ಬೆಂಗಳೂರು: 'ಕರ್ನಾಟಕದ ಸಿಂಗಂ' ಖ್ಯಾತಿಯ ಅಣ್ಣಾಮಲೈ ಐಪಿಎಸ್ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ವಯಕ್ತಿಕ ಜೀವನಕ್ಕೆ ಸಮಯ ಕೊಡುವ ಕಾರಣದಿಂದ ರಾಜೀನಾಮೆ ನೀಡಿರುವುದಾಗಿ ಈಗಾಗಲೇ ಅವರು ತಮ್ಮ ರಾಜೀನಾಮೆ ಪತ್ರದಲ್ಲಿ ತಿಳಿಸಿದ್ದು, ಈ ಮಧ್ಯೆ ಅಣ್ಣಾಮಲೈ ಅಭಿಮಾನಿಗಳಿಗೆ ಭಾವನಾತ್ಮಕ ಪತ್ರ ಬರೆದಿದ್ದಾರೆ.
ಅಣ್ಣಾಮಲೈ ಪತ್ರ ಸಾರಾಂಶ:
ನಿಮ್ಮೆಲ್ಲರಿಗೂ ಶುಭಾಶಯಗಳು. ನಾನು ರಾಜೀನಾಮೆ ನೀಡಿರುವ ವಿಷಯಕ್ಕೆ ಸಂಬಂಧಿಸಿದಂತೆ ಇತ್ತೀಚಿಗೆ ಪ್ರಕಟಗೊಳ್ಳುತ್ತಿರುವ ಸುದ್ದಿಗಳ ಹಿನ್ನೆಲೆಯಲ್ಲಿ ನಾನು ಈ ಪತ್ರ ಬರೆಯುತ್ತಿರುವೆ. ಮೇ 28ರ 2019ರಂದು ನಾನು ಪೊಲೀಸ್ ಸೇವೆಗೆ ರಾಜೀನಾಮೆ ಸಲ್ಲಿಕೆ ಮಾಡಿರುವೆ. ಈ ಪ್ರಕ್ರಿಯೆ ಮುಕ್ತಾಯಗೊಳ್ಳಲು ಇನ್ನು ಕೆಲದಿನಗಳ ಕಾಲಾವಕಾಶ ಬೇಕು. ಇದರ ಮಧ್ಯೆ ಹರಡಿರುವ ಕೆಲವು ಊಹಾಪೋಹಗಳಿಗೆ ನಾನು ನೇರವಾಗಿ ಉತ್ತರ ನೀಡಿರುವೆ.
ನಾನು ಸೇವೆ ಸಲ್ಲಿಸುತ್ತಿದ್ದ ಪೊಲೀಸ್ ಇಲಾಖೆಗೆ ದಿಢೀರ್ ಆಗಿ ರಾಜೀನಾಮೆ ನೀಡಿಲ್ಲ.ಕಳೆದ ಆರು ತಿಂಗಳಿಂದ ಯೋಚನೆ ಮಾಡಿ ಈ ನಿರ್ಧಾರ ಕೈಗೊಂಡಿರುವೆ. ಕಳೆದ 9 ವರ್ಷಗಳಿಂದ ಖಾಕಿ ಬಟ್ಟೆ ಹಾಕಿಕೊಂಡು ಸೇವೆ ಸಲ್ಲಿಸಿರುವೆ. ಖಾಕಿ ಸೇವೆಯ ಪ್ರತಿಕ್ಷಣವನ್ನೂ ಆನಂದಿಸಿರುವೆ. ಖಾಕಿ ಜತೆ ಬದುಕಿರುವೆ. ಈ ಅವಧಿಯಲ್ಲಿ ನಾನು ಅನೇಕ ವಯಕ್ತಿಕ ಸಭೆ, ಸಮಾರಂಭ, ಕೆಲವೊಮ್ಮೆ ಕುಟುಂಬದ ಸಮಾರಂಭಗಳಲ್ಲೂ ಭಾಗಿಯಾಗಲು ಆಗಿಲ್ಲ. ತುಂಬಾ ಹತ್ತಿರದವರು ನಿಧನವಾದಾಗ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲೂ ಆಗಲಿಲ್ಲ. ಅದಕ್ಕೆ ನನಗೆ ಈಗಲೂ ಬೇಸರವಿದೆ. ಪೊಲೀಸ್ ಕೆಲಸ ದೇವರಿಗೆ ಸಮವಾದದ್ದು. ಕೆಲವೊಮ್ಮೆ ತೀವ್ರ ಒತ್ತಡಕ್ಕೂ ಒಳಗಾಗಿದ್ದು,ಅವುಗಳನ್ನ ಸರಿಯಾಗಿ ನಿಭಾಯಿಸಿರುವೆ. ಕಷ್ಟದಲ್ಲಿದ್ದಾಗ ಅನೇಕರು ಸಹಾಯ ಮಾಡಿದ್ದಾರೆ.
9 ವರ್ಷಗಳ ಪೊಲೀಸ್ ಸೇವೆಗೆ ಫುಲ್ ಸ್ಟಾಪ್, ರಾಜೀನಾಮೆಗೆ ಕಾರಣ ತಿಳಿಸಿದ್ರು ಅಣ್ಣಾಮಲೈ
ಕಳೆದ ವರ್ಷ ಕೈಗೊಂಡಿದ್ದ ಕೈಲಾಸ ಮಾನಸ ಸರೋವರ ಭೇಟಿ ನನ್ನ ಜೀವನದ ಆದ್ಯತೆ ಉತ್ತಮಗೊಳಿಸಲು ಸಹಾಯ ಮಾಡಿತ್ತು. ಮಧುಕರ್ ಶೆಟ್ಟಿ ಸರ್ ಸಾವು ನನಗೆ ನನ್ನ ಜೀವನದ ಬಗ್ಗೆ ಯೋಚಿಸಲು ಸಹಾಯ ಮಾಡಿತ್ತು. ಎಲ್ಲಾ ಒಳ್ಳೆಯ ಕ್ಷಣಗಳು ಕೊನೆಗೊಳ್ಳಲೇಬೇಕು. ಹೀಗಾಗಿ ಖಾಕಿಯಲ್ಲಿನ ನನ್ನ ದಿನಕ್ಕೆ ವಿದಾಯ ಹೇಳಲು ನಿರ್ಧರಿಸಿರುವೆ ಎಂದು ಬರೆದುಕೊಂಡಿದ್ದಾರೆ. ಲೋಕಸಭೆ ಚುನಾವಣೆಗೆ ಮೊದಲೇ ರಾಜೀನಾಮೆ ನೀಡಲು ಮುಂದಾಗಿದ್ದೆ. ಆದರೆ ಈ ವೇಳೆ ಸರ್ಕಾರಕ್ಕೆ ಅನಾನುಕೂಲ ಆಗುವ ಕಾರಣದಿಂದಾಗಿ ಸ್ವಲ್ಪ ಕಾಲ ಮುಂದೂಡಿಕೆ ಮಾಡಿರುವೆ. ನನ್ನ ರಾಜೀನಾಮೆ ಕೆಲವೊಬ್ಬರಿಗೆ ನೋವುಂಟು ಮಾಡಿದ್ದರೆ ಅದಕ್ಕೆ ಕ್ಷಮೆ ಇರಲಿ ಎಂದು ತಿಳಿಸಿದ್ದಾರೆ.
ಮುಂದಿನ ನಡೆ ಏನು?
ಸದ್ಯ ಯಾವುದೇ ನಿರ್ಧಾರ ಕೈಗೊಂಡಿಲ್ಲ. ಈಗಾಗಲೇ ಜೀವನದಲ್ಲಿ ಕಳೆದುಕೊಂಡಿರುವ ಸಂತೋಷದ ಕ್ಷಣ ಅನುಭವಿಸಲು ಇಷ್ಟಪಡುವೆ. ಸದ್ಯ ಸ್ವಲ್ಪ ವಿರಾಮ ಪಡೆದುಕೊಳ್ಳುವೆ. ನನ್ನ ಮಗನಿಗೆ ಒಳ್ಳೆಯ ತಂದೆಯಾಗಲು ಬಯಸಿದ್ದೇನೆ. ಆತನ ಪ್ರತಿಯೊಂದು ಬೆಳವಣಿಗೆಗಳನ್ನು ನೋಡಬೇಕು ಎಂದುಕೊಂಡಿದ್ದೇನೆ. ಕಾರ್ಕಳ, ಉಡುಪಿ, ಚಿಕ್ಕಮಗಳೂರು ಹಾಗೂ ಬೆಂಗಳೂರಿನ ಜನರಿಗೆ ನನ್ನ ಧನ್ಯವಾದಗಳು ಎಂದು ತಿಳಿಸಿದ್ದಾರೆ.
