ಮುಂಬೈ: ಅಕ್ರಮ ಸಾಗಣೆ ನಿಯಂತ್ರಿಸಲು ಎಷ್ಟೇ ಕಠಿಣ ಕ್ರಮಗಳನ್ನು ಕೈಗೊಂಡರೂ ಖದೀಮರು ಮಾತ್ರ ಇನ್ನಿಲ್ಲದ ಸಾಹಸ ಮಾಡಿ ಡ್ರಗ್ಸ್ ಸಾಗಣೆ ಮಾಡುತ್ತಾರೆ. ಮುಂಬೈನಲ್ಲಿ ಉಗಾಂಡ ಪ್ರಜೆಯೊಬ್ಬ 70 ಕೊಕೇನ್ ಮಾತ್ರೆಗಳನ್ನು ಸೇವಿಸಿ ಸಾಗಣೆ ಮಾಡುತ್ತಿದ್ದಾಗ ಸಿಕ್ಕಿ ಬಿದ್ದಿದ್ದಾನೆ. ವಶಪಡಿಸಿಕೊಂಡ ಕೊಕೇನ್ ಮಾತ್ರೆಗಳ ಮೌಲ್ಯ 7 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ.
ಬ್ರೆಂಡೆನ್ ಮೆಗದ್ದೆ ಬಂಧಿತ ಉಗಾಂಡ ಪ್ರಜೆ. ಉಗಾಂಡದಿಂದ ಮುಂಬೈನ ಛತ್ರಪತಿ ಶಿವಾಜಿ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಬ್ರೆಂಡೆನ್ ಮೆಗದ್ದೆಯನ್ನು ಡ್ರಗ್ಸ್ ಸಾಗಣೆ ನಡೆಸುತ್ತಿರುವ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಬಳಿಕ ನ್ಯಾಯಾಲಯಕ್ಕೆ ಹಾಜರುಪಡಿಸಿದ ನಂತರ ವೈದ್ಯಕೀಯ ಪರೀಕ್ಷೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.
ಎಕ್ಸ್-ರೇ, ಸ್ಯ್ಕಾನಿಂಗ್, ಸೋನೋಗ್ರಫಿ ನಡೆಸಿದಾಗ ಉಗಾಂಡ ವ್ಯಕ್ತಿಯ ಹೊಟ್ಟೆಯಲ್ಲಿ ಸುಮಾರು 70 ಕೊಕೇನ್ ಮಾತ್ರೆಗಳು ಇರುವುದು ಕಂಡು ಬಂದಿದೆ. ಬಳಿಕ ಅವುಗಳನ್ನು ತೆಗೆದ ಕಂದಾಯ ಗುಪ್ತಚರ ನಿರ್ದೇಶನಾಲಯ ಅಧಿಕಾರಿಗಳು ತಮ್ಮ ವಶಕ್ಕೆ ಪಡೆದಿದ್ದಾರೆ. ಇವುಗಳು 7 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ್ದು ಎಂದು ಹೇಳಲಾಗ್ತಿದೆ. ಆರೋಪಿಯನ್ನು ಮುಂಬೈನ ಜೆಜೆ ಆಸ್ಪತ್ರೆಯಲ್ಲಿ ಪೊಲೀಸ್ ಕಸ್ಟಡಿಯಲ್ಲಿರಿಸಲಾಗಿದೆ.
ಓದಿ: ಮಾವನ ಲೈಂಗಿಕ ಕಿರುಕುಳಕ್ಕೆ ಬೇಸತ್ತು ಸೊಸೆಯಿಂದ ಹಲ್ಲೆ, ಚಿಕಿತ್ಸೆ ವೇಳೆ ಸಾವು
