ಮ್ಯಾಂಚೆಸ್ಟರ್: ಭಾರತ-ಪಾಕಿಸ್ತಾನ ಇಂದು 12ನೇ ಆವೃತ್ತಿಯ ವಿಶ್ವಕಪ್ ಲೀಗ್ನಲ್ಲಿ ಮುಖಾಮುಖಿಯಾಗುತ್ತಿವೆ. ಈ ಪಂದ್ಯ ಕ್ರಿಕೆಟ್ ಜಗತ್ತಿನಲ್ಲಿ ಅತಿ ಹೆಚ್ಚು ವೀಕ್ಷಣೆಯಾಗುವ ಪಂದ್ಯ ಎಂಬ ದಾಖಲೆಗೆ ಪಾತ್ರವಾಗಲಿದೆ ಎನ್ನಲಾಗುತ್ತಿದೆ.
ಮ್ಯಾಂಚೆಸ್ಟರ್ನ ಓಲ್ಡ್ ಟ್ರಾಫೋರ್ಡ್ನಲ್ಲಿ ಈ ಪಂದ್ಯ ನಡೆಯುತ್ತಿದ್ದು, ಇಲ್ಲಿ 21 ಸಾವಿರ ಆಸನದ ವ್ಯವಸ್ಥೆಯಿದೆ. ಆದರೆ ಟಿಕೆಟ್ಗಾಗಿ ಆನ್ಲೈನ್ನಲ್ಲಿ 8 ಲಕ್ಷ ಜನರು ಅಪ್ಲಿಕೇಶನ್ ಹಾಕಿದ್ದರಂತೆ. ಆದರೆ ಈ ಹೈವೋಲ್ಟೇಜ್ ಪಂದ್ಯದ ಟಿಕೆಟ್ ಕೇವಲ 48 ಗಂಟೆಗಳಲ್ಲಿ ಮಾರಾಟವಾಗಿ ಇತಿಹಾಸ ಸೃಷ್ಠಿಸಿತ್ತು.
ಟಿವಿ ವೀಕ್ಷಣೆಯಲ್ಲಿ ವಿಶ್ವದಾಖಲೆ?
3ನೇ ವಿಶ್ವಕಪ್ನ ಮೇಲೆ ಕಣ್ಣಿಟ್ಟಿರುವ ಭಾರತ ಹಾಗೂ 2ನೇ ವಿಶ್ವಕಪ್ನ ಆಸೆಯಲ್ಲಿರುವ ಪಾಕಿಸ್ತಾನ ತಂಡಗಳ ಈ ಪಂದ್ಯವನ್ನು ಕೇವಲ ಎರಡು ದೇಶಗಳ ಅಭಿಮಾನಿಗಳು ಮಾತ್ರವಲ್ಲದೆ ಇಡೀ ವಿಶ್ವವೇ ಕಾತುರದಿಂದ ಕಾಯುತ್ತಿದೆ. ಈ ಪಂದ್ಯ ಟೆಲಿವಿಷನ್ ಇತಹಾಸದಲ್ಲೇ ಅತಿ ಹೆಚ್ಚು ವೀಕ್ಷಣೆಯಾಗುವ ಪಂದ್ಯವಾಗಲಿದೆ ಎಂಬ ಲೆಕ್ಕಾಚಾರ ಮಾಡಲಾಗುತ್ತಿದೆ. ಈ ಪಂದ್ಯವನ್ನು ಸುಮಾರು ಒಂದು ಬಿಲಿಯನ್ (100 ಕೋಟಿ) ಜನರುವೀಕ್ಷಣೆ ಮಾಡಲಿದ್ದಾರೆ ಎಂದು ನಿರೀಕ್ಷಿಸಲಾಗಿದೆ.
ಹಿಂದಿನ ದಾಖಲೆ ಎಷ್ಟು ಗೊತ್ತಾ?
ಈ ಹಿಂದಿನ ದಾಖಲೆ ಕೂಡ ಭಾರತ ಆಡಿರುವ ಪಂದ್ಯದಲ್ಲಿಯೇ ಇದೆ. 2011ರ ವಿಶ್ವಕಪ್ನ ಫೈನಲ್ ಪಂದ್ಯದಲ್ಲಿ 558 ಮಿಲಿಯನ್(55.8 ಕೋಟಿ), ಸೆಮಿಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ಪಾಕಿಸ್ತಾನ ಹಣಾಹಣಿ ಎರಡನೇ ಅತಿ ಹೆಚ್ಚು ವೀಕ್ಷಣೆ ಪಡೆದ ಪಂದ್ಯವಾಗಿದೆ. ಈ ಪಂದ್ಯವನ್ನು 495(49.5 ಕೋಟಿ) ಮಿಲಿಯನ್ ಜನರು ವೀಕ್ಷಣೆ ಮಾಡಿದ್ದರು.
