ಪಾಲಕ್ಕಾಡ್: ಇಲ್ಲಿನ 10 ನೇ ತರಗತಿ ವಿದ್ಯಾರ್ಥಿಯೋರ್ವ ನಟ, ಶಾಸಕ ಎಂ.ಮುಖೇಶ್ ಅವರಿಗೆ ಸತತವಾಗಿ ಕರೆ ಮಾಡಿ ಸಹಾಯ ನೀಡುವಂತೆ ದೂರವಾಣಿ ಮೂಲಕ ಒತ್ತಾಯಿಸುತ್ತಿದ್ದ. ಈ ವೇಳೆ ಕೋಪಗೊಂಡ ಮುಖೇಶ್ ಫೋನ್ ಮೂಲಕ ಕಿರುಚಾಡಿ ವಿವಾದಕ್ಕೆ ಗುರಿಯಾಗಿದ್ದರು. ಇದೀಗ ಈ ವಿಚಾರಕ್ಕೆ ಸಂಬಂಧಿಸಿದಂತೆ ವಿದ್ಯಾರ್ಥಿ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದಾನೆ.
ಶಾಸಕರಿಗೆ ಕರೆ ಮಾಡಿದ ವಿದ್ಯಾರ್ಥಿ ಪಾಲಕ್ಕಾಡ್ ಜಿಲ್ಲೆಯ ಒಟ್ಟಪ್ಪಲಂನಲ್ಲಿ 10 ನೇ ತರಗತಿ ವ್ಯಾಸಂಗ ಮಾಡುತ್ತಿದ್ದಾನೆ. "ಆನ್ಲೈನ್ ಕ್ಲಾಸ್ಗೆ ಭಾಗಿಯಾಗಲು ಸಾಧ್ಯವಾಗದ ವಿದ್ಯಾರ್ಥಿಗಳಿಗೆ ಸಹಾಯ ಮಾಡುವಂತೆ ಜಿಲ್ಲೆಯ ಪ್ರಸಿದ್ಧ ವ್ಯಕ್ತಿಗಳ ಬಳಿ ಕೇಳುವಂತೆ ಶಿಕ್ಷಕರು ತಿಳಿಸಿದ್ದರು. ಹೀಗಾಗಿ ನಾನು ಸತತವಾಗಿ ಮುಖೇಶ್ ಸರ್ಗೆ ಕರೆ ಮಾಡಿದೆ. ನಾನು ಸುಮಾರು 6 ಬಾರಿ ಕರೆ ಮಾಡಿದ್ದೇನೆ. ಇದರಿಂದ ಅವರು ಕೋಪಗೊಂಡರು. ಯಾರಾದರೂ ಕೋಪಗೊಳ್ಳಬಹುದು" ಎಂದು ಹೇಳಿದ್ದಾನೆ.
ಇದನ್ನು ಓದಿ: ಸಹಾಯ ಕೋರಿ ಸತತ ಫೋನ್ ಕಾಲ್.. ವಿದ್ಯಾರ್ಥಿಗೆ ಹೀಗ್ ಮಾಡೋದಾ ಕೊಲ್ಲಂ ಶಾಸಕ ಮುಖೇಶ್?
ದೂರು ನೀಡಲು ಕರೆ ಮಾಡಿದ ವಿದ್ಯಾರ್ಥಿಗೆ ಶಾಸಕ ಮುಖೇಶ್ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾರೆ ಎಂದು ಆರೋಪಿಸಲಾಗಿತ್ತು. ಆದರೆ ಈ ಆರೋಪವನ್ನು ತಳ್ಳಿಹಾಕಿದ ಶಾಸಕ, ಮಗುವಿನ ಜೊತೆ ಕೆಟ್ಟ ಭಾಷೆಯಲ್ಲಿ ಮಾತನಾಡುವ ವ್ಯಕ್ತಿಯಲ್ಲ. ಒತ್ತಾಯಪೂರ್ವಕವಾಗಿ ಫೋನ್ ಮಾಡಬೇಡ ಎಂದು ಎಚ್ಚರಿಕೆ ನೀಡಿದ್ದೇನೆ ಅಷ್ಟೇ ಎಂದು ಸ್ಪಷ್ಟಪಡಿಸಿದ್ದಾರೆ.
ಫೋನ್ ಕರೆ ವಿವಾದದ ನಂತರ ಸಿಪಿಎಂ ಮುಖಂಡರು ಮತ್ತು ಪಾಲಕ್ಕಾಡ್ ಸಂಸದ ವಿ.ಕೆ.ಶ್ರೀಕಂದನ್ ಈ ವಿಷಯದಲ್ಲಿ ಮಧ್ಯಪ್ರವೇಶಿಸಿದರು. "ಈ ವಿವಾದದಲ್ಲಿ ಯಾವುದೇ ಕೆಟ್ಟ ಉದ್ದೇಶವಿಲ್ಲ. ಎಲ್ಲವನ್ನೂ ಪರಿಹರಿಸಲಾಗಿದೆ" ಎಂದು ಒಟ್ಟಪ್ಪಲಂ ಮಾಜಿ ಶಾಸಕ ಹಮ್ಸಾ ಹೇಳಿದರು.
