ಕನ್ನೌಜ್: ಹೋಳಿ ಹಬ್ಬದ ಪ್ರಯುಕ್ತ ಬಾಕಿ ವೇತನ ಕೇಳಲು ಬಂದಿದ್ದ ನೌಕರನನ್ನು ಮಾಜಿ ಬಿಜೆಪಿ ಶಾಸಕನ ಮಗ ಬಂದೂಕಿನಿಂದ ಹೊಡೆದು ಸಾಯಿಸಿದ ಘಟನೆ ಪನ್ಬಾದ್ ಗ್ರಾಮದಲ್ಲಿ ನಡೆದಿದೆ.
ಪನ್ಬಾದ್ ಗ್ರಾಮದ ನಿವಾಸಿ ಸಂದೇಶ್ ಎಂಬಾತ ಮಾಜಿ ಬಿಜೆಪಿ ಶಾಸಕ ಬನ್ವಾರಿ ಲಾಲ್ ದೊಹರೆ ಅವರ ಮನೆಯಲ್ಲಿ ಕೆಲಸ ಮಾಡುತ್ತಿದ್ದನು. ಸಂದೇಶ್ಗೆ ತಿಂಗಳಿಗೆ 5,000 ರೂಪಾಯಿ ವೇತನವಿತ್ತು. ಕುಟುಂಬ ಸದಸ್ಯರ ಪ್ರಕಾರ, ಸಂದೇಶ್ಗೆ ಸುಮಾರು 6 ತಿಂಗಳ ಕಾಲ (ಅಂದ್ರೆ 30 ಸಾವಿರ ರೂಪಾಯಿ) ವೇತನ ನೀಡದೆ ಬನ್ವಾರಿ ಲಾಲ್ ದೊಹರೆ ಕುಟುಂಬ ಸತಾಯಿಸುತ್ತಿತ್ತು.
ಮಾರ್ಚ್ 25 ರಂದು ಹೋಳಿ ಹಬ್ಬಕ್ಕೆ ವೇತನ ನೀಡದ ಕಾರಣಕ್ಕಾಗಿ ಅಜಿತ್ ದೊಹರೆ ಮೇಲೆ ಸಂದೇಶ್ ಕೋಪಗೊಂಡಿದ್ದರು. ಈ ವೇಳೆ ಇಬ್ಬರ ಮಧ್ಯೆ ಜಗಳವಾಗಿದ್ದು, ಸಂದೇಶನನ್ನು ಅಜಿತ್ ಬಂದೂಕಿನ ಹಿಂಭಾಗದಿಂದ ಹೊಡೆದು ಹಲ್ಲೆಗೊಳಿಸಿದ್ದಾನೆ. ಈ ಸುದ್ದಿ ಕುಟುಂಬಸ್ಥರಿಗೆ ತಿಳಿದಿದ್ದು, ಕೂಡಲೇ ಘಟನಾ ಸ್ಥಳಕ್ಕೆ ತಲುಪಿದ್ದಾರೆ.
ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಸಂದೇಶನನ್ನು ಕುಟುಂಬಸ್ಥರು ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದರು. ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಕಾನ್ಪುರ ಆಸ್ಪತ್ರೆಗೆ ದಾಖಲಿಸಲಾಗಿತ್ತು.
ಆಸ್ಪತ್ರೆಯಲ್ಲಿ ಸಂದೇಶ್ ಮೂರು ದಿನಗಳ ಕಾಲ ಜೀವನ್ಮರಣ ಹೋರಾಟ ನಡೆಸಿ ಮೃತಪಟ್ಟನು. ಈ ಘಟನೆ ಕುರಿತು ಕುಟುಂಬಸ್ಥರು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪೊಲೀಸರು ಆರೋಪಿ ಪತ್ತೆಗಾಗಿ ಶೋಧ ನಡೆಸಿದ್ದಾರೆ.
