ನವದೆಹಲಿ: ಭಾರತದ ವಿಚಾರದಲ್ಲಿ ಟ್ವಿಟ್ಟರ್ ಮಾಡಿಕೊಂಡಿರುವ ಎಡವಟ್ಟು, ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿದೆ. ತನ್ನ ವೆಬ್ಸೈಟ್ನಲ್ಲಿ ಭಾರತದ ನಕ್ಷೆಯನ್ನ ತಪ್ಪಾಗಿ ಪ್ರದರ್ಶಿಸಿದ್ದು, ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ದೇಶದ ಭಾಗವಲ್ಲ ಎಂದು ತೋರಿಸಿದೆ. ಟ್ವೀಪ್ ಲೈಫ್ ವಿಭಾಗದ ಶೀರ್ಷಿಕೆಯಡಿಯಲ್ಲಿ ಈ ನಕ್ಷೆ ಕಾಣಿಸಲಿದೆ.
ಟ್ವಿಟ್ಟರ್ನ ಈ ಎಡವಟ್ಟಿಗೆ ನೆಟ್ಟಿಗರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ದೀಪಕ್ಕೋಖ ಎಂಬಾತ ಪ್ರತಿಕ್ರಿಯಿಸಿದ್ದು, ‘@rsprasad is @Twitter new @PMOIndia’ (ಕೇಂದ್ರ ಸಚಿವ ರವಿಶಂಕರ್ ಪ್ರಸಾದ್ ಹಾಗೂ ಪ್ರಧಾನಿ ಮೋದಿ) ಯನ್ನು ಉಲ್ಲೇಖಿಸಿ ಟ್ವೀಟ್ ಮಾಡಿದ್ದಾರೆ. ದಿನೇದಿನೆ ಹಿಂದೂಸ್ತಾನಕ್ಕೆ ಅವಮಾನವಾಗುವ ಕೆಲಸ ಮಾಡ್ತಿರುವ ಟ್ವಿಟ್ಟರ್ ಮೇಲೆ ಯಾಕೆ ಕ್ರಮ ಕೈಗೊಳ್ತಿಲ್ಲ ಎಂದು ಪ್ರಶ್ನಿಸಿದ್ದಾರೆ. ವಿವೇಕ್ ಮಾನೆ ಎಂಬುವರು, ಟ್ವಿಟ್ಟರ್ ಈ ಬಾರಿಯೂ ಕ್ಷಮೆಯಾಚಿಸಲಿ ಎಂದು ಕಾಯುತ್ತಿದ್ದೀರಾ? ಅವರ ಸ್ಥಾನ ಏನೆಂಬುದನ್ನು ಅವರಿಗೆ ತೋರಿಸಿ ಎಂದು ಕೇಂದ್ರಕ್ಕೆ ಒತ್ತಾಯಿಸಿದ್ದಾರೆ.
ಟ್ವಿಟ್ಟರ್ ಇಂಥ ಎಡವಟ್ಟುಗಳನ್ನು ಮಾಡುವುದು ಮೊದಲೇನಲ್ಲ. ಈ ಹಿಂದೆಯೂ 2020ರ ಅಕ್ಟೋಬರ್ನಲ್ಲಿ ಲಡಾಖ್ ಚೀನಾದ ಭಾಗ ಎಂದು ಹೇಳಿ ‘ಲೇಹ್’ ಎಂದು ಹೆಸರಿಸಿತ್ತು. ಆಗ ಭಾರತ ಸರ್ಕಾರ ಟ್ವಿಟ್ಟರ್ ಸಿಇಓ ಜಾಕ್ ಡಾರ್ಸಿಗೆ ಎಚ್ಚರಿಕೆ ನೀಡಿ ನೋಟಿಸ್ ನೀಡಿತ್ತು.
ಇದನ್ನೂ ಓದಿ:ಐಒಎಸ್ ಟ್ವಿಟ್ಟರ್ ಹೊಸ ಅಪ್‌ಡೇಟ್: ಇನ್‌ಸ್ಟಾಗ್ರಾಮ್ ಸ್ಟೋರಿಗೆ ಟ್ವೀಟ್ ಶೇರಿಂಗ್ ಆಪ್ಷನ್
