ನವದೆಹಲಿ: ಸ್ವಾತಂತ್ರ್ಯೋತ್ಸವದ 75ನೇ ವರ್ಷಾಚರಣೆ ಹಿನ್ನೆಲೆಯಲ್ಲಿ ದೆಹಲಿಯ ಪ್ರಮುಖ ಸ್ಥಳಗಳಲ್ಲಿ ತ್ರಿವರ್ಣಧ್ವಜ ಹಾರಿಸಲಾಗುವುದು ಎಂದು ಕೇಜ್ರಿವಾಲ್ ವಿಧಾನಸಭೆಯಲ್ಲಿ ಹೇಳಿಕೆ ನೀಡಿದ್ದು, ಇದಕ್ಕೆ ವಿರೋಧ ಪಕ್ಷಗಳಿಂದ ಆಕ್ಷೇಪ ವ್ಯಕ್ತವಾಗುತ್ತಿದ್ದಂತೆ ಟಾಂಗ್ ನೀಡಿದ್ದಾರೆ.
ಭಾರತದಲ್ಲಿ ಇಲ್ಲದಿದ್ದರೆ ಅದನ್ನು ಪಾಕಿಸ್ತಾನದಲ್ಲಿ ಹಾರಿಸಲಾಗುವುದು ಎಂದು ಟಾಂಗ್ ನೀಡಿರುವ ಕೇಜ್ರಿವಾಲ್, ದೇಶಪ್ರೇಮದ ಬಗ್ಗೆ ಯಾವುದೇ ರಾಜಕೀಯ ಗುದ್ದಾಟ ಇರಬಾರದು, ದೇಶ ಎಲ್ಲರಿಗೂ ಸೇರಿದೆ ಎಂದಿದ್ದಾರೆ.
ಬಜೆಟ್ ವೇಳೆ ನಗರದಾದ್ಯಂತ 500 ಸ್ಥಳಗಳಲ್ಲಿ ತ್ರಿವರ್ಣ ಧ್ವಜ ಹಾರಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದರು. ರಾಷ್ಟ್ರಧ್ವಜ ನೋಡಿದಾಗಲೆಲ್ಲಾ, ಗಡಿಯಲ್ಲಿ ಹೋರಾಡುವ ಸೈನಿಕರ ನೆನಪು ಬರಬೇಕು ಎಂದಿದ್ದರು. ಆದರೆ ಇದಕ್ಕೆ ಪ್ರತಿಪಕ್ಷಗಳು ವಿರೋಧ ವ್ಯಕ್ತಪಡಿಸಿದ್ದವು.
ಇಂದು ಮಾತನಾಡಿದ ಕೇಜ್ರಿವಾಲ್, ನೀವು ನಮ್ಮ ನಿರ್ಧಾರಕ್ಕೆ ಬೆಂಬಲ ನೀಡಬೇಕು. ದೇಶಭಕ್ತಿಯ ಬಗ್ಗೆ ಯಾವುದೇ ರಾಜಕೀಯ ಇರಬಾರದು. ದೇಶ ಎಲ್ಲರಿಗೂ ಸೇರಿದೆ. ಭಾರತದಲ್ಲಿ ಇಲ್ಲದಿದ್ದರೆ ಪಾಕಿಸ್ತಾನದಲ್ಲಿ ತ್ರಿವರ್ಣ ಧ್ವಜ ಹಾರಿಸಲಾಗುವುದು ಎಂದು ಬಿಜೆಪಿ, ಕಾಂಗ್ರೆಸ್ಗೆ ವಿಧಾನಸಭೆಯಲ್ಲಿ ತಿರುಗೇಟು ನೀಡಿದರು.
ಇದೇ ವೇಳೆ 2048ರ ಒಲಿಂಪಿಕ್ ಕ್ರೀಡಾಕೂಟಕ್ಕೆ ಬಿಡ್ ಮಾಡಲಾಗುವುದು ಹಾಗೂ 2047ರ ವೇಳೆಗೆ ತಲಾ ಆದಾಯ ಸಿಂಗಾಪುರದ ಮಟ್ಟಕ್ಕೆ ಹೆಚ್ಚಿಸಲಾಗುವುದು ಎಂದು ಹೇಳಿರುವುದಕ್ಕೆ ದೆಹಲಿ ಸರ್ಕಾರವನ್ನು ಅಪಹಾಸ್ಯ ಮಾಡಲಾಗುತ್ತಿದೆ. ನಾವು ಅದನ್ನು ಖಂಡಿತವಾಗಿ ಸಾಧಿಸುತ್ತೇವೆ. ಒಲಿಂಪಿಕ್ಸ್ಗೆ ಬಿಡ್ ಮಾಡಲು ನಾವು ಕೇಂದ್ರ ಮತ್ತು ಭಾರತ ಒಲಿಂಪಿಕ್ ಸಂಘ ಸಂಪರ್ಕಿಸುತ್ತೇವೆ ಎಂದಿದ್ದಾರೆ.
ಕಳೆದ ಒಂದೂವರೆ ತಿಂಗಳಲ್ಲಿ ಬಹುತೇಕ ಎಲ್ಲ ರಾಜ್ಯ ಮತ್ತು ಕೇಂದ್ರ ಕೂಡ ಕೊರತೆ ಬಜೆಟ್ ಮಂಡನೆ ಮಾಡಿವೆ. ಆದರೆ ಇಂತಹ ಕಠಿಣ ಕಾಲದಲ್ಲೂ ನಾವು ಹೆಚ್ಚುವರಿ ಬಜೆಟ್ ಮಂಡನೆ ಮಾಡಿದ್ದು, ಈ ಸಾಧನೆ ಮಾಡಿರುವ ಏಕೈಕ ರಾಜ್ಯ ದೆಹಲಿ ಎಂದರು.
