ಹೈದರಾಬಾದ್: ಸೈಕಲ್ ಮೂಲಕ ಆಹಾರವನ್ನು ಗ್ರಾಹಕರಿಗೆ ತಲುಪಿಸುತ್ತಿದ್ದ ಯುವಕನ ಸುದ್ದಿ ಇತ್ತೀಚೆಗೆ ರಾಷ್ಟ್ರಮಟ್ಟದಲ್ಲಿ ಸುದ್ದಿಯಾಗಿತ್ತು. ಅಷ್ಟೇ ಅಲ್ಲದೆ, ಸೋಷಿಯಲ್ ಮೀಡಿಯಾದಲ್ಲೂ ವಿಡಿಯೋ ವೈರಲ್ ಆಗಿತ್ತು. ಇದೀಗ ಆ ಯುವಕನಿಗೆ 'ದಿ ಗ್ರೇಟ್ ಹೈದರಾಬಾದ್ ಫುಡ್ ಆ್ಯಂಡ್ ಟ್ರಾವೆಲ್ ಕ್ಲಬ್ ಬೈಕ್ ನೀಡಿ ಆತನ ಕೆಲಸಕ್ಕೆ ಸಹಾಯ ಮಾಡಿದೆ.
ಹೈದರಾಬಾದ್‌ನ ಮುಹಮ್ಮದ್ ಅಕೀಲ್ ಎಂಬ ಯುವಕ ಕಳೆದ ವಾರ ಇಲ್ಲಿನ ಕೋಟಿ ಪ್ರದೇಶದ ಜೊಮ್ಯಾಟೋ ಗ್ರಾಹಕರಿಗೆ ಆಹಾರವನ್ನು ತಲುಪಿಸುವಾಗ ತಡವಾಗಿತ್ತು. ಈ ಬಳಿಕ ಗ್ರಾಹಕರಾದ ರಾಬಿನ್ ಮುಖೇಶ್ ಎಂಬವರು ಆರ್ಡರ್ ಮಾಡಿದ ಆಹಾರ ತಕ್ಷಣ ಬರದಿದ್ದನ್ನು ಪ್ರಶ್ನಿಸಿದಾಗ, ಅಕೀಲ್ ಬಳಿ ಬೈಕ್ ಇಲ್ಲ ಬದಲಾಗಿ ಆತ ಸೈಕಲ್ ಮುಖಾಂತರ ಆರ್ಡರ್ ಪೂರೈಸಿರುವುದಾಗಿ ತಿಳಿದುಬಂದಿತ್ತು.
ಈ ಬಳಿಕ ಮುಖೇಶ್ ಸೋಷಿಯಲ್ ಮೀಡಿಯಾದಲ್ಲಿ ಅಕೀಲ್ ಬಗ್ಗೆ ಪೋಸ್ಟ್ ಹಾಕಿದ್ದರು. ಇನ್ನು ಈ ಹಿಂದೆ ಈಟಿವಿ ಭಾರತ ಮಾಧ್ಯಮವೂ ಸಹ ಅಕೀಲ್ ಬಗ್ಗೆ ಸುದ್ದಿ ಪ್ರಕಟ ಮಾಡಿತ್ತು. ಇನ್ನು ಮುಹಮ್ಮದ್ ಅಕೀಲ್ ಎಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದು, ಶಿಕ್ಷಣ ಮುಂದುವರೆಸಲು ಆಹಾರ ವಿತರಣಾ ಹುಡುಗನಾಗಿ ಅರೆಕಾಲಿಕ ಕೆಲಸ ಮಾಡುತ್ತಿದ್ದಾನೆ.
ಇನ್ನು ಅಕೀಲ್ ವಿಡಿಯೋ ವೈರಲ್ ಆಗಿದ್ದನ್ನು ಕಂಡ 'ದಿ ಗ್ರೇಟ್ ಹೈದರಾಬಾದ್ ಫುಡ್ ಆ್ಯಂಡ್ ಟ್ರಾವೆಲ್ ಕ್ಲಬ್' ತಂಡದ ಸದಸ್ಯರು ತಕ್ಷಣ ಸಹಾಯಕ್ಕಾಗಿ ಧಾವಿಸಿ, ಆತನಿಗೆ ಟಿವಿಎಸ್ ಎಕ್ಸ್‌ಎಲ್ ಬೈಕ್ನ್ನು ನೀಡಿದ್ದಾರೆ.
