ನವದೆಹಲಿ : ದೇಶದಲ್ಲಿ ಕೋವಿಡ್‌ನಿಂದಾಗಿ ಮೃತಪಟ್ಟವರ ಸಂಖ್ಯೆ ಸರ್ಕಾರ ನೀಡಿರುವ ದಾಖಲೆಗಿಂತ ಹತ್ತು ಪಟ್ಟು ಹೆಚ್ಚಿದೆ ಎಂಬ ಆಘಾತಕಾರಿ ವರದಿಯೊಂದು ಬಹಿರಂಗವಾಗಿದೆ. ಆಧುನಿಕ ಭಾರತದಲ್ಲಿ ಈ ಸಾವು ಅತ್ಯಂತ ದೊಡ್ಡ ದುರಂತ ಎನ್ನಲಾಗಿದೆ. ದಕ್ಷಿಣ ಏಷ್ಯಾದ ರಾಷ್ಟ್ರ ಭಾರತದಲ್ಲಿ ವಿನಾಶಕಾರಿ ವೈರಸ್‌ ವ್ಯಾಪಕವಾಗಿದೆ ಎಂದು ಸಂಶೋಧನೆ ಹೇಳಿದೆ.
ಭಾರತದಲ್ಲಿ 4,14,000 ಸಾವಿರಕ್ಕೂ ಹೆಚ್ಚು ಮಂದಿ ಕೋವಿಡ್‌ಗೆ ಬಲಿಯಾಗಿದ್ದಾರೆ. ಆದರೆ, ಸರ್ಕಾರ ಸರಿಯಾದ ಮಾಹಿತಿ ನೀಡದೆ ದಾರಿ ತಪ್ಪಿಸುತ್ತಿದೆ ಎಂದು ಆರೋಪಿಸಲಾಗಿದೆ. ಇಂದು ಬಿಡುಗಡೆಯಾದ ವರದಿ ಪ್ರಕಾರ, 2020ರ ಜನವರಿಯಿಂದ 2021ರ ಜೂನ್‌ವರೆಗೆ ದಾಖಲಾಗಿರುವ ಮೃತರ ಸಂಖ್ಯೆ ಹಾಗೂ ಅಂದಾಜಿಸಲಾಗಿರುವ ಸಂಖ್ಯೆಗೆ 30 ಲಕ್ಷದಿಂದ 40 ಲಕ್ಷದ 70 ಸಾವಿರ ಅಂತರವಿದೆ. ನಿಖರವಾದ ಸಾವಿನ ಸಂಖ್ಯೆ ಅಧಿಕೃತವಾಗಿ ಘೋಷಿಸಿರುವುದಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಇರಬಹುದು ಎಂದು ಹೇಳಿದೆ.
ಕೇಂದ್ರ ಸರ್ಕಾರದ ಮಾಜಿ ಮುಖ್ಯ ಆರ್ಥಿಕ ಸಲಹೆಗಾರ ಅರವಿಂದ್‌ ಸುಬ್ರಮಣಿಯನ್, ಸೆಂಟರ್ ಫಾರ್ ಗ್ಲೋಬಲ್ ಡೆವಲಪ್‌ಮೆಂಟ್ ಮತ್ತು ಹಾರ್ವರ್ಡ್ ವಿಶ್ವವಿದ್ಯಾಲಯದ ಇತರ ಇಬ್ಬರು ಸಂಶೋಧಕರು ಈ ವರದಿಯನ್ನು ಪ್ರಕಟಿಸಿದ್ದಾರೆ. ಆಸ್ಪತ್ರೆಗಳಲ್ಲಿ ಹೆಚ್ಚಿನ ಸಾವು-ನೋವು ಸಂಭವಿಸಿರುವುದರಿಂದ ಮೃತರ ಸಂಖ್ಯೆಯಲ್ಲಿ ತಪ್ಪಿರಬಹುದು. ವಿಶೇಷವಾಗಿ ಈ ವರ್ಷದ ಆರಂಭದಲ್ಲಿ ಕೋವಿಡ್‌ನಿಂದ ಗರಿಷ್ಠ ಸಾವು ಉಲ್ಬಣವಾಗಿದೆ ಎಂದು ಹೇಳಿದೆ.
ನಿಜವಾದ ಸಾವುಗಳು ನೂರಾರು ಅಲ್ಲ ಲಕ್ಷಾಂತರ ಸಂಖ್ಯೆಯಲ್ಲಿರಬಹುದು. ವಿಭಜನೆ ಮತ್ತು ಸ್ವಾತಂತ್ರ್ಯದ ನಂತರದ ಭಾರತದಲ್ಲಿ ನಡೆದಿರುವ ಅತ್ಯಂತ ಭೀಕರ ಮಾನವ ದುರಂತವಾಗಿದೆ ಎಂದು ವರದಿಯಲ್ಲಿ ಹೇಳಿದೆ. 1947ರಲ್ಲಿ ಬ್ರಿಟಿಷ್ ಆಳ್ವಿಕೆ ವೇಳೆ ಭಾರತೀಯ ಉಪಖಂಡವನ್ನು ಸ್ವತಂತ್ರ ಭಾರತ ಮತ್ತು ಪಾಕಿಸ್ತಾನವನ್ನು ವಿಭಜಿಸುವ ವೇಳೆ ಹಿಂದೂಗಳು ಮತ್ತು ಮುಸ್ಲಿಮರ ಗುಂಪುಗಳ ಪರಸ್ಪರ ಹೊಡೆದಾಟದಲ್ಲಿ 10 ಲಕ್ಷ ಮಂದಿಯನ್ನು ಹತ್ಯೆ ಮಾಡಲಾಗಿತ್ತು.
ಇದನ್ನೂ ಓದಿ: ರಾಜ್ಯದಲ್ಲಿ ಕೋವಿಡ್ ನಿಯಂತ್ರಣಕ್ಕೆ ಬಂದರೂ ತಗ್ಗದ Black Fungus
ಭಾರತದಲ್ಲಿ ವೈರಸ್‌ನಿಂದ ಮೃತಪಟ್ಟಿರುವ ಸಂಖ್ಯೆಯನ್ನು ಮೂರು ವಿಧಾನಗಳಲ್ಲಿ ಲೆಕ್ಕಾಚಾರ ಹಾಕಲಾಗಿದೆ. 7 ರಾಜ್ಯಗಳಲ್ಲಿ ಜನನ ಮತ್ತು ಮರಣಗಳನ್ನು ದಾಖಲಿಸುವ ನಾಗರಿಕ ನೋಂದಣಿ ವ್ಯವಸ್ಥೆಯ ಡೇಟಾ, ಭಾರತದಲ್ಲಿ ರಕ್ತ ಪರೀಕ್ಷೆಗಳು ಜೊತೆಗೆ ಜಾಗತಿಕ COVID-19 ಸಾವಿನ ಪ್ರಮಾಣ ಮತ್ತು ಸುಮಾರು 9,00,000 ಜನರನ್ನು ವರ್ಷದಲ್ಲಿ ಮೂರು ಬಾರಿ ಆರ್ಥಿಕ ಸಮೀಕ್ಷೆಗೆ ಒಳಪಡಿಸಲಾಗಿದೆ.
ಕೋವಿಡ್‌ನಿಂದ ಇತರ ರಾಷ್ಟ್ರಗಳಲ್ಲೂ ಸಾವುಗಳು ಸಂಭವಿಸಿದೆ ಎಂದು ನಂಬಲಾಗಿದ್ದರೂ, ವಿಶ್ವದ ಎರಡನೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ (1.4 ಬಿಲಿಯನ್) ಭಾರತವು ಹೆಚ್ಚಿನ ಮೃತರ ಸಂಖ್ಯೆಯ ಅಂತರವನ್ನು ಹೊಂದಿದೆ ಎಂದು ನಂಬಲಾಗಿದೆ.
ದಕ್ಷಿಣ ಭಾರತದ ವೆಲ್ಲೂರಿನ ಕ್ರಿಶ್ಚಿಯನ್ ಮೆಡಿಕಲ್ ಕಾಲೇಜಿನಲ್ಲಿ ವೈರಸ್‌ಗಳನ್ನು ಅಧ್ಯಯನ ಮಾಡುವ ಡಾ. ಜಾಕೋಬ್ ಜಾನ್, ಅಸೋಸಿಯೇಟೆಡ್ ಪ್ರೆಸ್‌ನ ವರದಿಯನ್ನು ಪರಿಶೀಲಿಸಿದ್ದು, COVID-19 ದೇಶದ ಆರೋಗ್ಯ ವ್ಯವಸ್ಥೆ ಮೇಲೆ ಬೀರಿದ ವಿನಾಶಕಾರಿ ಪರಿಣಾಮವನ್ನು ಇದು ಒತ್ತಿ ಹೇಳುತ್ತದೆ ಎಂದು ಹೇಳಿದ್ದಾರೆ.
