ಮಧುರೈ: ಕೆಲವು ಅಭ್ಯರ್ಥಿಗಳು ಮತದಾರರ ಒಲವು ಗಳಿಸಲು ಮಹಿಳೆಯರ ಬಟ್ಟೆ ಒಗೆಯುವ ಮತ್ತು ರಸ್ತೆಬದಿಯಲ್ಲಿ ಚಹಾ ತಯಾರಿಸುವ ಕೆಲಸವನ್ನು ಸಹ ಮಾಡಿದ್ದಾರೆ. ಕೆಲ ಪಕ್ಷಗಳು ಮತದಾರರಿಗೆ ಚಿನ್ನಾಭರಣ, ಜಾನುವಾರು, ಮೊಬೈಲ್ ಫೋನ್, ಟಿವಿ, ಫ್ಯಾನ್, ಮಿಕ್ಸರ್, ವಾಷಿಂಗ್ ಮಷಿನ್, ಎಲ್ಪಿಜಿ ಸಿಲಿಂಡರ್ ಮತ್ತು ಸೋಲಾರ್ ಕುಕ್ ಟಾಪ್ಸ್ ನೀಡುವ ಭರವಸೆ ನೀಡಿವೆ. ಆದರೆ ಮಧುರೈ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಸ್ವತಂತ್ರ ಅಭ್ಯರ್ಥಿಯೊಬ್ಬರು ಭರವಸೆಯ ವಿಷಯದಲ್ಲಿ ಎಲ್ಲರನ್ನೂ ಹಿಂದೆ ತಳ್ಳಿದ್ದಾರೆ. ಮತದಾರರನ್ನು ಸೆಳೆಯಲು ಆ ಅಭ್ಯರ್ಥಿ ಚಂದ್ರನ ಮೇಲೆ ರಜಾದಿನ ಎಂಜಾಯ್ ಮಾಡಿಸುವುದಾಗಿ ಅದ್ಭುತವಾದ ಭರವಸೆ ನೀಡಿದ್ದಾರೆ.
ಸ್ವತಂತ್ರ ಅಭ್ಯರ್ಥಿಯ 35 ಭರವಸೆಗಳು...
ಮಧುರೈ ಸೌತ್‌ನ ಸ್ವತಂತ್ರ ಅಭ್ಯರ್ಥಿ ತುಲಂ ಸರವಣನ್ ಮತದಾರರಿಗೆ 35 ಭರವಸೆಗಳನ್ನು ನೀಡಿದ್ದಾರೆ. ಹೆಲಿಕಾಪ್ಟರ್‌ಗಳು, ಐಫೋನ್‌ಗಳು, ಮೂರು ಅಂತಸ್ತಿನ ಮನೆಗಳನ್ನು ಒದಗಿಸುವುದಾಗಿ ಅವರು ಭರವಸೆ ನೀಡಿದ್ದಾರೆ.
ಮೂರು ಅಂತಸ್ತಿನ ಮನೆಗಳಲ್ಲಿ ಈಜುಕೊಳದ ಸೌಲಭ್ಯವೂ ಇರುತ್ತಂತೆ. ಸ್ವತಂತ್ರ ಅಭ್ಯರ್ಥಿ ಮತದಾರರಿಗೆ ಪ್ರತಿ ವರ್ಷ 1 ಕೋಟಿ ರೂಪಾಯಿಗಳನ್ನು ಖಾತೆಗೆ ಜಮಾ ಮಾಡುವುದಾಗಿ ಭರವಸೆ ನೀಡಿದ್ದಾರೆ. ಅಷ್ಟೇ ಅಲ್ಲದೆ ತಮ್ಮ ಕ್ಷೇತ್ರದ ಪ್ರತಿಯೊಬ್ಬ ವ್ಯಕ್ತಿಯನ್ನು ರಜಾ ದಿನಗಳನ್ನು ಕಳೆಯಲು ಚಂದ್ರನ ಮೇಲೆ ಕಳುಹಿಸುವುದಾಗಿಯೂ ಹೇಳಿದ್ದಾರೆ.
ರೋಬೋಟ್ ಭರವಸೆ...
ಸ್ವತಂತ್ರ ಅಭ್ಯರ್ಥಿ ಸರವಣನ್ 20 ಲಕ್ಷ ರೂ.ಗಳ ಐಷಾರಾಮಿ ಕಾರನ್ನು ಮತದಾರರಿಗೆ ನೀಡುತ್ತಾರಂತೆ. ಅಷ್ಟೇ ಅಲ್ಲ, ವಧುವಿಗೆ ಚಿನ್ನದ ಆಭರಣ ಮತ್ತು ಮನೆಕೆಲಸಕ್ಕೆ ರೋಬೋಟ್ ನೀಡುವುದಾಗಿ ಭರವಸೆ ನೀಡಿದ್ದಾರೆ.
ಭರವಸೆಗಳನ್ನು ಈಡೇರಿಸುವ ಸಾಧ್ಯತೆಯ ಬಗ್ಗೆ ಸರವಣನ್ ಅವರನ್ನು ಕೇಳಿದಾಗ, ಅಧಿಕಾರ ನನ್ನ ಕೈಯಲ್ಲಿ ಬಂದರೆ ಅದು ಸಾಧ್ಯ. ಡಸ್ಟ್‌ಬಿನ್‌ನ ಚಿಹ್ನೆಯ ಮೇಲೆ ಮತ ಚಲಾಯಿಸಿ ಎಂದು ಹೇಳುವ ಸರವಣನ್ ಆಸ್ತಿ ಕೇವಲ 4 ಲಕ್ಷ ರೂಪಾಯಿ ಮಾತ್ರ ಇದೆ.
ಸರವಣನ್ ಮಧುರೈ ದಕ್ಷಿಣದಲ್ಲಿ ಡಿಎಂಕೆ ಮೈತ್ರಿ, ಎಐಎಡಿಎಂಕೆ ಮತ್ತು ಎಎಂಎಂಕೆ ಅಭ್ಯರ್ಥಿಗಳ ವಿರುದ್ಧ ಹೋರಾಡುತ್ತಿದ್ದಾರೆ. ಊಹಿಸಲಾಗದ ಭರವಸೆಗಳನ್ನು ನೀಡಿದ್ದಕ್ಕಾಗಿ ಅವರನ್ನು ಸಾಮಾಜಿಕ ಮಾಧ್ಯಮದಲ್ಲಿ ಟ್ರೋಲ್ ಮಾಡಲಾಗುತ್ತಿದೆ.
