ನವದೆಹಲಿ: ಸಂಸತ್‌ ಮುಂಗಾರು ಉಭಯ ಅಧಿವೇಶನಗಳು ಇಂದೂ ಕೂಡ ಪೆಗಾಸಸ್‌ಗೆ ಬಲಿಯಾಗಿವೆ. ಲೋಕಸಭೆಯಲ್ಲಿ ವಿರೋಧ ಪಕ್ಷಗಳ ಗದ್ದಲ ಕೋಲಾಹಲದಿಂದಾಗಿ ಮತ್ತೆ ನಾಳೆಗೆ ಮುಂದೂಡಿಕೆಯಾಗಿದೆ. ಪೆಗಾಸಸ್‌ ವಿಷಯದ ಬಗ್ಗೆ ಚರ್ಚೆ ನಡೆಸಬೇಕೆಂದು ವಿಪಕ್ಷಗಳು ಪಟ್ಟು ಹಿಡಿದು ಘೋಷಣೆಗಳನ್ನು ಕೂಗಿದವು. ಈ ಗದ್ದಲದ ನಡುವೆಯೇ ಕೆಳಮನೆಯಲ್ಲಿ ಕಾರ್ಖಾನೆಗಳ ನಿಯಂತ್ರಣ ತಿದ್ದುಪಡಿ ಮಸೂದೆ ಹಾಗೂ ರಾಷ್ಟ್ರೀಯ ಆಹಾರ ತಂತ್ರಜ್ಞಾನ ಉದ್ಯಮಶೀಲತೆ ಮತ್ತು ನಿರ್ವಹಣಾ ಮಸೂದೆಗಳನ್ನು ಅಂಗೀಕರಿಸಲಾಯಿತು.
ಇದಕ್ಕೂ ಮುನ್ನ ಸ್ಪೀಕರ್ ಓಂ ಬಿರ್ಲಾ, ಗಲಾಟೆಯ ನಡುವೆ ಪ್ರಶ್ನೋತ್ತರಗಳನ್ನು ಕೈಗೆತ್ತಿಕೊಂಡರು. ಆಗಲೂ ವಿಪಕ್ಷಗಳು ಗದ್ದಲವನ್ನು ಮುಂದುವರಿಸಿದ್ದರು. ಪರಿಣಾಮ ಲೋಕಸಭೆಯನ್ನು ನಾಳೆಗೆ ಮಟ್ಟಿಗೆ ಮುಂದೂಡಲಾಯಿತು.
ರಾಜ್ಯಸಭೆಯಲ್ಲೂ ಗದ್ದಲ
ಇತ್ತ ರಾಜ್ಯಸಭೆಯಲ್ಲೂ ಪೆಗಾಸಸ್‌ ವಿಷಯ ಪ್ರತಿಧ್ವನಿಸಿತು. ಸಚಿವರು, ಮಾಜಿ ಸಿಎಂಗಳು, ನ್ಯಾಯಾಧೀಶರು ಹಾಗೂ ಪತ್ರಕರ್ತರು ಸೇರಿದಂತೆ ಹಲವರ ಫೋನ್‌ ಹ್ಯಾಕಿಂಗ್ ಸಂಬಂಧ ಪೆಗಾಸಸ್‌ ಬಗ್ಗೆ ಚರ್ಚೆಗೆ ಪಟ್ಟು ಹಿಡಿದವು. ಘೋಷಣೆಗಳನ್ನು ಕೂಗಿದರಲ್ಲದೆ, ಪ್ರತಿಭಟನೆ ನಡೆಸಿದರು. ಸದನವನ್ನು ಹಲವಾರು ಬಾರಿ ಮುಂದೂಡಲಾಗಿತ್ತು. ಪುನಾರಂಭಗೊಂಡಾಗಲೂ ಪದೇ ಪದೆ ಗದ್ದಲ ಉಂಟಾದ ಹಿನ್ನೆಲೆಯಲ್ಲಿ ಸಭಾಪತಿಗಳು ಕಲಾಪವನ್ನು ನಾಳೆಗೆ ಮುಂದೂಡಿದರು.
ಹುತಾತ್ಮರಿಗೆ ಗೌರವ
ಜಂಟಿ ಕಲಾಪಗಳ ಪ್ರಾರಂಭದಲ್ಲಿ ಕಾರ್ಗಿಲ್ ವಿಜಯ್ ದಿವಾಸ್ ಹಿನ್ನೆಲೆಯಲ್ಲಿ ಹುತಾತ್ಮರಿಗೆ ಗೌರವ ಸಲ್ಲಿಸಲಾಯಿತು. ದೇಶವನ್ನು ಉಳಿಸಲು ಸೈನಿಕರು ಮಾಡಿದ ತ್ಯಾಗವನ್ನು ಅವರು ಶ್ಲಾಘಿಸಿದರು. ಈ ಸಂದರ್ಭದಲ್ಲಿ ಎಲ್ಲಾ ಸಂಸದರು ಕೆಲವು ಕ್ಷಣ ಮೌನ ಆಚರಿಸಿದರು.
ಮೀರಾಬಾಯಿಗೆ ಅಭಿನಂದನೆ
ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ವೇಟ್‌ಲಿಫ್ಟರ್ ಮೀರಾಬಾಯಿ ಚಾನು ಅವರಿಗೆ ಸಂಸತ್ತಿನ ಉಭಯ ಸದನಗಳು ಅಭಿನಂದನೆ ಸಲ್ಲಿಸಿದವು. ರಾಜ್ಯಸಭಾಧ್ಯಕ್ಷ ಎಂ.ವೆಂಕಯ್ಯ ನಾಯ್ಡು, 21 ವರ್ಷಗಳ ಸುದೀರ್ಘ ನಂತರ ವೇಟ್‌ಲಿಫ್ಟಿಂಗ್‌ನಲ್ಲಿ ಪದಕ ಗೆದ್ದಿದ್ದನ್ನು ನೆನಪಿಸಿಕೊಂಡರು. ಭವಿಷ್ಯದ ಪೀಳಿಗೆಗೆ ಈ ಪ್ರದರ್ಶನ ಸ್ಫೂರ್ತಿ ಎಂದು ಮೀರಾಬಾಯಿ ಅವರನ್ನು ಶ್ಲಾಘಿಸಿದರು.
ಇದನ್ನೂ ಓದಿ: ಭಾರತೀಯ ಪ್ರಜಾಪ್ರಭುತ್ವದ ಅಪಖ್ಯಾತಿಗೆ ನಡೆದ ಪ್ರಯತ್ನವೇ ಫೋನ್‌ ಹ್ಯಾಕಿಂಗ್: ಕೇಂದ್ರ ಸಚಿವ ವೈಷ್ಣವ್‌
