ನವದೆಹಲಿ: ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ(ಯುಎಇ) ನಡೆಯುವ ಬಹುಪಕ್ಷೀಯ ಯುದ್ಧಾಭ್ಯಾಸದಲ್ಲಿ ಭಾರತದ ತೇಜಸ್ ಲಘು ಯುದ್ಧ ವಿಮಾನಗಳು ಹಾರಾಟ ನಡೆಸಿ ತಮ್ಮ ಝಲಕ್ ತೋರಿಸಲಿವೆ. ವಿಶೇಷವೆಂದರೆ, ಇದೇ ಮೊದಲ ಬಾರಿಗೆ ಸ್ವದೇಶಿ ನಿರ್ಮಿತ ಜೆಟ್ ಯುದ್ಧ ವಿಮಾನವೊಂದು ವಿದೇಶದಲ್ಲಿ ನಡೆಯುತ್ತಿರುವ ತರಬೇತಿಯಲ್ಲಿ ಭಾಗವಹಿಸುತ್ತಿದೆ.
ವಾಯುದಳದ 110 ಯೋಧರನ್ನೊಳಗೊಂಡ ಐಎಎಫ್ ತುಕಡಿಯು ಅಲ್ ದಹ್ಫ್ರಾ ವಾಯುನೆಲೆಗೆ ಡಸರ್ಟ್ ಫ್ಲ್ಯಾಗ್ ಅಭ್ಯಾಸದಲ್ಲಿ ಭಾಗವಹಿಸಲು ಆಗಮಿಸಿದೆ. 5 ತೇಜಸ್ ಮತ್ತು ಎರಡು C-17 ಗ್ಲೋಬ್‌ಮಾಸ್ಟರ್ III ವಿಮಾನಗಳು ಇಲ್ಲಿ ಹಾರಾಡಲಿವೆ. ಎಲ್‌ಸಿಎ ತೇಜಸ್ ಭಾರತದ ಹೊರಗೆ ಅಂತಾರಾಷ್ಟ್ರೀಯ ಮಟ್ಟದ ಯುದ್ಧಾಭ್ಯಾಸದಲ್ಲಿ ಭಾಗವಹಿಸುತ್ತಿರುವ ಮೊದಲ ಸಂದರ್ಭವಿದು ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಯಾವ ದೇಶಗಳು ಭಾಗಿ: ಯುದ್ಧಾಭ್ಯಾಸದಲ್ಲಿ ಯುಎಇ, ಫ್ರಾನ್ಸ್, ಕುವೈತ್, ಆಸ್ಟ್ರೇಲಿಯಾ, ಯುಕೆ, ಬಹ್ರೇನ್, ಮೊರಾಕೊ, ಸ್ಪೇನ್, ರಿಪಬ್ಲಿಕ್ ಆಫ್ ಕೊರಿಯಾ ಮತ್ತು ಅಮೆರಿಕ ವಾಯುಪಡೆಗಳು ಭಾಗವಹಿಸಲಿವೆ. ಫೆಬ್ರವರಿ 27 ರಿಂದ ಮಾರ್ಚ್ 17ರ ವರೆಗೆ ತರಬೇತಿ ನಡೆಯಲಿದೆ. ಈ ರೀತಿಯ ವಿಶೇಷ ತರಬೇತಿಯಲ್ಲಿ ಭಾಗವಹಿಸುವುದು ಮತ್ತು ವಿವಿಧ ವಾಯುಪಡೆಗಳ ಉತ್ತಮ ಕೌಶಲ್ಯಗಳನ್ನು ಕಲಿಯುವುದು ಅಭ್ಯಾಸದ ಗುರಿಯಾಗಿದೆ.
ತೇಜಸ್ ವಿಶೇಷತೆ: ಬೆಂಗಳೂರಿನ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್‌ನಿಂದ (HAL) ತಯಾರಿಸಲ್ಪಟ್ಟ ತೇಜಸ್, ಏಕ ಬಳಕೆಯ ಎಂಜಿನ್ ಮತ್ತು ಅತ್ಯಂತ ಚುರುಕಾದ ಸೂಪರ್‌ಸಾನಿಕ್ ಸಮರ ವಿಮಾನ. ವಿಷಮಸ್ಥಿತಿಯ ವಾಯು ಪರಿಸರದಲ್ಲಿ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಇದಕ್ಕಿದೆ.
83 ವಿಮಾನ ಖರೀದಿ ಒಪ್ಪಂದ: ಭಾರತೀಯ ವಾಯುಪಡೆಗೆ ಅತ್ಯಗತ್ಯವಾಗಿರುವ ತೇಜಸ್ ಯುದ್ಧ ವಿಮಾನ ರೂಪಿಸಲು ಹೆಚ್‌ಎಎಲ್‌ ಜೊತೆ ಒಪ್ಪಂದ ಮಾಡಲಾಗಿದೆ. ಭಾರತೀಯ ವಾಯುಸೇನೆಗೆ 83 ತೇಜಸ್ ಲಘು ಯುದ್ಧ ವಿಮಾನಗಳ ಖರೀದಿಗೆ ಕೇಂದ್ರ ಸರ್ಕಾರ ಗ್ರೀನ್ ಸಿಗ್ನಲ್ ನೀಡಿದೆ. 48,000 ಕೋಟಿ ರೂ. ವೆಚ್ಚದಲ್ಲಿ 83 ಲಘು ಯುದ್ಧ ವಿಮಾನಗಳು ವಾಯುಪಡೆ ಬತ್ತಳಿಕೆ ಸೇರಲಿವೆ. ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ಭದ್ರತಾ ಸಂಪುಟ ಸಮಿತಿ (ಸಿಸಿಎಸ್) ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ತಿಳಿಸಿದ್ದರು. ಭಾರತೀಯ ರಕ್ಷಣಾ ಉತ್ಪಾದನೆಯಲ್ಲಿನ ಸ್ವಾವಲಂಬನೆಗಾಗಿ ಈ ಒಪ್ಪಂದ 'ಗೇಮ್ ಚೇಂಜರ್' ಆಗಲಿದೆ ಎಂದು ಸಿಂಗ್ ಟ್ವೀಟ್ ಮಾಡಿದ್ದರು.
ಸುಮಾರು ಮೂರು ವರ್ಷಗಳ ಹಿಂದೆ ಐಎಎಫ್ 83 ತೇಜಸ್ ಖರೀದಿಸಲು ಆರಂಭಿಕ ಟೆಂಡರ್ ನೀಡಿತ್ತು. ಇದೀಗ ಒಪ್ಪಂದಕ್ಕೆ ಒಪ್ಪಿಗೆ ಸಿಕ್ಕಿದೆ. 83 ಮಾರ್ಕ್ 1 ಎ ತೇಜಸ್ ಲಘು ಯುದ್ಧ ವಿಮಾನಗಳ ಒಪ್ಪಂದ ಇದಾಗಿದ್ದು, ಸುಧಾರಿತ ಸೇವಾ ಸಾಮರ್ಥ್ಯ, ವೇಗದ ಶಸ್ತ್ರಾಸ್ತ್ರ-ಲೋಡಿಂಗ್, ದೀರ್ಘಾಯುಷ್ಯ, ಉತ್ತಮ ಎಲೆಕ್ಟ್ರಾನಿಕ್ ವಾರ್ಫೇರ್ ಸೂಟ್ ಮತ್ತು ಆ್ಯಕ್ಟೀವ್ ಎಲೆಕ್ಟ್ರಾನಿಕ್ ಸ್ಕ್ಯಾನ್ಡ್ ಅರೇ (ಎಇಎಸ್ಎ) ರೇಡಾರ್‌ನೊಂದಿಗೆ ಈ ವಿಮಾನಗಳು ತಮ್ಮ ಸಾಮರ್ಥ್ಯ ಹೆಚ್ಚಿಸಲಿವೆ.
ಇದನ್ನೂ ಓದಿ: ಉತ್ತರ ನೆವಾಡಾದಲ್ಲಿ ವೈದ್ಯಕೀಯ ವಿಮಾನ ಪತನ: ರೋಗಿ ಸೇರಿ ಐವರು ಸಾವು
