ಗಂಗಾ ನದಿಯಲ್ಲಿಲ್ಲ ಕೋವಿಡ್​​ ವೈರಸ್​ನ ಕುರುಹು: ವರದಿಯಿಂದ ಬಹಿರಂಗ

ಗಂಗಾ ನದಿ ನೀರಿನಲ್ಲಿ ಕೋವಿಡ್​ ವೈರಸ್​ನ ಯಾವುದೇ ಕುರುಹುಗಳಿಲ್ಲ ಎಂದು ವರದಿಯೊಂದರಿಂದ ಬಹಿರಂಗವಾಗಿದೆ. ಈ ಮೂಲಕ ಜನರು ಯಾವುದೇ ಆತಂಕ ಪಡುವಂತಿಲ್ಲ ಎಂದು ಈ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ನವದೆಹಲಿ: ಗಂಗಾ ಸ್ನಾನ ತುಂಗಾ ಪಾನ ಎಂಬ ಮಾತಿದೆ. ಇದಕ್ಕೆ ಪುಷ್ಟಿ ನೀಡುವಂತೆ ವರದಿಯೊಂದು ಬಹಿರಂಗವಾಗಿದೆ. ಗಂಗಾ ನದಿಯಲ್ಲಿ ನದಿಯಲ್ಲಿ ಇತ್ತೀಚೆಗೆ ತೇಲಿಬಂದಿದ್ದ ಮೃತದೇಹಗಳನ್ನು ಹೊರತೆಗೆದ ನಂತರ ನದಿಯಲ್ಲಿ ಕೋವಿಡ್​ ವೈರಸ್​ನ ಯಾವುದೇ ಕುರುಹುಗಳು ಕಂಡು ಬಂದಿಲ್ಲ ಎಂದು ತಿಳಿದುಬಂದಿದೆ.

ಕೌನ್ಸಿಲ್ ಫಾರ್ ಸೈಂಟಿಫಿಕ್ ಆ್ಯಂಡ್​​ ಇಂಡಸ್ಟ್ರಿಯಲ್ ರಿಸರ್ಚ್ (ಸಿಎಸ್ಐಆರ್), ಇಂಡಿಯನ್ ಇನ್​ಸ್ಟಿಟ್ಯೂಟ್ ಆಫ್ ಟಾಕ್ಸಿಕಾಲಜಿ ರಿಸರ್ಚ್ (ಐಐಟಿಆರ್), ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಮತ್ತು ರಾಜ್ಯ ಮಾಲಿನ್ಯ ನಿಯಂತ್ರಣ ಸಹಯೋಗದೊಂದಿಗೆ ಜಲ ಶಕ್ತಿ ಸಚಿವಾಲಯದ ಅಧೀನದಲ್ಲಿರುವ ಸ್ವಚ್ಛ ಗಂಗಾ ರಾಷ್ಟ್ರೀಯ ಮಿಷನ್ ಈ ಅಧ್ಯಯನ ನಡೆಸಿದೆ.

ಎರಡು ಹಂತಗಳಲ್ಲಿ ಅಧ್ಯಯನವನ್ನು ನಡೆಸಲಾಗಿದ್ದು, ಕನೌಜ್​, ಉನ್ನಾವೊ, ಕಾನ್ಪುರ, ಹಮೀರ್‌ಪುರ, ಅಲಹಾಬಾದ್, ವಾರಣಾಸಿ, ಬಲಿಯಾ, ಬಕ್ಸಾರ್, ಗಾಜಿಪುರ, ಪಾಟ್ನಾಗಳಿಂದ ಮಾದರಿ ಸಂಗ್ರಹಿಸಲಾಗಿದೆ.

ಸಂಗ್ರಹಿಸಿದ ಯಾವುದೇ ಮಾದರಿಗಳಲ್ಲಿ ಸಾರ್ಸ್​​ ಕೋವಿ-2(SARS-CoV2) ನ ಕುರುಹುಗಳಿಲ್ಲ ಎಂದು ಮೂಲಗಳು ತಿಳಿಸಿವೆ. ವೈರಾಲಾಜಿಕಲ್ ಅಧ್ಯಯನವು ನೀರಿನ ಮಾದರಿಗಳಿಂದ ವೈರಸ್‌ಗಳ ಆರ್‌ಎನ್‌ಎಯನ್ನು ಹೊರತೆಗೆದು ಆರ್‌ಟಿ-ಪಿಸಿಆರ್ ಪರೀಕ್ಷೆ ನಡೆಸಿದ ಬಳಿಕ ಫಲಿತಾಂಶ ಸಿಗುತ್ತದೆ. ನದಿಯ ಜೈವಿಕ ಗುಣಲಕ್ಷಣಗಳನ್ನು ಪರೀಕ್ಷಿಸುವುದೂ ಈ ಅಧ್ಯಯನದಲ್ಲಿ ಸೇರಿದೆ.

ಬಿಹಾರ, ಉತ್ತರಪ್ರದೇಶದ ಬಹುತೇಕ ಭಾಗಗಳ ಜನತೆಯ ಕುಡಿಯುವ ನೀರಿನ ಮೂಲ ಈ ಗಂಗಾ ನದಿ. ಕೋವಿಡ್​ನಿಂದ ಮೃತಪಟ್ಟವರನ್ನು ನದಿಗೆ ಎಸೆದಿದ್ದರಿಂದ ನೀರಿನಲ್ಲಿಯೂ ವೈರಸ್​​ ಸೇರಿರಬಹುದೆಂಬ ಆತಂಕ ನಿರ್ಮಾಣವಾಗಿತ್ತು. ಇದಕ್ಕೀಗ ತೆರೆ ಬಿದ್ದಿದೆ.