‌.
ಕಳೆದ ಪಂದ್ಯದಲ್ಲಿ ಸಿಎಸ್ಕೆ ವಿರುದ್ಧ 1 ರನ್ನಿಂದ ಗೆಲುವು ಸಾಧಿಸಿರುವ ಆರ್ಸಿಬಿಗೆ ಪ್ಲೇ ಆಫ್ ತಲುಪಬೇಕಾದರೆ ಮುಂದಿನ ಎಲ್ಲಾ ಪಂದ್ಯಗಳನ್ನು ಗೆಲ್ಲಬೇಕಿದೆ. ಅಷ್ಟೇ ಅಲ್ಲ, ರಾಜಸ್ಥಾನ, ಕೆಕೆಆರ್, ಎಸ್ಆರ್ಹೆಚ್ ಹಾಗೂ ಪಂಜಾಬ್ ತಂಡಗಳೂ ಉಳಿದಿರುವ 4 ಪಂದ್ಯಗಳಲ್ಲಿ ಸೋಲುವುದನ್ನೇ ನಿರೀಕ್ಷಿಸಬೇಕು.
ಡೇಲ್ ಸ್ಟೈನ್ ತಂಡ ಸೇರಿದ ಬಳಿಕ ಆರ್ಸಿಬಿ ಬೌಲಿಂಗ್ ವಿಭಾಗದಲ್ಲಿ ಮಹತ್ತರ ಬದಲಾವಣೆಯಾಗಿದೆ. ನವದೀಪ್ ಸೈನಿ ಕೂಡ ಉತ್ತಮ ಬೌಲಿಂಗ್ ಪ್ರದರ್ಶನ ತೋರುತ್ತಿದ್ದಾರೆ. ಬ್ಯಾಟಿಂಗ್ನಲ್ಲಿ ಕೊಹ್ಲಿ,ಎಬಿಡಿ, ಪಾರ್ಥಿವ್ ಹಾಗೂ ಮೊಯಿನ್ ಅಲಿ ಉತ್ತಮ ಪ್ರದರ್ಶನ ಮುಂದುವರೆಸಿದರೆ ಪಂಜಾಬ್ ವಿರುದ್ಧ ಗೆಲುವು ಕಷ್ಟವೇನಲ್ಲ.
ಮುಖಾಮುಖಿ:
ಎರಡು ತಂಡಗಳು 23 ಬಾರಿ ಮುಖಾಮುಖಿಯಾಗಿದ್ದು, ಆರ್ಸಿಬಿ 11 ಪಂಜಾಬ್ 12 ಪಂದ್ಯಗಳಲ್ಲಿ ಜಯ ಸಾಧಿಸಿವೆ. ಚಿನ್ನಸ್ವಾಮಿ ಮೈದಾನದಲ್ಲಿ 10 ಬಾರಿ ಮುಖಾಮುಖಿಯಾಗಿದ್ದು, ಎರಡು ತಂಡಗಳು ತಲಾ 5 ಗೆಲುವು ದಾಖಲಿಸಿವೆ.
ಆರ್ಸಿಬಿ: (ಸಂಭಾವ್ಯ ತಂಡ)
ಮೊಯಿನ್ ಅಲಿ, ಪಾರ್ಥಿವ್ ಪಟೇಲ್, ವಿರಾಟ್ ಕೊಹ್ಲಿ(ನಾಯಕ), ಎಬಿ ಡಿವಿಲಿಯರ್ಸ್, ಮಾರ್ಕಸ್ ಸ್ಟೊಯಿನಿಸ್, ಅಕ್ಷ್ದೀಪ್ ನಾಥ್, ಪವನ್ ನೇಗಿ, ಡೇಲ್ ಸ್ಟೇನ್, ನವದೀಪ್ ಸೈನಿ, ಯಜುವೇಂದ್ರ ಚಹಾಲ್, ಮೊಹಮ್ಮದ್ ಸಿರಾಜ್
ಕಿಂಗ್ಸ್ ಇಲೆವೆನ್ ಪಂಜಾಬ್:( ಸಂಭಾವ್ಯ ತಂಡ)
ಆರ್.ಆಶ್ವಿನ್(ನಾಯಕ),ಕ್ರಿಸ್ ಗೇಲ್, ಮಯಾಂಕ್ ಅಗರ್ವಾಲ್,ಕೆ.ಎಲ್ ರಾಹುಲ್, ಮಂದೀಪ್ ಸಿಂಗ್,ಮುಜೀಬ್ ಉರ್ ರೆಹಮಾನ್/ ಸಾಮ್ ಕರ್ರನ್, ನಿಕೋಲಸ್ ಪೂರನ್, ಸರ್ಫರಾಜ್ ಖಾನ್,ಮೊಹಮ್ಮದ್ ಶಮಿ, ಆ್ಯಂಡ್ರ್ಯೂ ಟೈ, ಅಂಕಿತ್ ರಜಪೂತ್
