ಹಲವು ಅಡೆತಡೆಗಳನ್ನು ಎದುರಿಸಿ ಕೊನೆಗೂ ಥಿಯೇಟರ್ ಕದ ತಟ್ಟಿರುವ ನರೇಂದ್ರ ಮೋದಿ ಬಯೋಪಿಕ್ ಮೊದಲ ವಾರಾಂತ್ಯಕ್ಕೆ ಉತ್ತಮ ಗಳಿಕೆ ಕಂಡಿದೆ.
ಚುನಾವಣಾ ನೀತಿ ಸಂಹಿತೆ, ವಿಪಕ್ಷಗಳ ಪ್ರತಿರೋಧದ ನಡುವೆ ಮೋದಿ ಬಯೋಪಿಕ್ ಬಿಡುಗಡೆ ಒಂದೂವರೆ ತಿಂಗಳು ಮುಂದೂಡಲ್ಪಟ್ಟು ಕೊನೆಗೂ ಮೇ 24ರಂದು ವಿಶ್ವಾದ್ಯಂತ ತೆರೆಕಂಡಿತ್ತು.
ಕಳೆದ ಶುಕ್ರವಾರ ಬಿಡುಗಡೆಯಾದ ನರೇಂದ್ರ ಮೋದಿ ಬಯೋಪಿಕ್ ಮೊದಲ ವಾರಾಂತ್ಯಕ್ಕೆ 11.76 ಕೋಟಿ ಗಳಿಕೆ ಮಾಡಿದೆ. ಶುಕ್ರವಾರ 2.88 ಕೋಟಿ, ಶನಿವಾರ 3.76 ಕೋಟಿ, ಭಾನುವಾರ 5.12 ಕೋಟಿ ಕಲೆಕ್ಷನ್ ಮಾಡಿದೆ.
'83' ಚಿತ್ರಕ್ಕೆ ರಣ್ವೀರ್ ತಯಾರಿ ಹೇಗಿದೆ ?
ವಿವೇಕ್ ಒಬೇರಾಯ್ ಮೋದಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವಿವೇಕ್ ಒಬೇರಾಯ್ ನಾಯಕನಾಗಿ ನಟಿಸಿದ ಚಿತ್ರಗಳಲ್ಲಿ ಯಾವುದೂ ಸಹ ಹತ್ತು ಕೋಟಿ ಗಳಿಸಿದ ನಿದರ್ಶನಗಳಿಲ್ಲ. ಹೀಗಾಗಿ ಮೋದಿ ಸಿನಿಮಾ ವಿವೇಕ್ ಕರಿಯರ್ಗೆ ಅಚ್ಛೇ ದಿನ್ ತಂದಿದೆ ಎನ್ನುವ ಮಾತು ಸದ್ಯ ಬಿಟೌನ್ನಲ್ಲಿ ಕೇಳಿಬರುತ್ತಿದೆ.
2002ರಲ್ಲಿ ರಾಮ್ಗೋಪಾಲ್ ವರ್ಮಾ ನಿರ್ದೇಶನದ ಕಂಪನಿ ಸಿನಿಮಾದ ಮೂಲಕ ಬಾಲಿವುಡ್ ಜರ್ನಿ ಆರಂಭಿಸಿದ್ದ ವಿವೇಕ್ ಒಬೇರಾಯ್ ಭವಿಷ್ಯದ ಸೂಪರ್ಸ್ಟಾರ್ ಆಗುವ ಸೂಚನೆ ನೀಡಿದ್ದರು.
ಸಾಥಿಯಾ, ಯುವ, ಓಂಕಾರ, ಪ್ಯಾರೇ ಮೋಹನ್, ಪ್ರಿನ್ಸ್ ಸಿನಿಮಾಗಳ ಮೂಲಕ ವಿವೇಕ್ ಎಲ್ಲರ ಗಮನ ಸೆಳೆದಿದ್ದರು. ಆದರೆ ಕಲೆಕ್ಷನ್ ವಿಚಾರದಲ್ಲಿ ಈ ಎಲ್ಲ ಚಿತ್ರಗಳು ಮಕಾಡೆ ಮಲಗಿದ್ದವು. 2013ರಲ್ಲಿ ಜಯಂತ್ಭಾಯ್ ಕಿ ಲವ್ ಸ್ಟೋರಿ ಮೂಲಕ ಕಂಬ್ಯಾಕ್ ಮಾಡಿದ್ದ ವಿವೇಕ್ ಒಬೇರಾಯ್ರನ್ನು ಮತ್ತೆ ಸೋಲು ಬಿಗಿದಪ್ಪಿತ್ತು.
ಮರು ಹುಟ್ಟು ನೀಡಿದ ಮೋದಿ ಬಯೋಪಿಕ್:
ವಿವೇಕ್ ಒಬೇರಾಯ್ ಸಿನಿ ಕರಿಯರ್ ಮುಗಿದೇ ಹೋಯ್ತು ಎನ್ನುವಾಗ ನರೇಂದ್ರ ಮೋದಿ ಬಯೋಪಿಕ್ ಮರು ಹುಟ್ಟು ನೀಡಿದೆ. ನಾಲ್ಕು ದಿನದಲ್ಲಿ 13 ಕೋಟಿ ಹಣವನ್ನು ನಿರ್ಮಾಪಕರ ಜೋಳಿಗೆ ತುಂಬಿಸಿದೆ. ಮೋದಿ ಬಯೋಪಿಕ್ ನಿಧಾನವಾಗಿ ಸಿನಿ ಪ್ರಿಯರನ್ನು ಥಿಯೇಟರ್ನತ್ತ ಕರೆತರುತ್ತಿದ್ದು ಇದು ವಿವೇಕ್ ಒಬೇರಾಯ್ ಸೇರಿದಂತೆ ಇಡೀ ತಂಡಕ್ಕೆ ಖುಷಿ ತಂದಿದೆ. ತಮ್ಮ ಹದಿನೈದು ವರ್ಷದ ಸಿನಿ ಕರಿಯರ್ನಲ್ಲಿ ಮೋದಿ ಬಯೋಪಿಕ್ ಮೂಲಕ ವಿವೇಕ್ ಒಬೇರಾಯ್ ಸಕ್ಸಸ್ ರುಚಿ ಕಂಡಿದ್ದಾರೆ.
