ನವದೆಹಲಿ: ವಿವಿಧ ವಿಭಾಗಗಳ ವಾಹನಗಳಿಗೆ ಸಂಬಂಧಿಸಿದಂತೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಮೋಟಾರು ವಾಹನಗಳ ವಿಮಾ ಕಂತುಗಳನ್ನು ಮುಂಬರುವ ಜೂನ್ 1ರಿಂದ ಹೆಚ್ಚಿಸಿ ಕ್ರಮ ಕೈಗೊಂಡಿದೆ. ಈ ನಿರ್ಧಾರದ ಮೂಲಕ ಕಾರು ಮತ್ತು ದ್ವಿಚಕ್ರ ವಾಹನದ ಇನ್ಶೂರೆನ್ಸ್ ವೆಚ್ಚ ಹೆಚ್ಚಾಗಲಿದ್ದು ವಾಹನ ಮಾಲೀಕರಿಗೆ ಹೊರೆಯಾಗುವ ಸಂಭವವಿದೆ.
1,000 ಸಿಸಿ ಸಾಮರ್ಥ್ಯದ ಖಾಸಗಿ ಕಾರುಗಳ ಪ್ರೀಮಿಯಂ ದರವು 2019-10ರಲ್ಲಿದ್ದ 2,072 ರೂ.ಯಿಂದ ಇದೀಗ 2,094 ರೂ.ಗೆ ಹೆಚ್ಚಳ ಆಗಲಿದೆ ಎಂದು ಸಚಿವಾಲಯದ ಪರಿಷ್ಕೃತ ಅಧಿಸೂಚನೆ ತಿಳಿಸಿದೆ. ಅದೇ ರೀತಿ, 1,000 ಮತ್ತು 1,500 ನಡುವಿನ ಸಿಸಿ ಸಾಮರ್ಥ್ಯದ ಎಂಜಿನ್ ಸಾಮರ್ಥ್ಯದ ಖಾಸಗಿ ಕಾರುಗಳ ಹಳೆಯ ಪ್ರೀಮಿಯಂ ದರ ₹3,221 ಇದ್ದು, ಇದೀಗ ₹3,416 ರಷ್ಟಾಗಲಿದೆ. ಆದ್ರೆ, 1,500 ಸಿಸಿ ಸಾಮರ್ಥ್ಯದ ಕಾರು ಮಾಲೀಕರಿಗೆ ಕೊಂಚ ತಲೆಬಿಸಿ ಕಡಿಮೆ. ಏಕೆಂದರೆ, ಪ್ರೀಮಿಯಂ ದರವು ₹7,897 ರಿಂದ ₹7890ಕ್ಕೆ ಇಳಿಯಲಿದೆ.
ದ್ವಿಚಕ್ರ ವಾಹನಗಳ ವಿಚಾರಕ್ಕೆ ಬಂದರೆ, 150 ಸಿಸಿಗಿಂತಲೂ ಹೆಚ್ಚಿನ ಸಾಮರ್ಥ್ಯದ ಮತ್ತು 350 ಸಿಸಿಗಿಂತ ಕಡಿಮೆ ಇರುವ ವಾಹನಗಳ ಪ್ರೀಮಿಯಂ ₹1,366 ಮತ್ತು 350 ಸಿಸಿ ಹೊಂದಿರುವ ವಾಹನಗಳಿಗೆ ₹2,804 ಪ್ರೀಮಿಯಂ ನಿಗದಿಪಡಿಸಲಾಗಿದೆ.
ಸಚಿವಾಲಯದ ಅಧಿಸೂಚನೆಯ ಪ್ರಕಾರ, ಹೈಬ್ರಿಡ್‌ ಎಲೆಕ್ಟ್ರಿಕಲ್ ವಾಹನಗಳಿಗೆ ಶೇ 7.5 ರಷ್ಟು ರಿಯಾಯಿತಿ ದೊರೆಯಲಿದೆ. ಆದ್ರೆ, 30 ಕೆ.ವಿ ಗಿಂತಲೂ ಹೆಚ್ಚಿನ ಸಾಮರ್ಥ್ಯದ ಎಲೆಕ್ಚ್ರಿಕ್‌ ವಾಹನಗಳಿಗೆ ₹1,780 ಮತ್ತು 30 ಕೆ.ವಿ ಗಿಂತಲೂ ಹೆಚ್ಚು ಸಾಮರ್ಥ್ಯದ ಮತ್ತು 65 ಕೆ.ವಿ ಗಿಂತ ಒಳಗಿರುವ ವಾಹನಗಳಿಗೆ ₹2,904 ಪ್ರೀಮಿಯಂ ಕಂತು ಬರಲಿದೆ.
ಥರ್ಡ್ ಪಾರ್ಟಿ ಇನ್ಶೂರೆನ್ಸ್ ಕವರ್ ಅನ್ನೋದು ಮಾಲೀಕ ವಾಹನಕ್ಕೆ ತಮ್ಮಿಂದಾಗುವ ಹಾನಿಯ ಹೊರತಾಗಿಯೂ, ಸ್ವಂತ ಹಾನಿಯನ್ನೂ ಒಳಗೊಂಡಂತೆ ಕಡ್ಡಾಯವಾಗಿ ಖರೀದಿಸಬೇಕಿರುವ ಇನ್ಶೂರೆನ್ಸ್ ಆಗಿದೆ. ಇದು ಮುಖ್ಯವಾಗಿ, ಥರ್ಡ್ ಪಾರ್ಟಿಗೆ ಗಂಭೀರ ಸ್ವರೂಪದ ಹಾನಿ, ಸಾಮಾನ್ಯವಾಗಿ ಮನುಷ್ಯ ಇಲ್ಲವೇ ರಸ್ತೆ ಅಪಘಾತ ನಡೆದಾಗ ಉಂಟಾಗುವುದಕ್ಕೆ ಬೇಕಿರುವ ಇನ್ಶೂರೆನ್ಸ್ ಆಗಿದೆ.
ಇದನ್ನೂ ಓದಿ: ಡಿಜಿಲಾಕರ್ ಸೇವೆ ಇನ್ನು ಮುಂದೆ ವಾಟ್ಸ್ಆ್ಯಪ್ ಮೂಲಕವೂ ಲಭ್ಯ
