1,123 ಕೆ.ಜಿ ಈರುಳ್ಳಿ ಮಾರಿದ ರೈತನಿಗೆ ಉಳಿದದ್ದು ಕೇವಲ 13 ರೂಪಾಯಿ ಮಾತ್ರ!

ಸೊಲ್ಲಾಪುರ ಜಿಲ್ಲೆಯ ರೈತ ಬಾಪು ಕಾವಡೆ ಅವರು ಸುಮಾರು 1,123 ಕೆಜಿ ಈರುಳ್ಳಿ ಮಾರಾಟ ಮಾಡಿ ರೂ. 1665 ಅನ್ನು ಪಡೆದರು. ಆದರೆ, ಸರಕು ಸಾಗಣೆ, ವಾಹನ ದರ ಸೇರಿದಂತೆ ಕೆಲ ಖರ್ಚುವೆಚ್ಚ ಕಳೆದ ನಂತರ ರೈತ ಬಾಪು ಕಾವಡೆ ಅವರಿಗೆ ಕೇವಲ 13 ರೂಪಾಯಿ ಮಾತ್ರ ಉಳಿದಿದೆ.

ಸೊಲ್ಲಾಪುರ(ಮಹಾರಾಷ್ಟ್ರ): ಆಗಾಗ್ಗೆ ಈರುಳ್ಳಿ ದರ ಗಗನಕ್ಕೇರೋ ಮೂಲಕ ಗ್ರಾಹಕರ ಕಣ್ಣಲ್ಲಿ ನೀರು ತರಿಸೋದು ಸಾಮಾನ್ಯ. ಆದ್ರೆ ಮಹಾರಾಷ್ಟ್ರ ರೈತನೋರ್ವನಿಗೆ ಈರುಳ್ಳಿ ತಂದ ಲಾಭದ ಮೊತ್ತ ಕಣ್ಣೀರು ತರಿಸಿದೆ. ಹೌದು, 1,123 ಕೆ.ಜಿ ಈರುಳ್ಳಿ ಮಾರಾಟ ಮಾಡಿದ್ದ ರೈತನಿಗೆ ಕೇವಲ 13 ರೂ. ಲಾಭವಾಗಿ ಬಂದಿದೆ. ಇದರಿಂದ ರೈತ ಕಂಗಾಲಾಗಿದ್ದು, ಅವರ ಈರುಳ್ಳಿ ಮಾರಾಟದ ರಸೀದಿ ​ವೈರಲ್ ಆಗಿದೆ.

ಈ ಕುರಿತು ಮಾತನಾಡಿರುವ ರೈತ ಮುಖಂಡ ರಾಜು ಶೆಟ್ಟಿ ಎಂಬುವರು ಗದ್ದೆಯಲ್ಲಿ ಬೆವರು ಸುರಿಸಿ ಬೆಳೆದ ಬೆಳೆಗೆ ಬೆಲೆ ಇಲ್ಲವೇ ಎಂದು ಪ್ರಶ್ನಿಸಿದ್ದಾರೆ. ಎರಡು ದಿನಗಳ ಹಿಂದೆ ಸೊಲ್ಲಾಪುರ ಜಿಲ್ಲೆಯ ರೈತ ಬಾಪು ಕಾವಡೆ ಅವರು ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯ ವ್ಯಾಪಾರಿ ರುದ್ರೇಶ ಪಾಟೀಲ ಎಂಬುವರಿಗೆ 24 ಚೀಲ ಈರುಳ್ಳಿ ಮಾರಾಟ ಮಾಡಿದ್ದರು. ಈರುಳ್ಳಿ ಕಡಿಮೆ ದರಕ್ಕೆ ಮಾರಾಟವಾಯಿತು. ಸುಮಾರು 1,123 ಕೆಜಿ ಈರುಳ್ಳಿ ಮಾರಾಟ ಮಾಡಿ ರೂ. 1,665 ಅನ್ನು ಪಡೆದರು. ಆದರೆ, ಸರಕು ಸಾಗಣೆ, ವಾಹನ ದರ ಸೇರಿದಂತೆ ಕೆಲ ಖರ್ಚುವೆಚ್ಚ ಕಳೆದ ನಂತರ ಬಾಪು ಕಾವಡೆ ಅವರಿಗೆ ಕೇವಲ 13 ರೂಪಾಯಿ ಮಾತ್ರ ಉಳಿದಿದೆ.

ಅದರ ಮಾರಾಟದ ರಸೀದಿ ಇದೀಗ ವೈರಲ್ ಆಗಿದೆ. ಆ ನಂತರ ರೈತ ಮುಖಂಡ ರಾಜು ಶೆಟ್ಟಿ ತೀವ್ರ ಆಕ್ರೋಶಗೊಂಡು, ಈ ರೈತನ ಸಮಸ್ಯೆ ಬಗ್ಗೆ ಮಾತನಾಡಿ, ಸರ್ಕಾರಗಳ ವಿರುದ್ಧ ಕಿಡಿಕಾರಿದ್ದಾರೆ.

ಅನ್ನದಾತರ ಪರಿಸ್ಥಿತಿ ಕಂಡು ಸರ್ಕಾರದ ವಿರುದ್ಧ ರೈತ ಮುಖಂಡ ರಾಜು ಶೆಟ್ಟಿ ಕಿಡಿ

ಇದನ್ನೂ ಓದಿ: Omicron: ದೇಶದಲ್ಲಿ ಮೊತ್ತೊಂದು ಒಮಿಕ್ರಾನ್ ಕೇಸ್​​​ ದೃಢ

ಈರುಳ್ಳಿ ಮಾರಾಟ ಮಾಡಿದ ಬಳಿಕ ರೈತನಿಗೆ 13 ರೂ. ಲಾಭವಾಗಿ ಸಿಗುತ್ತದೆಯೆಂದರೆ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ನೀತಿಯೇ ಇದಕ್ಕೆ ಕಾರಣ. ಈರುಳ್ಳಿಗೆ ಉತ್ತಮ ಬೆಲೆ ಬಂದಾಗ ರಫ್ತು ನಿಷೇಧಿಸಲಾಯಿತು. ನಂತರ ಈರುಳ್ಳಿ ಬೆಲೆ ಇಳಿಕೆ ಮಾಡುವ ಮೂಲಕ ರೈತರನ್ನು ಸಂಕಷ್ಟಕ್ಕೆ ಸಿಲುಕಿಸಲಾಗಿದೆ. ಮುಂದೊಂದು ದಿನ ರೈತರು ಇಂತಹ ಸರ್ಕಾರಗಳನ್ನು ಕಿತ್ತೊಗೆಯುತ್ತಾರೆ ಎಂದು ಶೆಟ್ಟಿ ಎಚ್ಚರಿಕೆ ರವಾನಿಸಿದ್ದಾರೆ.