ನವದೆಹಲಿ: ರಾಷ್ಟ್ರ ರಾಜಧಾನಿ ನಿನ್ನೆ ನಿಗಿ ನಿಗಿ ಕೆಂಡವಾಗಿತ್ತು. ಭಾನುವಾರ ಬಿಸಿ ದಿನವಾಗಿ ಪರಿಣಮಿಸಿತು. ಸಫ್ದರ್‌ಜಂಗ್ ಮೇಲ್ವಿಚಾರಣಾ ಕೇಂದ್ರದಲ್ಲಿ ಗರಿಷ್ಠ ತಾಪಮಾನ 43.9 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿತ್ತು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಭಾರತೀಯ ಹವಾಮಾನ ಇಲಾಖೆ ಪ್ರಕಾರ, ನಗರದಲ್ಲಿ ಶೇಕಡಾ 41 ರಷ್ಟು ಆರ್ದ್ರತೆ ಇತ್ತು ಮತ್ತು ಹವಾಮಾನ ಸಾಮಾನ್ಯವಾಗಿತ್ತು ಎಂದು ಹೇಳಿದೆ.
ನವದೆಹಲಿಯಲ್ಲಿ ಭಾನುವಾರ ಬೆಳಗ್ಗೆ 5.23 ಕ್ಕೆ ಸೂರ್ಯೋದಯ ಮತ್ತು 7.20 ಕ್ಕೆ ಸೂರ್ಯಾಸ್ತವಾಗಿದೆ. ದೆಹಲಿಯ ಇತರ ಪ್ರದೇಶಗಳಲ್ಲಿ ಗರಿಷ್ಠ ತಾಪಮಾನ ದಾಖಲಾಗಿದೆ. ಅಯನಗರ್ 44.4, ಲೋಧಿ ರಸ್ತೆ 44, ಪಾಲಂ 44.1, ರಿಡ್ಜ್ 45.8, ಜಾಫರ್‌ಪುರ 44.6, ಮುಂಗೇಶ್‌ಪುರ 46.2, ನಜಾಫ್‌ಗಡ್ 46.4, ಪಿತಾಂಪುರ 45.8 ಮತ್ತು ಸಲ್ವಾನ್ ಪಬ್ಲಿಕ್ ಸ್ಕೂಲ್ ಬಳಿ 43.2 ಡಿಗ್ರಿ ಸೆಲ್ಸಿಯಸ್ ತಾಪಮಾನ ಇತ್ತು.
ಹೀಗಾಗಿ ರಾಷ್ಟ್ರರಾಜಧಾನಿ ಜನ ಮನೆಯಿಂದ ಹೊರ ಬರಲು ತುಸು ಹಿಂಜರಿಕೆ ತೋರಿದರು. ಇನ್ನು IMD ಪ್ರಕಾರ, ಪಂಜಾಬ್, ಹರಿಯಾಣ, ದೆಹಲಿ, ಪೂರ್ವ ಉತ್ತರ ಪ್ರದೇಶ, ಹಿಮಾಚಲ ಪ್ರದೇಶ, ಉತ್ತರಾಖಂಡ್‌ನಲ್ಲಿ ಬಿಸಿಲಿನ ಪ್ರಖರತೆ ಇನ್ನು ಕೆಲ ದಿನ ಹೀಗೆ ಮುಂದುವರೆಯಲಿದೆ.
ಮುಂದಿನ 2 ದಿನಗಳಲ್ಲಿ ವಾಯವ್ಯ ಭಾರತದಲ್ಲಿ ಗರಿಷ್ಠ ತಾಪಮಾನದಲ್ಲಿ ಯಾವುದೇ ಮಹತ್ವದ ಬದಲಾವಣೆ ಕಂಡು ಬರುವುದಿಲ್ಲ ಮತ್ತು ನಂತರ ಕ್ರಮೇಣ 2-3 ಡಿಗ್ರಿ ಸೆಲ್ಸಿಯಸ್ ಕುಸಿಯುತ್ತದೆ ಎಂದು ಭಾರತೀಯ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.
