ಮಂಡ್ಯ : ಲೋಕಸಭಾ ಚುನಾವಣೆಯಲ್ಲಿ ಮೈತ್ರಿ ಸರ್ಕಾರದ ಅಭ್ಯರ್ಥಿ ನಿಖಿಲ್‌ಕುಮಾರಸ್ವಾಮಿ ಅವರಿಗೆ ಮಂಡ್ಯದ ಸ್ವಾಭಿಮಾನದ ಜನ ತಕ್ಕ ಉತ್ತರ ನೀಡಿದ್ದೇವೆ. ದುರಹಂಕಾರದಿಂದ ಮಾತನಾಡುತ್ತಿದ್ದ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರಿಗೆ ಚಾಲೆಂಜಿಂಗ್ ಸ್ಟಾರ್, ಡಿ-ಬಾಸ್ ಯಾರು ಎಂದು ತೋರಿಸಿದ್ದೇವೆ ಎಂದು ಅಂಬಿ ಅಭಿಮಾನಿಗಳು ಸುಮಲತಾ ಪರ ಘೋಷಣೆ ಕೂಗಿದರು.
ಅಂಬಿ 6ನೇ ತಿಂಗಳ ಪುಣ್ಯಸ್ಮರಣೆ ಪ್ರಯುಕ್ತ ಮಂಡ್ಯದಿಂದ ಸಾವಿರಾರು ಅಭಿಮಾನಿಗಳು ಅವರ ಸಮಾದಿ ಬಳಿ ವಿಜಯೋತ್ಸವ ಆಚರಿಸಿದರು. ಅಲ್ಲದೆ ಆಟೋ ಮೇಲೆ ಅಂಬಿ ಅವರ ಪೋಟೋ ಇಟ್ಟು ಪೂಜೆ ಮಾಡಿ ಮೆರವಣಿಗೆಯೊಂದಿಗೆ ಮಂಡ್ಯದಿಂದ ಬೆಂಗಳೂರಿಗೆ ಬಂದಿದ್ದರು.
ಚುನಾವಣೆ ಪ್ರಚಾರದ ವೇಳೆ ನಟ ಅಂಬಿ ಅವರ ಕೊಡುಗೆ ಮಂಡ್ಯಕ್ಕೆ ಏನಿದೆ ಎಂದು ವ್ಯಂಗ್ಯವಾಡಿದವರಿಗೆ ಈಗ ಅಂಬಿ ಏನು ಮಾಡಿದ್ದಾರೆ ಎಂದು ಗೊತ್ತಾಗಿದೆ. ದೇವೇಗೌಡರ ಕುಟುಂಬದ ಯಾರಾದರೂ ಬಂದು ಮಂಡ್ಯದಲ್ಲಿ ಸ್ಪರ್ಧಿಸಿ ಗೆಲ್ಲಲಿ ನೋಡೋಣ ಎಂದು ಅಭಿಮಾನಿಯೊಬ್ಬರು ಆಕ್ರೋಶ ವ್ಯಕ್ತಪಡಿಸಿದರು. ನಟ ದರ್ಶನ, ಯಶ್ ಅವರಿಗೆ ಜೈಕಾರ ಹಾಕಿದರು. ಅವರ ಬೆಂಬಲಕ್ಕೆ ಹೃದಯಪೂರ್ವಕ ನಮನಗಳನ್ನು ಅಭಿಮಾನಿಗಳು ತಿಳಿಸಿದರು.
