ನವದೆಹಲಿ: ಹೊಸ ಕೋವಿಡ್ 19ರ ರೂಪಾಂತರಿ ವೈರಸ್ಗಳು ಹೊತ್ತು - ಗೊತ್ತಿಲ್ಲದೇ ಯಾವುದೇ ಸ್ಥಳ ಇರಲಿ, ಯಾವುದೇ ಪ್ರದೇಶ ಇರಲಿ ಅಷ್ಟೇ ಏಕೆ ಯಾವುದೇ ಸಮಯದಲ್ಲಿ ಮನುಷ್ಯನ ದೇಹವನ್ನು ಹೊಕ್ಕು ಹೈರಾಣು ಮಾಡಬಹುದು ಎಂದು ಕೇಂದ್ರ ಸರ್ಕಾರ ಸಾರ್ವಜನಿಕರಿಗೆ ಎಚ್ಚರಿಕೆ ರವಾನಿಸಿದೆ.
ಕೋವಿಡ್ ರೂಪಾಂತರಿಗಳಾದ ಆಲ್ಫಾ, ಬೇಟಾ, ಗಾಮಾ, ಡೆಲ್ಟಾ ಮತ್ತು ಡೆಲ್ಟಾ ಪ್ಲಸ್ ತಳಿಯ ವೈರಾಣುಗಳ ಬಗ್ಗೆ ಕೇಂದ್ರ ಸರ್ಕಾರ ತೀವ್ರ ನಿಗಾ ಇಟ್ಟಿದೆ. ಈ ಬಗ್ಗೆ ಮಾತನಾಡಿರುವ ರೋಗಗಳ ರಾಷ್ಟ್ರೀಯ ನಿಯಂತ್ರಣ ಕೇಂದ್ರದ ನಿರ್ದೇಶಕ ಡಾ ಎಸ್ ಕೆ ಸಿಂಗ್, ರೂಪಾಂತರಿಗಳ ಬಗ್ಗೆ ಎಚ್ಚರಿಕೆಯಿಂದ ಇರುವಂತೆ ಸಲಹೆ ನೀಡಿದ್ದಾರೆ. ಅದರಲ್ಲೂ ಕಪ್ಪ, B1617.3 ರೂಪಾಂತರಿ ತಳಿಗಳು ಭಾರಿ ಅಪಾಯಕಾರಿ ಆಗಿದ್ದು, ಈ ಬಗ್ಗೆ ಸಂಶೋಧನೆ ಹಾಗೂ ನಿಗಾ ಇಡಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ಮುಂದುವರಿದು ಮಾತನಾಡಿರುವ ಅವರು,ವಿಶ್ವ ಆರೋಗ್ಯ ಸಂಸ್ಥೆ ನಿಯಮಾವಳಿ ಪ್ರಕಾರ, ಪ್ರತಿ ಜಿಲ್ಲೆ, ಹಳ್ಳಿಗಳ ಸೂಕ್ಷ್ಮ ಪ್ರದೇಶಗಳಿಂದ ಸ್ಯಾಂಪಲ್ಗಳನ್ನ ಸಂಗ್ರಹಿಸಿ ಅಪಾಯಕಾರಿ ವೈರಾಣುಗಳನ್ನ ಗುರುತಿಸಲಾಗುತ್ತಿದೆ ಎಂದಿದ್ದಾರೆ.
ಸರ್ಕಾರಿ ಆರೋಗ್ಯ ಕೇಂದ್ರಗಳು ಒಂದು ನಿರ್ದಿಷ್ಟ ರೋಗ ಹಾಗೂ ಅದರ ಕಾರ್ಯಕ್ಷೇತ್ರ ಹಾಗೂ ವ್ಯಾಪಿಸುತ್ತಿರುವುದಕ್ಕೆ ಸಂಬಂಧಿಸಿದಂತೆ, ಸೆಂಟಿನೆಲ್ ಕೇಂದ್ರಗಳನ್ನು ದೇಶಾದ್ಯಂತ ಸ್ಥಾಪಿಸಲಾಗಿದೆ. ಇವುಗಳಿಂದ ಪ್ರತಿಯೊಂದು ರಾಜ್ಯದ ಕನಿಷ್ಠ ಐದು ಕೇಂದ್ರಗಳಿಂದ 5 ಲ್ಯಾಬ್‌ಗಳು ಮತ್ತು 5 ತೃತೀಯ ಆರೈಕೆ ಆಸ್ಪತ್ರೆಗಳನ್ನು ಗುರುತಿಸಲು ಹೇಳಲಾಗಿದೆ. ಈ ಸಂಬಂಧ ಸುಮಾರು 277 ಸೆಂಟಿನೆಲ್ ಸೈಟ್‌ಗಳನ್ನು ಗುರುತಿಸಲಾಗಿದ್ದು, 8,000 ಮಾದರಿಗಳನ್ನು ಗುರುತಿಸಲಾಗಿದೆ ಎಂದು ಆರೋಗ್ಯ ಇಲಾಖೆ ನಿರ್ದೇಶಕರು ಮಾಹಿತಿ ನೀಡಿದ್ದಾರೆ.
