ಎರ್ನಾಕುಲಂ (ಕೇರಳ): ಕೃತಕ ಗರ್ಭಧಾರಣೆಗೆ ಈಗಿರುವ ವಯೋಮಿತಿಯನ್ನು ಮರುಪರಿಶೀಲಿಸುವಂತೆ ಕೇಂದ್ರ ಸರ್ಕಾರಕ್ಕೆ ಕೇರಳ ಹೈಕೋರ್ಟ್ ಸೂಚನೆ ನೀಡಿದೆ. ಸಂತಾನ ಪಡೆಯಲು ಹಲವು ದಂಪತಿ ಸಲ್ಲಿಸಿದ ಅರ್ಜಿಗಳ ವಿಚಾರಣೆ ನಡೆಸಿದ ಕೋರ್ಟ್, ಈಗಿರುವ ಮಾನದಂಡದ ಆಧಾರಕ್ಕಿಂತಲೂ ಹೆಚ್ಚಿನ ವಯೋಮಾನದ ಅವಕಾಶ ನೀಡಲು ಸಾಧ್ಯವೇ ಎಂಬುದನ್ನು ಪರಿಶೀಲಿಸಿ ವರದಿ ಸಲ್ಲಿಸಿ ಎಂದು ಸೂಚಿಸಿದೆ. ಸದ್ಯ ಕೃತಕ ಗರ್ಭಧಾರಣೆ ಹೊಂದಲು ದೇಶದಲ್ಲಿ ಮಹಿಳೆಯ ವಯಸ್ಸು 50 ಮತ್ತು ಪುರುಷನ ವಯಸ್ಸು 55 ಇದೆ. ಇದು ಈಗಿನ ಜೀವನಶೈಲಿಗೆ ಸಾಕಾಗುತ್ತಿಲ್ಲ. ಹೀಗಾಗಿ ಈ ವಯೋಮಾನದ ಮಿತಿಯನ್ನು ಹೆಚ್ಚಿಸಬೇಕು ಎಂದು ಕೋರಿ ಹಲವು ಅರ್ಜಿಗಳು ಹೈಕೋರ್ಟ್ಗೆ ಬಂದಿವೆ.
ಈ ಅರ್ಜಿಗಳ ವಿಚಾರಣೆ ನಡೆಸಿದ ಕೋರ್ಟ್ ಕೃತಕ ಗರ್ಭಧಾರಣೆ ಕುರಿತು ಕೇಂದ್ರ ಸರ್ಕಾರಕ್ಕೆ ಸಲಹೆ ನೀಡುವ ನ್ಯಾಷನಲ್ ಅಸಿಸ್ಟೆಡ್ ರಿಪ್ರೊಡಕ್ಟಿವ್ ಟೆಕ್ನಾಲಜಿ ಮತ್ತು ಬಾಡಿಗೆ ತಾಯ್ತನ ಮಂಡಳಿ ಈ ಕುರಿತು ಅಧ್ಯಯನ ನಡೆಸಿ, ಮೂರು ತಿಂಗಳಲ್ಲಿ ಕೇಂದ್ರ ಸರ್ಕಾರಕ್ಕೆ ವರದಿ ನೀಡಬೇಕು ಎಂದು ನ್ಯಾಯಮೂರ್ತಿ ವಿ.ಜಿ.ಅರುಣ್ ಅವರು ಆದೇಶಿಸಿದ್ದಾರೆ. 2022 ರ ಜನವರಿ 25 ರಂದು ಜಾರಿಯಾದ ಹೊಸ ನಿಯಮದಂತೆ 55 ವರ್ಷಕ್ಕೆ ವಯಸ್ಸಿನ ಮಿತಿಯನ್ನು ನಿಗದಿಪಡಿಸಿದೆ. ಇದರ ಕಡ್ಡಾಯ ಪಾಲನೆ ಸಾಧ್ಯವಿಲ್ಲ. ಈಗಾಗಲೇ ಚಿಕಿತ್ಸೆಯಲ್ಲಿರುವ ದಂಪತಿ ಈ ನಿಯಮದಿಂದ ತೊಂದರೆಗೆ ಒಳಗಾಗಲಿದ್ದಾರೆ. ಇದು ಸಂವಿಧಾನ ನೀಡಿರುವ ವೈಯಕ್ತಿಕ ಸ್ವಾತಂತ್ರ್ಯಕ್ಕೂ ವಿರುದ್ಧವಾಗಿದೆ ಎಂದು ಅರ್ಜಿಯಲ್ಲಿ ತಕರಾರು ಸಲ್ಲಿಸಲಾಗಿತ್ತು.
ಮಕ್ಕಳಿಗೆ ಜನ್ಮ ನೀಡುವುದು ಮತ್ತು ಕುಟುಂಬವನ್ನು ಬೆಳೆಸುವುದು ಮೂಲಭೂತ ಹಕ್ಕಾಗಿದೆ. ವಯಸ್ಸಿನ ಮಿತಿಯು ಆ ಹಕ್ಕನ್ನು ಮೊಟಕುಗೊಳಿಸುತ್ತದೆ. ಇದಲ್ಲದೇ, ಪ್ರಸ್ತುತ ವೈದ್ಯಕೀಯ ಚಿಕಿತ್ಸೆ ಪಡೆಯುತ್ತಿರುವವರಿಗೆ ರಿಯಾಯಿತಿ ನೀಡದಿರುವ ನಿಯಮ ಸರ್ವಾಧಿಕಾರ ಮತ್ತು ಅತಾರ್ಕಿಕವಾಗಿದೆ. ನಿಯಮ ಜಾರಿಗೆ ಬಂದಾಗ ಅನೇಕರು ಚಿಕಿತ್ಸೆ ಪಡೆಯುತ್ತಿರುವುದು ಹೈಕೋರ್ಟ್ ಗಮನಕ್ಕೆ ತರಲಾಗಿದೆ.
ಏನಿದು ಕೃತಕ ಗರ್ಭಧಾರಣೆ?: ಕೃತಕ ಗರ್ಭಧಾರಣೆ ಎಂದರೆ ಗರ್ಭಿಣಿಯಾಗಲು ಸ್ತ್ರೀಯರಲ್ಲಿ ವೀರ್ಯವನ್ನು ಉದ್ದೇಶಪೂರ್ವಕವಾಗಿ ಪರಿಚಯಿಸುವ ಪ್ರಕ್ರಿಯೆ. ಇದನ್ನು ಹಲವಾರು ವಿಧಾನಗಳ ಮೂಲಕ ಮಾಡಬಹುದಾಗಿದೆ. ಉದಾಹರಣೆಗೆ ಇಂಟ್ರಾಸರ್ವಿಕಲ್ ಇನ್ಸೆಮಿನೇಷನ್, ಇಂಟ್ರಾಟೂರಿನ್ ಇನ್ಸೆಮಿನೇಷನ್ ಅಥವಾ ಇತರ ತಂತ್ರಗಳು.
ಪುತ್ರ ಸಂತಾನವಾಗದ ದಂಪತಿ ಇನ್ನೊಬ್ಬ ಸಶಕ್ತ ಗಂಡಿನಿಂದ ವೀರ್ಯವನ್ನು ಪಡೆದು ಗರ್ಭಧರಿಸಲು ಪೂರ್ಣವಾಗಿ ಫಿಟ್ ಇರುವ ಮಹಿಳೆಗೆ ಅದನ್ನು ಇಂಜೆಕ್ಟ್ ಮಾಡಲಾಗುತ್ತದೆ. ಪಾಲುದಾರರ ಆರೋಗ್ಯವನ್ನು ಖಚಿತಪಡಿಸಿಕೊಳ್ಳಲು ವೈದ್ಯಕೀಯ ಪರೀಕ್ಷೆಗಳನ್ನು ನಡೆಸಬೇಕು. ಈ ಪ್ರಕ್ರಿಯೆಗೆ ದಂಪತಿಗಳು ದಾನಿಗಳಾಗಿರಬಾರದು ಎಂಬುದಕ್ಕೆ ಯಾವುದೇ ವೈದ್ಯಕೀಯ ಕಾರಣಗಳಿಲ್ಲ. ವೀರ್ಯಾಣುವನ್ನು ವೀರ್ಯ ಬ್ಯಾಂಕ್ ಮೂಲಕವೂ ಪಡೆಯಬಹುದಾಗಿದೆ. ಅವುಗಳನ್ನು ಈಗಾಗಲೇ ಗುಣಮಟ್ಟದ ಪರೀಕ್ಷೆ ನಡೆಸಿ ಸಂಗ್ರಹಿಸಲಾಗಿರುತ್ತದೆ. ಇಂಜೆಕ್ಟ್ ಅಲ್ಲದೇ ವೀರ್ಯವನ್ನು ವಿವಿಧ ವಿಧಾನಗಳ ಮೂಲಕವೂ ಮಹಿಳೆ ಪಡೆದು ಗರ್ಭ ಧರಿಸಬಹುದು.
ಇದನ್ನೂ ಓದಿ: 24 ಗಂಟೆಯಲ್ಲಿ 2ನೇ ಸಲ ಕೋಲ್ಕತ್ತಾ ವಂದೇ ಭಾರತ್ ರೈಲಿಗೆ ಕಲ್ಲು, ಕಿಟಕಿಗಳು ಜಖಂ
