ಲಂಡನ್: ಭಾರತದೆದುರು ಸೋಲನುಭವಿಸಿ ಸಂಕಷ್ಟದಲ್ಲಿರುವ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ತಂಡದ ಪ್ರಮುಖ ಆಲ್ರೌಂಡರ್ ಮಾರ್ಕಸ್ ಸ್ಟೋಯ್ನಿಸ್ ಬಲಪಕ್ಕೆಯ ಸ್ನಾಯು ಸೆಳೆತಕ್ಕೊಳಗಾಗಿದ್ದು, ನಾಳೆ ನಡೆಯುವ ಪಾಕಿಸ್ತಾನ ವಿರುದ್ಧದ ಪಂದ್ಯದಿಂದ ಹೊರಗುಳಿಯಲಿದ್ದಾರೆ.
ಸ್ಟೋಯ್ನೀಸ್ ಗಾಯವೇನಾದರು ಗಂಭೀರ ಎನಿಸಿದರೆ ಟೂರ್ನಿಯಿಂದಲೇ ಹೊರಬೀಳುವ ಸಾಧ್ಯತೆಯಿದೆ. ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ ಹಾಗೂ ಮಧ್ಯಮ ವೇಗಿಯಾಗಿದ್ದ ಸ್ಟೋಯ್ನಿಸ್ ಗಾಯದಿಂದ ಆಸ್ಟ್ರೇಲಿಯಾ ತಂಡಕ್ಕೆ ದೊಡ್ಡ ತಲೆನೋವಾಗಿದ್ದು, ಇವರ ಬದಲಿಗೆ ಟೆಸ್ಟ್ ತಂಡದ ಉಪ ನಾಯಕ ಮಿಚೆಲ್ ಮಾರ್ಶ್ರನ್ನು ಇಂಗ್ಲೆಂಡ್ಗೆ ಕರೆಸಿಕೊಳ್ಳಲು ಆಸೀಸ್ ಆಯ್ಕೆ ಸಮಿತಿ ನಿರ್ಧರಿಸಿದೆ.
ಭಾರತ ಹಾಗೂ ಶ್ರೀಲಂಕಾ ವಿರುದ್ಧದ ಸರಣಿಯಲ್ಲಿ ಉತ್ತಮ ಪ್ರದರ್ಶನ ತೋರದ ಹಿನ್ನೆಲೆಯಲ್ಲಿ ಏಕದಿನ ತಂಡದಿಂದ ಅವಕಾಶ ವಂಚಿತರಾಗಿದ್ದ ಮಾರ್ಶ್ ಇದೀಗ ಮತ್ತೆ ಏಕದಿನ ತಂಡದಲ್ಲಿ ಆಡುವ ಅದ್ಭುತ ಅವಕಾಶ ಸಿಕ್ಕಿದೆ. ಒಂದು ವೇಳೆ ಸ್ಟೋಯ್ನಿಸ್ ವಿಶ್ವಕಪ್ನಿಂದಲೇ ಹೊರಗುಳಿಯಬೇಕಾದ ಸಂದರ್ಭ ಬಂದರೆ ಮಾರ್ಶ್ಗೆ ವಿಶ್ವಕಪ್ ತಂಡದ 11ರ ಬಳಗದಲ್ಲೂ ಆಡುವ ಭಾಗ್ಯ ಸಿಗಬಹುದು ಎನ್ನಲಾಗುತ್ತಿದೆ.
ಒಟ್ಟಿನಲ್ಲಿ ಟೂರ್ನಿಯಲ್ಲಿ ಮೊದಲ ಸೋಲು ಕಂಡಿದ್ದ ಹಾಲಿ ಚಾಂಪಿಯನ್ನರಿಗೆ ಮುಂದಿನ ಪಂದ್ಯಕ್ಕೂ ಮೊದಲೇ ಪ್ರಮುಖ ಆಟಗಾರನ ಗಾಯ ದೊಡ್ಡ ತಲೆನೋವು ತಂದಿದೆ. ಇಂಗ್ಲೆಂಡ್ನಂತಹ ಬಲಿಷ್ಠ ತಂಡವನ್ನು ಮಣಿಸಿರುವ ಪಾಕಿಸ್ತಾನದ ವಿರುದ್ಧ ಕಣಕ್ಕಿಳಿಯುವ ಮುನ್ನ ಸ್ಟೋಯ್ನಿಸ್ ಅನುಪಸ್ಥಿತಿ ಖಂಡಿತಾ ಕಾಡಲಿದೆ. ಸದ್ಯ ಮಿಚೆಲ್ ಮಾರ್ಶ್ ಇನ್ನು ಇಂಗ್ಲೆಂಡ್ ತಲುಪಿಲ್ಲ. ನಾಳಿನ ಪಂದ್ಯದಲ್ಲಿ ಸ್ಟೋಯ್ನಿಸ್ ಬದಲಿಗೆ ಶಾನ್ ಮಾರ್ಶ್, ನಥನ್ ಲಿಯಾನ್ ಅಥವಾ ಕೇನ್ ರಿಚರ್ಡ್ಸ್ನ್ ತಂಡ ಸೇರಿಕೊಳ್ಳಲಿದ್ದಾರೆ.
ನಾಳೆ ಟೌಂಟನ್ನಲ್ಲಿ ಆಸೀಸ್ ಪಾಕಿಸ್ತಾನವನ್ನು ಎದುರಿಸಲಿದೆ. ಆಸ್ಟ್ರೇಲಿಯಾ ತಂಡದ 2 ಗೆಲುವು ಹಾಗೂ ಒಂದು ಸೋಲು ಕಂಡಿದ್ದರೆ, ಪಾಕಿಸ್ತಾನ ತಲಾ ಒಂದು ಗೆಲುವು, ಸೋಲು ಕಂಡಿದೆ. ಒಂದು ಪಂದ್ಯ ಮಳೆಯಿಂದ ರದ್ದುಗೊಂಡಿತ್ತು.