ಮಲತಂದೆ ಅಥವಾ ಮಲತಾಯಿಯಾಗಿ ಹೊಸ ಕುಟುಂಬವನ್ನು ರಚಿಸಿಕೊಳ್ಳುವುದು ಕೆಲವೊಮ್ಮೆ ಲಾಭದಾಯಕ, ಹಾಗೆಯೇ ಸವಾಲಿನ ಅನುಭವ ಕೂಡ. ಪರಿಸ್ಥಿತಿಗೆ ಅನುಗುಣವಾಗಿ ಮಲ ತಂದೆ-ತಾಯಿಯರ ಅನುಭವಗಳು ವಿಭಿನ್ನವಾಗಿರುತ್ತದೆ. ವಿಚ್ಛೇದನ ಅಥವಾ ಸಂಗಾತಿಯ ಮರಣದಿಂದ ಉದ್ಭವವಾಗುವ ಸ್ಟೆಪ್ ಪೇರೆಂಟಿಂಗ್ ಕೆಲವು ಸನ್ನಿವೇಶದಲ್ಲಿ ಮಗುವಿನ ವಯಸ್ಸು ಮತ್ತು ಲಿಂಗವನ್ನು ಅವಲಂಬಿಸಿ ಭಿನ್ನವಾಗಿರುತ್ತದೆ.
ಮಲ ತಂದೆ-ತಾಯಿ ಮಾಡುವ ಕೆಲವು ಸಾಮಾನ್ಯ ತಪ್ಪುಗಳು:
ನೀವು, ಪೋಷಕರಾಗಿದ್ದು ಸಹ ಮರುಮದುವೆ ಮತ್ತು ಹೊಸ ಕುಟುಂಬವನ್ನು ಬಹಳ ಸಂತೋಷ ಮತ್ತು ನಿರೀಕ್ಷೆಯೊಂದಿಗೆ ಒಪ್ಪಿಕೊಳ್ಳುವ ಸಾಧ್ಯತೆಯಿದ್ದರೂ, ನಿಮ್ಮ ಮಕ್ಕಳು ಹೊಸ ತಂದೆ-ತಾಯಿಯನ್ನು ಹೊಂದುವ ಬಗ್ಗೆ ಉತ್ಸುಕರಾಗಿರುವುದಿಲ್ಲ. ಮುಂಬರುವ ಬದಲಾವಣೆಗಳ ಬಗ್ಗೆ ಮಕ್ಕಳು ಅನಿಶ್ಚಿತತೆಯನ್ನು ಅನುಭವಿಸಬಹುದು. ಅದು ನಿಮ್ಮೊಂದಿಗಿನ ಅವರ ಸಂಬಂಧದ ಮೇಲೆ ಪರಿಣಾಮ ಬೀರುತ್ತದೆ. ನಿಮ್ಮ ಮಕ್ಕಳು ತಮ್ಮ ಹೊಸ ಪೋಷಕರ ಜೊತೆ ಬದುಕುವ ಬಗ್ಗೆ ಚಿಂತಿತರಾಗುತ್ತಾರೆ, ಅವರ ಬಗ್ಗೆ ಮಕ್ಕಳಿಗೆ ಚೆನ್ನಾಗಿ ತಿಳಿದಿಲ್ಲದಿರಬಹುದು.
ಪೋಷಕರಾಗಿ, ಮಗುವಿಗೆ ನಮ್ಮ ಪ್ರೀತಿ ಮತ್ತು ಕಾಳಜಿಯನ್ನು ನೀಡಲು ನಾವು ಯಾವಾಗಲೂ ಉತ್ಸುಕರಾಗಿದ್ದೇವೆ, ಆದರೆ ಮಗು ಸಹ ಅದೇ ಭಾವನೆಗಳನ್ನು ಹೊಂದಿರುವುದಿಲ್ಲ. ಮಲತಾಯಿಯಾಗಿ ನಿಮ್ಮಿಂದ ಆಗಬಹುದಾದ ಕೆಲವು ಸಾಮಾನ್ಯ ತಪ್ಪುಗಳು ಇಲ್ಲಿವೆ:
- ಮಗುವಿನೊಂದಿಗೆ ತುಂಬಾ ಆರಾಮದಾಯಕವಾಗಿರಲು ಶತಪ್ರಯತ್ನ
- ನಿಮಗೆ ಇಷ್ಟವಿಲ್ಲದ ಕೆಲಸಗಳನ್ನೂ ಮಾಡುವ ಮೂಲಕ ಮಗುವನ್ನು ಮೆಚ್ಚಿಸಲು ಪ್ರಯತ್ನಿಸುವುದು.ಉದಾಹರಣೆ ಅವರನ್ನು ಪಿಕ್ನಿಕ್ ಅಥವಾ ಸಿನಿಮಾಗೆ ಕರೆದುಕೊಂಡು ಹೋಗುವುದು ಅಥವಾ ಅವರನ್ನು ಮೆಚ್ಚಿಸಲು ಪ್ರಯತ್ನಿಸುವುದು.
- ನೀವು ಮೊದಲೇ ಮಾತನಾಡಿಕೊಳ್ಳದೇ ನಿಮ್ಮ ಹೊಸ ಸಂಗಾತಿಯು ಇದೇ ರೀತಿಯ ಪೋಷಕ ಶೈಲಿಯನ್ನು ಹೊಂದಬೇಕೆಂದು ನಿರೀಕ್ಷಿಸುತ್ತಿರುವುದು; ಪರಸ್ಪರ ಪೋಷಕರ ಶೈಲಿಯ ಬಗ್ಗೆ ನಿಮ್ಮ ಹೊಸ ಸಂಗಾತಿಯೊಂದಿಗೆ ಸಂವಹನ ನಡೆಸುತ್ತಿಲ್ಲ.
- ಮಗುವು ನಿಮ್ಮನ್ನು ಮೆಚ್ಚಿಕೊಳ್ಳಬೇಕೆಂದು ಒಪ್ಪಿಕೊಳ್ಳಬೇಕೆಂದು ಹಾಗೂ ಗೌರವ ಕೊಡಬೇಕೆಂದು ಅತಿಯಾಗಿ ನಿರೀಕ್ಷಿಸುವುದು.
- ಕೆಲವೊಮ್ಮೆ ಜೈವಿಕ ಪೋಷಕರು(biological parent) ಹೊಸ ಪೋಷಕರೊಂದಿಗೆ ಉತ್ತಮ ಬಾಂಧವ್ಯ ಹೊಂದುವಂತೆ ಮಗುವನ್ನು ಬಲವಂತ ಮಾಡುವುದು.
ಪರಿವರ್ತನೆ ಮಗುವಿಗೆ ಅಷ್ಟು ಸುಲಭವಲ್ಲ, ವಿಶೇಷವಾಗಿ ಕುಟುಂಬಗಳ ವಿಚಾರಕ್ಕೆ ಬಂದಾಗ ಮಗುವಿಗೆ ಹೊಸಬರೊಂದಿಗೆ ಹೊಂದಿಕೊಳ್ಳುವುದು ಬಲು ಕಷ್ಟ. ಹೀಗಾಗಿ ಮೇಲೆ ತಿಳಿಸಿದ ತಪ್ಪುಗಳು ನಿಮ್ಮ ಮಗುವಿನ ಮೇಲೆ ಈ ರೀತಿ ಪರಿಣಾಮ ಬೀರಬಹುದು:
- ಮಕ್ಕಳಿಗೆ ಮಲ ಪೋಷಕರೊಂದಿಗಿನ ಒಡನಾಟ ಅಹಿತಕರ ಎನಿಸಬಹುದು, ಅವರು ಕಿರಿಕಿರಿಗೊಳ್ಳಬಹುದು ಮತ್ತು ಹೊಸ ಪೋಷಕರ ಕಡೆಗೆ ತಿರಸ್ಕಾರ ಹಾಗೂ ಅಸಮಾಧಾನದ ಭಾವನೆಗಳನ್ನು ಬೆಳೆಸಿಕೊಳ್ಳಬಹುದು.
- ಮಗುವಿನ ನಿರೀಕ್ಷೆ ಹೆಚ್ಚಾಗುತ್ತದೆ ಮತ್ತು ಅವರು ಅಂತಿಮವಾಗಿ ನಿರಾಶೆ ಅನುಭವಿಸುತ್ತಾರೆ. ನಿಮ್ಮ ದೈನಂದಿನ ಜೀವನಕ್ಕೆ ಹೊಂದಿಕೊಳ್ಳುವುದು ಅವರಿಗೆ ಕಷ್ಟವಾಗಬಹುದು.
- ಕುಟುಂಬದ ನಿಯಮಗಳು ಮತ್ತು ನಿಬಂಧನೆಗಳ ಬಗ್ಗೆ ಮಗು ಗೊಂದಲಕ್ಕೊಳಗಾಗಬಹುದು ಮತ್ತು ಅವರಿಗೆ ಅಸುರಕ್ಷಿತ ಭಾವ ಮೂಡಬಹುದು.
- ಮಗುವಿಗೆ ಹೊರೆಯಾಗಬಹುದು, ಮತ್ತು ಇದು ಪೋಷಕರಿಗೆ ಮಗು ಹತ್ತಿರವಾಗುವ ಸಾಧ್ಯತೆಗಳನ್ನು ಕಡಿಮೆ ಮಾಡುತ್ತದೆ.
- ಮಗುವು ಪ್ರೀತಿಯಿಂದ ಕೂಡಿದ, ಮೌಲ್ಯಯುತವಾದ ಭಾವನೆ ಮತ್ತು ಭಾವನಾತ್ಮಕ ನಂಟನ್ನು ಅನುಭವಿಸದೇ ಇರಬಹುದು.
ಏನು ಮಾಡಬಹುದು:
ಹಾಗಾದರೆ, ಮಗುವಿನೊಂದಿಗೆ ಪ್ರೀತಿಯ ಮತ್ತು ಭಾವನಾತ್ಮಕ ಬಂಧವನ್ನು ಸೃಷ್ಟಿಸಲು ಸ್ಟೆಪ್ ಪೇರೆಂಟ್ಸ್ ಏನು ಮಾಡಬಹುದು? ಎಂಬುದು ಮುಖ್ಯ ಪ್ರಶ್ನೆ.
ನೀವು ಮಲತಂದೆ ಅಥವಾ ಮಲತಾಯಿ ಎಂಬುದನ್ನು ಮೊದಲು ಸ್ವೀಕರಿಸಿ: ನಿಮ್ಮನ್ನು ನೀವು ಮಲತಾಯಿ ಎಂದೇ ಸ್ವೀಕರಿಸುವುದರಿಂದ ಆಗುವ ಪರಿವರ್ತನೆ ನಿಮ್ಮ ಕುಟುಂಬದ ಯೋಗಕ್ಷೇಮಕ್ಕೆ ಅಡಿಪಾಯವಾಗಿದೆ.
ನಿಮ್ಮ ಮಗುವಿನ ಬೆಳವಣಿಗೆಯ ವಯಸ್ಸನ್ನು ಅರ್ಥಮಾಡಿಕೊಳ್ಳಿ: ವಿವಿಧ ವಯಸ್ಸಿನ ಹೆಣ್ಣು ಅಥವಾ ಗಂಡು ಮಕ್ಕಳು ವಿಭಿನ್ನವಾಗಿ ಹೊಂದಿಕೊಳ್ಳುತ್ತಾರೆ. ನೀವು ವಿಭಿನ್ನ ವಯೋಮಾನದವರು ಮತ್ತು ಮಕ್ಕಳೊಂದಿಗೆ ನಿಮ್ಮ ವಿಧಾನವನ್ನು ಸರಿಹೊಂದಿಸಬೇಕಾಗುತ್ತದೆ, ಆದರೆ ವಿಶ್ವಾಸಾರ್ಹ ಸಂಬಂಧವನ್ನು ಸ್ಥಾಪಿಸುವ ನಿಮ್ಮ ಗುರಿ ಒಂದೇ ಆಗಿರುತ್ತದೆ.
ಪಾತ್ರ ಮತ್ತು ಜವಾಬ್ದಾರಿಗಳನ್ನು ಅರ್ಥಮಾಡಿಕೊಳ್ಳುವುದು: ಮಲತಾಯಿಯಾಗಿ, ನೀವು ಮೊದಲು ಎಲ್ಲದರಲ್ಲೂ ಮುಂದೆ ಹೆಜ್ಜೆ ಇಡಬೇಡಿ, ಆದರೆ ನಿಮ್ಮ ಸಂಗಾತಿಯೊಂದಿಗೆ ಪಾತ್ರಗಳು ಮತ್ತು ಜವಾಬ್ದಾರಿಗಳನ್ನು ಅರ್ಥಮಾಡಿಕೊಳ್ಳಲು ಮಗುವಿನೊಂದಿಗೆ ಸೇರಿ ಕೆಲಸ ಮಾಡಿ.
ಮಗುವಿನ ಜೀವನದಲ್ಲಿ ಹಂತ ಹಂತವಾಗಿ ಮತ್ತು ಕ್ರಮೇಣ ನಿಮ್ಮ ಸ್ಥಾನವನ್ನು ಸೃಷ್ಟಿಸಿಕೊಳ್ಳಿ: ನಿಮ್ಮಲ್ಲಿ ಸಮಯ ಮತ್ತು ತಾಳ್ಮೆ ಇದ್ದರೆ ಹೆಚ್ಚಿನ ಮಕ್ಕಳು ಅಂತಿಮವಾಗಿ ನಿಮ್ಮನ್ನು ಒಪ್ಪಿಕೊಳ್ಳುತ್ತಾರೆ. ಹೀಗಾಗಿ ಭಾವನಾತ್ಮಕವಾಗಿ ಮತ್ತು ದೈಹಿಕವಾಗಿ ಅವರೊಂದಿಗೆ ಇರುವ ಮೂಲಕ ಪ್ರಾಮಾಣಿಕ ಮತ್ತು ಮುಕ್ತ ವಾತಾವರಣವನ್ನು ಸೃಷ್ಟಿಸುವತ್ತ ಗಮನಹರಿಸಿ.
ನಿಮ್ಮ ಮಗುವಿನೊಂದಿಗೆ ಕ್ವಾಲಿಟಿ ಸಮಯವನ್ನು ಕಳೆಯಿರಿ: ಪ್ರತಿದಿನ ನಿಮ್ಮ ಮಗುವಿನೊಂದಿಗೆ ಗುಣಮಟ್ಟದ ಸಮಯವನ್ನು ಕಳೆಯಲು ಪ್ರಯತ್ನಿಸಿ, ಅದು ಅವರು ನಿಮಗೆ ಒಗ್ಗಿಕೊಳ್ಳುವಂತೆ ಮಾಡುತ್ತದೆ.
ಆಗಾಗ್ಗೆ ಮಕ್ಕಳೊಂದಿಗೆ ಮುಕ್ತವಾಗಿ ಮಾತನಾಡಿ,ಅವರೂ ಹೇಳುವುದಕ್ಕೂ ಕಿವಿಯಾಗಿ: ಮುಕ್ತ ಮತ್ತು ಇದೇ ಸರಿ ಎಂಬ ತೀರ್ಪು ನೀಡದ ವಾತಾವರಣವನ್ನು ಸೃಷ್ಟಿಸಲು ಪ್ರಯತ್ನಿಸಿ.
ಉತ್ತಮ ಪೋಷಕರಾಗುವ ತಂತ್ರಗಳ ಬಗ್ಗೆ ಅರಿತುಕೊಳ್ಳಿ: ಪೋಷಕ ಸ್ಥಾನದ ತಂತ್ರಗಳ ಬಗ್ಗೆ ಜಾಗೃತರಾಗಿರಿ ಮತ್ತು ಆ ಬಗ್ಗೆ ಶಿಕ್ಷಣವನ್ನು ಪಡೆದುಕೊಳ್ಳಿ. ಓದಿ, ಕೇಳಿ, ಅಥವಾ ಪೋಷಕ ವೃತ್ತಿಪರರಿಂದ ಸಹಾಯ ಪಡೆಯಿರಿ.
ಫಲಿತಾಂಶ ಏನಾಗಬಹುದು?
ನಿಮ್ಮ ಮಲ ಮಗುವಿನೊಂದಿಗೆ (stepchild) ನಿಮ್ಮ ಸಂಬಂಧವನ್ನು ಉತ್ತಮಗೊಳಿಸುವ ಸಾಧ್ಯತೆಗಳನ್ನು ನೀವು ಹೆಚ್ಚಿಸಿಕೊಳ್ಳುತ್ತೀರಿ ಮತ್ತು ನಿಮ್ಮ ಮಗು ನಿಮ್ಮೊಂದಿಗೆ ಮೌಲ್ಯಯುತ, ಸುರಕ್ಷಿತ ಮತ್ತು ಮೆಚ್ಚುಗೆಯ ಹಾಗೂ ಪ್ರೋತ್ಸಾಹಪೂರ್ವಕ ಜೊತೆಗೆ ಭಾವನಾತ್ಮಕವಾಗಿ ಬೆಸೆದುಕೊಂಡಂತೆ ಭಾಸವಾಗುತ್ತದೆ. ಇದು ಅವರ ಜೀವನದಲ್ಲಿ ನಿಮ್ಮನ್ನು ಒಪ್ಪಿಕೊಳ್ಳುವ ಪ್ರಕ್ರಿಯೆಯನ್ನು ಸುಲಭಗೊಳಿಸುತ್ತದೆ.
