ಕೊಥಗುಡೆಮ್(ತೆಲಂಗಾಣ): ಇತರೆ ಮಕ್ಕಳೊಂದಿಗೆ ಮನೆಯ ಹೊರಗೆ ಆಟವಾಡುತ್ತಿದ್ದ ವೇಳೆ ವಿಷಕಾರಿ ಹಾವು ಕಚ್ಚಿದೆ. ಇದರ ಬಗ್ಗೆ ಮನೆಯಲ್ಲಿ ಹೇಳದ ಕಾರಣ 8 ವರ್ಷದ ಬಾಲಕಿ ಪ್ರಾಣ ಕಳೆದುಕೊಂಡಿರುವ ಘಟನೆ ತೆಲಂಗಾಣದ ಕೊಥಗುಡೆಮ್ ಪ್ರದೇಶದಲ್ಲಿ ನಡೆದಿದೆ.
ಮದುವೆಯಾಗಿ 15 ವರ್ಷವಾಗಿದ್ದರೂ ಬಾಸ್ಕರ್ ಹಾಗೂ ಭಾರತಿ ದಂಪತಿಗೆ ಮಕ್ಕಳಾಗಿರಲಿಲ್ಲ. ಹೀಗಾಗಿ ತಮ್ಮ ಸಂಬಂಧಿಕರ ಹೆಣ್ಣು ಮಗುವನ್ನು ಅವರು ದತ್ತು ಪಡೆದುಕೊಂಡಿದ್ದರು. ಈ ಮಗುವಿಗೆ ಅಕಿಲಾ ಎಂದು ಹೆಸರಿಟ್ಟು ಅವರು ಸಾಕುತ್ತಿದ್ದರು. ನಿನ್ನೆ ಬಾಲಕಿಗೆ 8ನೇ ವರ್ಷದ ಹುಟ್ಟುಹಬ್ಬವಿತ್ತು. ಹೀಗಾಗಿ ಶನಿವಾರವೇ ಕುರುಕುಂಡಾದಲ್ಲಿನ ಅಜ್ಜಿ ಮನೆಗೆ ತೆರಳಿದ್ದರು.
ಬಾಲಕಿ ಅಲ್ಲಿನ ಮಕ್ಕಳೊಂದಿಗೆ ಆಟವಾಡುತ್ತಿದ್ದ ಸಂದರ್ಭದಲ್ಲಿ ಹಾವು ಕಚ್ಚಿದೆ. ಈ ವೇಳೆ ಅಲ್ಲಿಂದ ಓಡಿ ಬಂದು ಮನೆಯಲ್ಲಿ ಕುಳಿತಿದ್ದಾಳೆ. ಆದರೆ ಮನೆಯವರು ಹೊಡೆಯುತ್ತಾರೆಂಬ ಭಯದಲ್ಲಿ ಯಾರಿಗೂ ಹಾವು ಕಚ್ಚಿರುವ ವಿಷಯ ಹೇಳಲಿಲ್ಲ. ಕೆಲವು ಸಮಯದ ನಂತರ ಆಕೆ ವಾಂತಿ ಮಾಡಿಕೊಳ್ಳಲು ಶುರು ಮಾಡಿದ್ದಾಳೆ. ಈ ವೇಳೆ ಹಾವು ಕಚ್ಚಿರುವುದು ಮನೆಯವರಿಗೆ ಗೊತ್ತಾಗಿದೆ. ತಕ್ಷಣವೇ ಮಗುವನ್ನು ಕರೆದುಕೊಂಡು ಆಸ್ಪತ್ರೆಗೆ ತೆರಳಿದ್ದಾರೆ.
ಇದನ್ನೂ ಓದಿ: ಭಾರತೀಯರ ಕನಸುಗಳ ಭಾರವನ್ನು ಗೆಲುವಾಗಿ ಪರಿವರ್ತಿಸಿದ ಮೀರಾಬಾಯಿ ಚನು: ಕೊಹ್ಲಿ ಗುಣಗಾನ
ಸುಮಾರು 5-6 ಆಸ್ಪತ್ರೆ ಸುತ್ತಿದ್ರೂ ಬಾಲಕಿಗೆ ಸೂಕ್ತವಾದ ಚಿಕಿತ್ಸೆ ಸಿಕ್ಕಿಲ್ಲ. ಕೊನೆಯದಾಗಿ ಖಮ್ಮಂನಲ್ಲಿರುವ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದು, ಮಗು ಪ್ರಾಣ ಬಿಟ್ಟಿದೆ. ಕುಟುಂಬಸ್ಥರು ಈಗಾಗಲೇ ಮಗುವಿನ ಅಂತ್ಯಕ್ರಿಯೆ ನಡೆಸಿದ್ದಾಗಿ ತಿಳಿದು ಬಂದಿದೆ.
