ನವದೆಹಲಿ: ಮುಂಗಾರು ಅಧಿವೇಶನದ ವೇಳೆ ಪೆಗಾಸಸ್ ವಿವಾದ ಕುರಿತ ಚರ್ಚೆ ವೇಳೆ ಮಾಹಿತಿ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್ ಅವರ ಕಾಗದ ಪತ್ರ ಹರಿದು ಹಾಕಿದ್ದ ಘಟನೆ ಸಂಬಂಧ ಟಿಎಂಸಿ ಸಂಸದ ಶಾಂತನು ಸೇನ್ ಅವರನ್ನ ಕಲಾದಿದಂದ ಅಮಾನತು ಮಾಡಲಾಗಿದೆ.
ನಿನ್ನೆ ನಡೆದ ಕಲಾಪದ ವೇಳೆ ವಿಪಕ್ಷ ನಾಯಕರ ಆರೋಪಗಳಿಗೆ ಉತ್ತರಿಸಲು ಎದ್ದು ನಿಂತು ಮಾತನಾಡುತ್ತಿದ್ದ ಸಚಿವ ವೈಷ್ಣವ್ ಅವರ ಕಾಗದ ಪತ್ರ ಹರಿದು ಗಾಳಿಯಲ್ಲಿ ತೂರಿ ಗದ್ದಲ ಮಾಡಿದ್ದರು. ವರ್ತನೆಗೆ ಸಭಾಪತಿ ವೆಂಕಯ್ಯ ನಾಯ್ಡು ಅಸಮಾಧಾನ ಹೊರಹಾಕಿದ್ದು, ಈ ಮುಂಗಾರು ಅಧಿವೇಶನದ ಎಲ್ಲ ಕಲಾಪದಿಂದಲೂ ಅವರನ್ನು ಅಮಾನತು ಮಾಡಿ ಆದೇಶಿಸಿದ್ದಾರೆ.
ಶಾಂತನು ಸೇನ್ ವರ್ತನೆಗೆ ಸ್ವಪಕ್ಷೀಯರಿಂದಲೇ ಅಸಮಾಧಾನ ಕೇಳಿ ಬಂದಿತ್ತು. ಗದ್ದಲದ ನಡುವೆ ಟಿಎಂಸಿ ಸಂಸದ ಡೆರೆಕ್ ಒಬ್ರಿಯಾನ್ ಸಹ ಸದನ ಸುಗಮವಾಗಿ ನಡೆಯಲು ಬಿಡಬೇಕು ಎಂದು ತಿಳಿಸಿದ್ದರು.
ಘಟನೆ ಕುರಿತಂತೆ ಪ್ರತಿಕ್ರಿಯಿಸಿದ ಸಭಾಪತಿ ವೆಂಕಯ್ಯ ನಾಯ್ಡು, ನಿನ್ನೆ ಸದನದಲ್ಲಿ ನಡೆದ ಘಟನೆಯಿಂದ ತೀವ್ರ ನೋವುಂಟಾಗಿದೆ. ಸಚಿವರ ಕಾಗದ ಹರಿದು ಹಾಕುವ ಮೂಲಕ ಸದನದಲ್ಲಿನ ವರ್ತನೆ ಇನ್ನಷ್ಟು ಕೆಳಗಿಳಿದಿದೆ. ಇಂತಹ ವರ್ತನೆಯೂ ಸಂಸದೀಯ ಪ್ರಜಾಪ್ರಭುತ್ವದ ಮೇಲೆ ಪರಿಣಾಮ ಬೀರಲಿದೆ ಎಂದಿದ್ದಾರೆ.
ಈ ಕುರಿತು ಮಾಧ್ಯಮಗಳ ಉದ್ದೇಶಿಸಿ ಮಾತನಾಡಿದ ಸಚಿವ ಅಶ್ವಿನಿ ವೈಷ್ಣವ್, ಟಿಎಂಸಿಗೆ ಹಿಂಸಾಚಾರದ ಸಂಸ್ಕೃತಿ ಇದೆ. ಅವರು ಅದನ್ನು ಸಂಸತ್ತಿನವರೆಗೂ ತರಲು ಮುಂದಾಗಿದ್ದಾರೆ. ಮುಂದಿನ ಪೀಳಿಗೆಯ ಸಂಸದರಿಗೆ ಅವರು ಯಾವ ಸಂದೇಶ ನೀಡಲು ಬಯಸುತ್ತಾರೆ..? ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಓದಿ: ‘Pegasus’ ಅನ್ನು ಪ್ರಧಾನಿ, ಗೃಹ ಸಚಿವರು ಭಾರತದ ವಿರುದ್ಧ ಬಳಸಿದ್ದಾರೆ: ರಾಹುಲ್ ಗಾಂಧಿ ಆರೋಪ
