ಮುಂಬೈ: ಇದುವರೆಗೂ ಐಪಿಎಲ್ನಲ್ಲಿ ಹ್ಯಾಟ್ರಿಕ್ ಪ್ರಶಸ್ತಿ ಜಯಿಸಿಲ್ಲ. ಆದರೆ ಒಬ್ಬ ಆಟಗಾರ ಮಾತ್ರ ಸತತ ಮೂರು ಸಲ ಐಪಿಎಲ್ ಚಾಂಪಿಯನ್ ಆಗಿದ್ದಾರೆ.
ಹೌದು, ಕರ್ನ್ ಶರ್ಮಾ ಸತತ ಮೂರು ಬಾರಿ ಪ್ರಶಸ್ತಿ ಜಯಿಸಿದ್ದಾರೆ. 2016ರಲ್ಲಿ ಚಾಂಪಿಯನ್ ಆಗಿದ್ದ ಸನ್ರೈಸರ್ಸ್ ಹೈದರಾಬಾದ್ ತಂಡದಲ್ಲಿ ಕರ್ನ್ ಆಲ್ರೌಂಡರ್ ಆಗಿ ಆಡಿದ್ದರು. ನಂತರ 2017ರಲ್ಲಿ ಸನ್ ರೈಸರ್ಸ್ ತಂಡ ಕರ್ನ್ ಶರ್ಮಾರನ್ನು ಕೈಬಿಟ್ಟಿತ್ತು. ನಂತರ ಮುಂಬೈ ಇಂಡಿಯನ್ಸ್ ತಂಡದ ಪರ 2017ರಲ್ಲಿ ಆಡಿದ್ದರು. ಆ ವರ್ಷ ಮುಂಬೈ ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಿತ್ತು. 2018ರಲ್ಲಿ ಮತ್ತೆ ಕೇವಲ 3 ಆಟಗಾರರಿಗೆ ಮಾತ್ರ ರೀಟೈನ್ ಮಾಡಿಕೊಳ್ಳುವ ಅವಕಾಶವಿದ್ದ ಕಾರಣ ಮುಂಬೈ ತಂಡವೂ ಕೂಡ ಶರ್ಮಾರನ್ನು ಕೈಬಿಟ್ಟಿತ್ತು.
2018ರ ಹರಾಜಿನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 5 ಕೋಟಿ ನೀಡಿ ಕರ್ನ್ ಶರ್ಮಾರನ್ನು ಖರೀದಿಸಿತ್ತು. ಕರ್ನ್ ಅದೃಷ್ಟ ಎಂಬಂತೆ ಚೆನ್ನೈ ತಂಡ 2018ರ ಚಾಂಪಿಯನ್ ಆಗುವ ಮೂಲಕ ಕರ್ನ್ ಸತತ ಮೂರನೇ ವರ್ಷ ಚಾಂಪಿಯನ್ ಆದ ತಂಡದ ಭಾಗವಾಗುವ ಮೂಲಕ ಹ್ಯಾಟ್ರಿಕ್ ಪ್ರಶಸ್ತಿ ಪಡೆದ ಏಕೈಕ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದಾರೆ.
ಕಳೆದ ಬಾರಿ ಐಪಿಲ್ನಲ್ಲಿ ಎಲ್ಲಾ ಪಂದ್ಯಗಳಲ್ಲಿ ಆಡುವ ಅವಕಾಶವನ್ನು ಶರ್ಮಾ ಕಳೆದುಕೊಂಡಿದ್ದರು. ಧೋನಿಯ ಚಾಣಾಕ್ಷ ನಾಯಕತ್ವದಿಂದ ಹರಭಜನ್ ಹಾಗೂ ಕರ್ನ್ ಇಬ್ಬರನ್ನು ರೋಟೇಶನ್ ಮಾದರಿಯಲ್ಲಿ ಆಡಿಸಿ, ತಂಡದ ಸಮತೋಲನ ಕಾಪಾಡಿಕೊಂಡಿದ್ದರು. ರೋಟೇಶನ್ ಮಾದರಿ ಫೈನಲ್ ಪಂದ್ಯದಲ್ಲಿ ಯಶಸ್ವಿಯಾಯಿತು. ಕರ್ನ್ ಶರ್ಮಾ ಪೈನಲ್ ಪಂದ್ಯದಲ್ಲಿ ವಿಲಿಯಮ್ಸನ್ ವಿಕೆಟ್ ಪಡೆಯುವ ಮೂಲಕ ಚೆನ್ನೈಗೆ ಮೇಲುಗೈ ಒದಗಿಸಿಕೊಟ್ಟಿದ್ದರು.
ಒಟ್ಟಿನಲ್ಲಿ ಅಲೆಮಾರಿ ರೀತಿಯಲ್ಲಿ ಮೂರು ವರ್ಷ ಮೂರು ತಂಡಗಳ ಪರ ಆಡಿದ್ದು, ಮೂರು ತಂಡಗಳು ಚಾಂಪಿಯನ್ ಆಗಿವೆ, ಈ ವರ್ಷ ಕರ್ನ್ರನ್ನು ಚೈನ್ನೈ ತಂಡ ರೀಟೈನ್ ಮಾಡಿಕೊಂಡಿದ್ದು ಸತತ ನಾಲ್ಕನೇ ಪ್ರಶಸ್ತಿ ಎತ್ತಿ ಹಿಡಿಯಲಿದ್ದಾರಾ ಎಂದು ಕಾದು ನೋಡಬೇಕಿದೆ.
