ಚೆನ್ನೈ(ತಮಿಳುನಾಡು): ಚೆನ್ನೈನ ಎಸ್ಆರ್ಎಂ ಇನ್ಸ್ಟಿಟ್ಯೂಟ್ ಆಫ್ ಸೈನ್ಸ್ ಆ್ಯಂಡ್ ಟೆಕ್ನಾಲಜಿ ಅಂತಿಮ ವರ್ಷದ ವಿದ್ಯಾರ್ಥಿಯೋರ್ವನಿಗೆ ಜರ್ಮನಿಯ ಅಮೆಜಾನ್ ಕಂಪನಿ ಭರ್ಜರಿ ಆಫರ್ ನೀಡಿದೆ. ಅಂತಿಮ ವರ್ಷದಲ್ಲಿ ವ್ಯಾಸಂಗ ಮಾಡುತ್ತಿರುವ ಪುರಂಜಯ್ ಮೋಹನ್ಗೆ ವಾರ್ಷಿಕವಾಗಿ 1 ಕೋಟಿ ರೂಪಾಯಿ ಸ್ಯಾಲರಿ ನೀಡುವುದಾಗಿ ಆಫರ್ ಮಾಡಿದೆ.
ಜರ್ಮನಿಯ ಅಮೆಜಾನ್ ಸಾಫ್ಟ್ವೇರ್ ಅಭಿವೃದ್ಧಿಗೋಸ್ಕರ ಈ ಆಫರ್ ನೀಡಲಾಗಿದೆ ಎಂದು ಇನ್ಸ್ಟಿಟ್ಯೂಟ್ ಹೇಳಿಕೊಂಡಿದೆ. ಮಾಧ್ಯಮಗೋಷ್ಟಿಯಲ್ಲಿ ಈ ಕುರಿತು ಮಾತನಾಡಿರುವ ಎಸ್ಆರ್ಎಂ ಸಂಸ್ಥಾಪಕ, ಕುಲಪತಿ ಡಾ. ಟಿ.ಆರ್ ಪರಿವೇಂದರ್, ವಿದ್ಯಾರ್ಥಿಗಳನ್ನ ನಮ್ಮ ಸಂಸ್ಥೆ ಉನ್ನತ ಮಟ್ಟಕ್ಕೆ ತೆಗೆದುಕೊಂಡು ಹೋಗುತ್ತಿದೆ ಎಂಬುದಕ್ಕೆ ವಿದ್ಯಾರ್ಥಿ ಪುರಂಜಯ್ ಉತ್ತಮ ಉದಾಹರಣೆ ಎಂದರು.
ಇದನ್ನೂ ಓದಿ: ಖರೀದಿಸುವ ಸೋಗಿನಲ್ಲಿ ಬಂದ್ರು.. ಟೆಸ್ಟ್ ಡ್ರೈವ್ ನೆಪದಲ್ಲಿ ಕಾರನ್ನೇ ಕದ್ದೊಯ್ದ ಸಹೋದರರು!
ಇದೇ ವೇಳೆ ಮಾತನಾಡಿರುವ ಪ್ರಾದ್ಯಾಪಕ ಸತ್ಯನಾರಾಯಣ್, ಕಳೆದ ವರ್ಷ ಕೂಡ ನಮ್ಮ ಸಂಸ್ಥೆಯ ಇಬ್ಬರು ವಿದ್ಯಾರ್ಥಿಗಳು ತಲಾ 50 ಲಕ್ಷ ರೂ.(ವಾರ್ಷಿಕ) ಸ್ಯಾಲರಿ ಪ್ಯಾಕೇಜ್ ಪಡೆದುಕೊಂಡಿದ್ದರು. ಆದರೆ, ಈ ವರ್ಷ 1 ಕೋಟಿ ಪ್ಯಾಕೇಜ್ ನೀಡಿದ್ದಾರೆ. ಇದು ನಮ್ಮ ಸಂಸ್ಥೆಯ ಹೆಮ್ಮೆಯ ವಿಚಾರ. SRMಗೆ ಪ್ರಸಕ್ತ ವರ್ಷದಲ್ಲಿ ಸಾವಿರಕ್ಕೂ ಅಧಿಕ ಕಂಪನಿಗಳು ಭೇಟಿ ನೀಡಿದ್ದು, 10 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಜಾಬ್ ಆಫರ್ ನೀಡಿವೆ. ಮುಂದಿನ ದಿನಗಳಲ್ಲಿ ಹೆಚ್ಚಿನ ಸಂಸ್ಥೆಗಳು ಬರುವ ಸಾಧ್ಯತೆ ಇದೆ ಎಂದರು.
ಕಳೆದ ವರ್ಷ ನಮ್ಮ ಸಂಸ್ಥೆಯಿಂದ 8 ಸಾವಿರ ಹಾಗೂ ಅದರ ಹಿಂದಿನ ವರ್ಷ 7 ಸಾವಿರ ವಿದ್ಯಾರ್ಥಿಗಳು ಕೆಲಸ ಗಿಟ್ಟಿಸಿಕೊಂಡಿದ್ದರು. ಆದರೆ, ಈ ವರ್ಷ 10 ಸಾವಿರದ ಗಡಿ ದಾಟಿದೆ ಎಂದು ಸತ್ಯನಾರಾಯಣ್ ತಿಳಿಸಿದರು. ಪ್ರಮುಖವಾಗಿ ಅಮೆಜಾನ್, ಪೇಬಲ್, ಗೂಗಲ್, ಮಾರ್ಗನ್, ಬಜಾಜ್ ಫಿನ್ಸರ್ವ್, ಟೊಯೊಟಾ, ಜೆಪಿ ಮಾರ್ಗನ್, ಟಿಸಿಎಸ್, ವಿಪ್ರೋ, ಹೋಂಡಾ, ಐಬಿಎಂ, ಹೀರೋ ಮೋಟೋ ಕಾರ್ಪ್, ಜಾನ್ ಡೀರ್, ಪಿಲಿಪ್ಸ್, ಬ್ಯಾಂಕ್ ಆಫ್ ಅಮೆರಿಕ, ವೋಡಾಫೋನ್, ಅಪೊಲೊ, ಹಿಟ್ಯಾಚ್ ಸೇರಿದಂತೆ ಅನೇಕ ಕಂಪನಿಗಳು ಸಂದರ್ಶನ ಮಾಡಿ, ವಿದ್ಯಾರ್ಥಿಗಳಿಗೆ ಆಫರ್ ನೀಡಿವೆ ಎಂದಿದ್ದಾರೆ.
