ನಲ್ಗೊಂಡ (ತೆಲಂಗಾಣ) : ಮನುಷ್ಯನ ಕೈಯಲ್ಲಿ ಅಸಾಧ್ಯವಾದದ್ದು ಯಾವುದೂ ಇಲ್ಲ ಎಂಬುದನ್ನು ಅನೇಕರು ಮಾಡಿ ತೋರಿಸಿದ್ದಾರೆ. ಸಾಧಿಸಬೇಕೆಂಬ ಛಲವೇ ನಿಮ್ಮನ್ನು ಉತ್ತುಂಗಕ್ಕೆ ಕೆರೆದುಕೊಂಡು ಹೋಗುತ್ತದೆ ಎಂಬುದಕ್ಕೆ ಇಲ್ಲೋರ್ವ ಯುವಕ ಉದಾಹರಣೆಯಾಗಿದ್ದಾನೆ. ಓದಿನಲ್ಲಿ ವಿಫಲನಾದ ಈತ ಯಾವುದೇ ಬೇಸರವಿಲ್ಲದೆ ತಮ್ಮ ಆಸಕ್ತಿಯ ಕ್ಷೇತ್ರದತ್ತ ಗಮನಹರಿಸಿ ಇಂದು ಲಕ್ಷಗಟ್ಟಲೇ ಸಂಪಾದನೆ ಮಾಡುತ್ತಿದ್ದಾರೆ.
ನಲ್ಗೊಂಡ ಆನಿಮೇಷನ್ ಕಲಾವಿದ ರಾಘವೇಂದ್ರ ಕುರಿತಾದ ಇಂಟ್ರೆಸ್ಟಿಂಗ್ ಕಥೆ : ಅದ್ಭುತ ಚಿತ್ರಗಳನ್ನು ನಿರ್ಮಿಸುತ್ತಿರುವ ಈ ಯುವಕನ ಹೆಸರು ಗಂಜಿ ರಾಘವೇಂದ್ರ. ನಲ್ಗೊಂಡ ಜಿಲ್ಲೆಯ ಮುನುಗೋಡು ವ್ಯಾಪ್ತಿಯ ಗಟ್ಟುಪ್ಪಲ್ ನಿವಾಸಿ. ಬಾಲ್ಯದಿಂದಲೂ ಚಿತ್ರಕಲೆ ಕುರಿತು ಬಹಳ ಆಸಕ್ತಿ ಹೊಂದಿದ್ದ ರಾಘವೇಂದ್ರ ಓದುವುದರಲ್ಲಿ ಹಿಂದೆ ಇದ್ದರು. ಇಂಟರ್ ಎಕ್ಸಾಂನಲ್ಲಿ ಫೇಲ್ ಆದರೂ ಖಿನ್ನತೆಗೆ ಒಳಗಾಗಿರಲಿಲ್ಲ. ಇದೀಗ ಹೆಚ್ಸಿಎಲ್ ನಲ್ಲಿ ಸೀನಿಯರ್ ಟೆಕ್ನಿಕಲ್ ಹೆಡ್ ಆಗಿ ಲಕ್ಷ ಲಕ್ಷ ಗಳಿಸುತ್ತಿದ್ದಾರೆ.
ಹೌದು, ಇಂಟರ್ ಪರೀಕ್ಷೆಯಲ್ಲಿ ಅನುತ್ತೀರ್ಣನಾದ ನಂತರ ರಾಘವೇಂದ್ರ ಅವರು ಪೂರಕ ಪರೀಕ್ಷೆ ಬರೆದಿದ್ದಾರೆ. ಆದರೆ, ಫಲಿತಾಂಶದಲ್ಲಿ ಯಾವುದೇ ಬದಲಾವಣೆ ಕಂಡುಬಂದಿರಲಿಲ್ಲ. ಬಳಿಕ, ರಾಘವೇಂದ್ರ ತಮ್ಮ ಅಕ್ಕಿ ಗಿರಣಿ ಉಸ್ತುವಾರಿ ವಹಿಸಿಕೊಂಡರು. ಮೂರು ವರ್ಷಗಳ ಕಾಲ ಅಲ್ಲಿ ಕೆಲಸ ಮಾಡಿದರು. ಈ ಸಮಯದಲ್ಲಿ ಅವರು ತೆಲಂಗಾಣದ ಕಲಾವಿದರಿಂದ ಪ್ರೇರಿತರಾಗಿ ಚಿತ್ರಕಲೆಯ ಬಗ್ಗೆ ಗಮನಹರಿಸಿದರು. ನಂತರ ಲಲಿತಕಲೆ ವ್ಯಾಸಂಗ ಮಾಡಲು ನಿರ್ಧರಿಸಿ, ಶ್ರೀ ವೆಂಕಟೇಶ್ವರ ವಿಶ್ವವಿದ್ಯಾಲಯದಲ್ಲಿ ಲಲಿತಕಲೆ ಪೂರ್ಣಗೊಳಿಸಿದರು.
ಈ ಕುರಿತು ಅಭಿಪ್ರಾಯ ಹಂಚಿಕೊಂಡ ಚಿತ್ರಕಲಾವಿದ ಗಂಜಿ ರಾಘವೇಂದ್ರ, 'ನನಗೆ ಅಧ್ಯಯನದಲ್ಲಿ ಹೆಚ್ಚು ಆಸಕ್ತಿ ಇರಲಿಲ್ಲ. ಹಾಗಾಗಿ ನಾನು ಮಧ್ಯಂತರ ಪರೀಕ್ಷೆಯಲ್ಲಿ ಅನುತ್ತೀರ್ಣನಾದೆ. ಇಂಟರ್ ನಂತರ ರೈಸ್ ಮಿಲ್ ನೋಡಿಕೊಳ್ಳುತ್ತಿದ್ದೆ. ಮೂರು ವರ್ಷಗಳ ಕಾಲ ಶಿಕ್ಷಣದಿಂದ ದೂರವಿದ್ದೆ. ಆ ಸಮಯದಲ್ಲಿ ನಾನು ಅಂತರ್ಜಾಲದಲ್ಲಿ ಅನೇಕ ವಿಷಯಗಳ ಕುರಿತು ಮಾಹಿತಿ ಕಲೆ ಹಾಕಿದೆ. ನನ್ನಲ್ಲಿ ಯಾವ ರೀತಿಯ ಕಲೆ ಇದೆ ಅಂತ ಯೋಚಿಸಿದೆ. ಮುಖ್ಯವಾಗಿ ನನಗೆ ಇಷ್ಟವಾದ ಪೇಂಟಿಂಗ್ ಬಗ್ಗೆ ಹುಡುಕಾಟ ನಡೆಸಿದೆ. ಬಳಿಕ, ಶ್ರೀ ವೆಂಕಟೇಶ್ವರ ವಿಶ್ವವಿದ್ಯಾಲಯದಿಂದ ಫೈನ್ ಆರ್ಟ್ಸ್ ಮುಗಿಸಿದೆ. ಈ ವೇಳೆ ನಾನು ಸಂಶೋಧನೆ ಮಾಡಿ ಅನಿಮೇಷನ್ ಕ್ಷೇತ್ರದಲ್ಲಿ ಪ್ರವೀಣನಾದೆ' ಎಂದಿದ್ದಾರೆ.
ಅನಿಮೇಷನ್ ಕ್ಷೇತ್ರವನ್ನು ಕರಗತ ಮಾಡಿಕೊಂಡಿದ್ದ ಅವರಿಗೆ ಮೊದಲು 2013ರಲ್ಲಿ ನೆಕ್ಸ್ಟ್ ಎಜುಕೇಷನ್ನಲ್ಲಿ 3ಡಿ ವಿನ್ಯಾಸದಲ್ಲಿ ಕೆಲಸ ಸಿಕ್ಕಿತು. ಅವರು ಟೈಮ್ಸ್ ಎಂಬ ಪ್ರಸಿದ್ಧ ಗೇಮಿಂಗ್ ಕಂಪನಿಯಲ್ಲಿ 5 ವರ್ಷಗಳ ಕಾಲ 3D ಕಲಾವಿದರಾಗಿ ಕೆಲಸ ಮಾಡಿದರು. ಇದಾದ ನಂತರ ಅಮೆಜಾನ್ ಕಂಪನಿಯ ಎಆರ್ ಮತ್ತು ವಿಆರ್ ಭಾಗದಲ್ಲಿ 3ಡಿ ಕಲಾವಿದರಾಗಿ ಮೂರು ವರ್ಷ ಕೆಲಸ ಮಾಡಿ ಹಂತ ಹಂತವಾಗಿ ಬೆಳೆದು ಪ್ರಸ್ತುತ ಹೆಚ್ಸಿಎಲ್ ಕಂಪನಿಯಲ್ಲಿ ವರ್ಷಕ್ಕೆ 27 ಲಕ್ಷ ರೂ.ಗಳ ವೇತನ ಪಡೆಯುತ್ತಿದ್ದಾರೆ. ಚಿತ್ರಕಲೆಗೆ ಆಧುನಿಕ ತಂತ್ರಜ್ಞಾನದ ಸೇರ್ಪಡೆಯಿಂದಾಗಿ ಇದು ಸಾಧ್ಯವಾಗಿದೆ.
ಕಲಾ ಕೌಶಲದೊಂದಿಗೆ 30 ಪ್ರಶಸ್ತಿಗಳು : ನೇಕಾರರ ಕುಟುಂಬದವರಾದ ರಾಘವೇಂದ್ರ ಅವರಿಗೆ ಬಾಲ್ಯದಿಂದಲೂ ಕಲೆಯಲ್ಲಿ ಆಸಕ್ತಿ. ಅವರು ತಮ್ಮ ಕಲಾತ್ಮಕ ಚಿತ್ರಗಳನ್ನು ಅನೇಕ ಸ್ಥಳಗಳಲ್ಲಿ ಪ್ರದರ್ಶಿಸುತ್ತಿದ್ದರು. ಅವರ ಶ್ರಮಕ್ಕೆ ಪ್ರತಿಫಲವಾಗಿ ಈವರೆಗೆ 30 ಪ್ರಶಸ್ತಿಗಳು ಬಂದಿವೆ. ರಾಘವೇಂದ್ರ ಅವರ ಪ್ರತಿಭೆಯನ್ನು ಗುರುತಿಸಿ ಚಿತ್ರಮಯಿ ಸ್ಟೇಟ್ ಆರ್ಟ್ ಗ್ಯಾಲರಿ ಪ್ರಶಸ್ತಿ, ಪೊಟ್ಟಿ ಶ್ರೀರಾಮುಲು ವಿಶ್ವವಿದ್ಯಾಲಯದ 75ನೇ ವಾರ್ಷಿಕೋತ್ಸವದ ನಿಮಿತ್ತ ಆಯೋಜಿಸಿದ್ದ ರಾಜ್ಯಮಟ್ಟದ ಚಿತ್ರಕಲಾ ಸ್ಪರ್ಧೆಯಲ್ಲಿ ಬಹುಮಾನ, ಜಪಾನ್ ಅಂತಾರಾಷ್ಟ್ರೀಯ ಚಿತ್ರಕಲಾ ಸ್ಪರ್ಧೆಯಲ್ಲಿ ಬಹುಮಾನ ಪಡೆದಿದ್ದಾರೆ. ಕೋನಸೀಮೆ ಚಿತ್ರಕಲಾ ಪರಿಷತ್ತಿನ ಸ್ಪರ್ಧೆಗಳಲ್ಲಿ ಸತತ ಮೂರು ವರ್ಷ ಗೆದ್ದಿದ್ದಾರೆ.
ಸಿನಿಮಾವಲ್ಲದೆ ಹಲವು ಕ್ಷೇತ್ರಗಳಲ್ಲಿ ಮಿಂಚುತ್ತಿರುವ ಯುವಕ : ಇನ್ನು ರಾಘವೇಂದ್ರ ಅವರು ಸಿನಿಮಾ ಮಾತ್ರವಲ್ಲದೆ ಪ್ರಕೃತಿ ಛಾಯಾಗ್ರಹಣ, ಪುರಾತನ ಐತಿಹಾಸಿಕ ದೇವಾಲಯಗಳ ಚಿತ್ರೀಕರಣ, ಪ್ರವಾಸ, ಸಾಕ್ಷ್ಯಚಿತ್ರಗಳನ್ನು ಮಾಡುತ್ತಿದ್ದಾರೆ. ಅವರ ಇತ್ತೀಚಿನ ಸಾಕ್ಷ್ಯಚಿತ್ರ ವೀವರ್ಸ್ ಆಫ್ ಇಂಡಿಯಾವನ್ನು ದೆಹಲಿ ವಿಶ್ವವಿದ್ಯಾಲಯದ ಇಂದ್ರಪ್ರಸ್ಥ ಮಹಿಳಾ ಕಾಲೇಜಿನಲ್ಲಿ ಆಗಸ್ಟ್ 7 ರಂದು ಕೈಮಗ್ಗ ದಿನದಂದು ಪ್ರದರ್ಶಿಸಲಾಯಿತು. ಹಲವು ತೆಲುಗು ಸಿನಿಮಾಗಳಿಗೆ ಗ್ರಾಫಿಕ್ ವಿಭಾಗದಲ್ಲಿ ಸಹ ಕೆಲಸ ಮಾಡಿದ್ದಾರೆ.
ಇದನ್ನೂ ಓದಿ : 'ಚಿತ್ರಕಲಾ ಯಾತ್ರೆ ಲೈವ್ ಡ್ರಾಯಿಂಗ್'.. ತೆಲಂಗಾಣದ ಚಿತ್ರಕಲಾ ಶಿಕ್ಷಕನಿಂದ ದೇಶ ಪರ್ಯಟನೆ
