ಹೈದರಾಬಾದ್ (ತೆಲಂಗಾಣ): ಕೈಮಗ್ಗ ಕಲಾವಿದರೊಬ್ಬರು ಚಿನ್ನ ಮತ್ತು ಬೆಳ್ಳಿಯಿಂದ ರೇಷ್ಮೆ ಸೀರೆಯನ್ನು ನೇಯುವ ಮೂಲಕ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ. ರಾಜಣ್ಣ ಸಿರಿಸಿಲ್ಲ ಜಿಲ್ಲೆಯ ಕೈಮಗ್ಗ ಕಲಾವಿದರಾದ ನಲ್ಲ ವಿಜಯ್ ಎಂಬವರು 20 ಗ್ರಾಂ ಚಿನ್ನ ಮತ್ತು 20 ಗ್ರಾಂ ಬೆಳ್ಳಿಯ ರೇಷ್ಮೆ ಸೀರೆಯನ್ನು ನೇಯುವ ಮೂಲಕ ತಮ್ಮ ಪ್ರತಿಭೆ ಅನಾವರಣಗೊಳಿಸಿದ್ದಾರೆ. ಇವರು ತಯಾರಿಸಿದ ಈ ಸೀರೆ 48 ಇಂಚು ಅಗಲ, ಐದೂವರೆ ಮೀಟರ್ ಉದ್ದ ಮತ್ತು 500 ಗ್ರಾಂ ತೂಕವಿದೆ. ಇದರ ಬೆಲೆ 1.80 ಲಕ್ಷ ರೂ. ಆಗಿದೆ.
ಚಿನ್ನ ಮತ್ತು ಬೆಳ್ಳಿಯನ್ನು ತೆಳುವಾದ ದಾರದಂತೆ ಮಾಡಲು ಒಂದು ತಿಂಗಳು ಬೇಕಾಯಿತು. ಹೈದರಾಬಾದಿನ ಉದ್ಯಮಿಯೊಬ್ಬರ ಮಗಳ ಮದುವೆಗೆ ಸೀರೆಯನ್ನು ತಯಾರಿಸಿದ್ದಾಗಿ ವಿಜಯ್ ತಿಳಿಸಿದ್ದಾರೆ.
ಭಾರತವು ವಿಶಿಷ್ಟ ಸಂಸ್ಕೃತಿ ಮತ್ತು ಸಂಪ್ರದಾಯ ಮತ್ತು ವಿವಿಧತೆಯಲ್ಲಿ ಏಕತೆ ಹೊಂದಿದೆ. ದೇಶದ ಪ್ರತಿಯೊಂದು ರಾಜ್ಯವು ಮಿನಿ ಭಾರತದಂತೆ ಕಾಣುತ್ತದೆ. ಹಬ್ಬಗಳು, ಆಹಾರ ಮತ್ತು ಬಟ್ಟೆ ಎಲ್ಲವೂ ಒಂದು ರಾಜ್ಯದಿಂದ ಮತ್ತೊಂದು ರಾಜ್ಯಕ್ಕೆ ಭಿನ್ನವಾಗಿದೆ. ವಿಶೇಷವಾಗಿ, ಪ್ರತಿಯೊಂದು ರಾಜ್ಯವು ತನ್ನದೇ ಆದ ಸಾಂಪ್ರದಾಯಿಕ ಉಡುಗೆ ಹೊಂದಿದೆ. ಒಬ್ಬ ವ್ಯಕ್ತಿ ಧರಿಸಿರುವ ಬಟ್ಟೆಗಳನ್ನು ನೋಡಿ ನಾವು ಅವರು ಯಾವ ರಾಜ್ಯಕ್ಕೆ ಸೇರಿದವರು ಎಂದು ಗುರುತಿಸಬಹುದು. ಜಗತ್ತಿನ ಯಾವ ದೇಶವೂ ಇಂತಹ ವೈವಿಧ್ಯತೆಯನ್ನು ಹೊಂದಿಲ್ಲ.
ಪ್ರತಿ ರಾಜ್ಯದಲ್ಲಿ ಮಹಿಳೆಯರು ವಿಭಿನ್ನ ರೀತಿಯ ಸೀರೆಗಳನ್ನು ಧರಿಸುತ್ತಾರೆ. ಸೀರೆಗಳು ಇಂದಿಗೂ ಫ್ಯಾಷನ್‌ನಿಂದ ಹೊರತಾಗಿಲ್ಲ, ಇದು ಸೀರೆಯ ವಿಶೇಷತೆ. ಮದುವೆಯ ಸಮಯದಲ್ಲಿ ವಧು ಸೀರೆ ಧರಿಸುವ ಸಂಪ್ರದಾಯ ಈಗಲೂ ನಡೆದುಕೊಂಡು ಬರುತ್ತಿದೆ. ಪ್ರಸ್ತುತ ದಿನಗಳಲ್ಲಿ ಮಹಿಳೆಯರು ಧರಿಸುವ ಬಟ್ಟೆಗಳಲ್ಲಿ ವಿಭಿನ್ನ ಪ್ರಯೋಗ ಮಾಡಲು ಇಷ್ಟಪಡುತ್ತಿದ್ದಾರೆ. ಹೀಗಾಗಿ ನೇಕಾರರು ಮತ್ತು ವಿನ್ಯಾಸಕಾರಿಗೆ ವಿಶಿಷ್ಟವಾದ ಸೀರೆಗಳನ್ನು ವಿನ್ಯಾಸಗೊಳಿಸಲು ಒತ್ತಾಯಿಸುತ್ತಿರುತ್ತಾರೆ.
ಈ ಮೂಲಕ ಮಹಿಳೆಯರು ವಿಭಿನ್ನವಾದ ಸೀರೆ ಮತ್ತು ಉಡುಪನ್ನು ಧರಿಸುವ ಮೂಲಕ ಇತರರಿಗಿಂತ ಭಿನ್ನವಾಗಿ ಕಾಣಲು ಬಯಸುತ್ತಾರೆ. ಹೈದರಾಬಾದಿನ ವ್ಯಕ್ತಿಯೊಬ್ಬರು ತಮ್ಮ ಮಗಳ ಮದುವೆ ವಿಶೇಷವಾಗಿರಬೇಕು ಎಂದು ಬಯಸಿ ರಾಜಣ್ಣ ಸಿರಿಸಿಲ್ಲ ಜಿಲ್ಲೆಯ ನೇಕಾರನಿಂದ ಚಿನ್ನ ಮತ್ತು ಬೆಳ್ಳಿಯಿಂದ ರೇಷ್ಮೆ ಸೀರೆಯನ್ನು ತಯಾರು ಮಾಡಿಸಿದ್ದಾರೆ.
ಇದನ್ನೂ ಓದಿ: Zomato CEO: ಡೆಲಿವರಿ ಬಾಯ್ ಆದ ಜೊಮ್ಯಾಟೊ ಸಿಇಒ ಗೋಯಲ್, ಇದು ಗೆಳೆಯರ ದಿನದ ವಿಶೇಷ!
