ಡೆಹ್ರಾಡೂನ್: ಮಾರ್ಚ್ 10 ರಂದು ಉತ್ತರಾಖಂಡ ಸೇರಿದಂತೆ ಐದು ರಾಜ್ಯಗಳ ವಿಧಾನಸಭಾ ಚುನಾವಣೆಯ ಫಲಿತಾಂಶ ಬರಲಿದೆ. ಈ ದಿನದ ಮತ ಎಣಿಕೆಯೊಂದಿಗೆ ಯಾವ ರಾಜ್ಯದಲ್ಲಿ ಯಾವ ಪಕ್ಷ ಸರ್ಕಾರ ರಚನೆ ಮಾಡಲಿದೆ ಎಂಬುದು ನಿರ್ಧಾರವಾಗಲಿದೆ. ಮತ ಎಣಿಕೆಯ ಸಂಪೂರ್ಣ ಪ್ರಕ್ರಿಯೆಯನ್ನು ಹೇಗೆ ಮಾಡಲಾಗುತ್ತದೆ ಎಂದು ನೀವು ಎಂದಾದರೂ ಯೋಚಿಸಿದ್ದೀರಾ? ಮತ ಎಣಿಕೆಗೆ ಸಂಬಂಧಿಸಿದ ಸಂಪೂರ್ಣ ಪ್ರಕ್ರಿಯೆಯ ಬಗ್ಗೆ ಮಾಹಿತಿ ಇಲ್ಲಿದೆ ನೋಡಿ.
- ಬೆಳಗ್ಗೆ 5 ಗಂಟೆಗೆ ಎಣಿಕೆ ಸಿಬ್ಬಂದಿ ನಿಯೋಜನೆ: ಮತ ಎಣಿಕೆಯಲ್ಲಿ ನಿಯೋಜನೆಗೊಂಡಿರುವ ನೌಕರರಿಗೆ ಮತ ಎಣಿಕೆಗೆ ಸಂಬಂಧಿಸಿದ ತರಬೇತಿ ಮುಂಚಿತವಾಗಿ ನೀಡಲಾಗುತ್ತದೆ. ಯಾವ ವಿಧಾನಸಭಾ ಸ್ಥಾನ ಹಾಗೂ ಯಾವ ಟೇಬಲ್ ಮೇಲೆ ಈ ನೌಕರರನ್ನು ಕೂರಿಸಬೇಕು ಎಂಬುದು ಮತ ಎಣಿಕೆ ದಿನವೇ ಗೊತ್ತಾಗುತ್ತದೆ.
ಮತ ಎಣಿಕೆ ದಿನದಂದು ಬೆಳಗ್ಗೆ 5 ಗಂಟೆಗೆ ಎಣಿಕೆ ಸಿಬ್ಬಂದಿ ನಿಯೋಜನೆಗೆ ಜಿಲ್ಲಾ ಚುನಾವಣಾಧಿಕಾರಿ ಕಂಪ್ಯೂಟರ್ ಮೂಲಕ ರ‍್ಯಾಂಡಮೈಸೇಶನ್ ಮಾಡುತ್ತಾರೆ. ನಂತರ ಎಣಿಕೆ ಸಿಬ್ಬಂದಿ ಬೆಳಗ್ಗೆ ಆರು ಗಂಟೆಗೆ ಎಣಿಕೆ ಸ್ಥಳಕ್ಕೆ ತಲುಪುತ್ತಾರೆ. ಅದರ ನಂತರ ಅವರು ತಮ್ಮ ಕೋಷ್ಟಕಗಳ ಬಗ್ಗೆ ಮಾಹಿತಿ ಪಡೆಯುತ್ತಾರೆ.
- ಎಣಿಕೆ ಪ್ರಕ್ರಿಯೆ ಆರಂಭ: ಮತ ಎಣಿಕೆ ದಿನ ಬೆಳಗ್ಗೆ ಆರು ಗಂಟೆವರೆಗೆ ಮತ ಎಣಿಕೆ ಸಿಬ್ಬಂದಿ, ವಿವಿಧ ಪಕ್ಷಗಳ ಏಜೆಂಟರಿಗೆ ಮತ ಎಣಿಕೆ ಕೇಂದ್ರದ ಒಳಗೆ ಪ್ರವೇಶ ನೀಡಲಾಗುತ್ತದೆ. ಏಜೆಂಟರು ಮತ ಎಣಿಕೆ ಸ್ಥಳವನ್ನು ತಲುಪಲು ಜಿಲ್ಲಾ ಚುನಾವಣಾಧಿಕಾರಿಯಿಂದ ಪ್ರವೇಶ ಪತ್ರ ಹಾಜರುಪಡಿಸಬೇಕು. ಮತ ಎಣಿಕೆ ಮೇಜಿನ ಬಳಿ ಏಜೆಂಟರಿಗೆ ಆಸನದ ವ್ಯವಸ್ಥೆ ಮಾಡಲಾಗಿರುತ್ತದೆ.
- ಬಿಗಿ ಭದ್ರತೆಯ ನಡುವೆ ಇವಿಎಂ ತಂದು ಎಣಿಕೆ ಕಾರ್ಯ: ಈ ಪ್ರದೇಶದಲ್ಲಿ, ಎಣಿಕೆ ಅಧಿಕಾರಿಗಳು, ಉದ್ಯೋಗಿಗಳು ಮತ್ತು ಏಜೆಂಟ್‌ಗಳು ಫೋನ್‌ಗಳು, ಕ್ಯಾಮೆರಾಗಳು ಮತ್ತು ಇತರ ನಿರ್ಬಂಧಿತ ವಸ್ತುಗಳನ್ನು ಬಳಸುವುದನ್ನು ನಿಷೇಧಿಸಲಾಗಿದೆ. ಮತ ಎಣಿಕೆಗೂ ಮುನ್ನ ಮತ ಎಣಿಕೆ ಕೇಂದ್ರದ ಸ್ಟ್ರಾಂಗ್ ರೂಂನಿಂದ ಬಿಗಿ ಭದ್ರತೆಯಲ್ಲಿ ಇವಿಎಂಗಳನ್ನು ತರಲಾಗುತ್ತದೆ. ಮತದಾನದ ನಂತರ ಇವಿಎಂಗಳನ್ನು ಇಡುವ ಸ್ಥಳವೇ ಸ್ಟ್ರಾಂಗ್ ರೂಮ್.
- ಪ್ರತಿ ಸುತ್ತಿನಲ್ಲಿ 14 ಇವಿಎಂಗಳು: ಇದರ ನಂತರ ಸಂಪೂರ್ಣ ಎಣಿಕೆಯನ್ನು ಸುತ್ತುಗಳಲ್ಲಿ ಮಾಡಲಾಗುತ್ತದೆ. ಪ್ರತಿ ಸುತ್ತಿನಲ್ಲಿ 14 ಇವಿಎಂಗಳನ್ನು ತೆರೆಯಲಾಗುತ್ತದೆ. ಸಾಮಾನ್ಯವಾಗಿ, ಒಂದು ಬೂತ್‌ನಲ್ಲಿ ಒಂದು ಇವಿಎಂ ಇರುತ್ತದೆ.
ಪ್ರತಿ ಬೂತ್‌ನಲ್ಲಿ ಸುಮಾರು 1200 ಮತದಾರು ಮತದಾನ ಮಾಡಬಹುದು. ಶೇ.60ರಿಂದ ಶೇ.70ರಷ್ಟು ಮತದಾನವಾಗಲಿದ್ದು, ಪ್ರತಿ ಬೂತ್‌ನಲ್ಲಿ 750ರಿಂದ 850ರಷ್ಟು ಮತದಾನವಾಗುತ್ತದೆ. ಇದರ ಪ್ರಕಾರ ಪ್ರತಿ ಸುತ್ತಿನಲ್ಲಿ ಸುಮಾರು 10 ಸಾವಿರದಿಂದ 12 ಸಾವಿರ ಮತಗಳ ಎಣಿಕೆ ನಡೆಯುತ್ತದೆ. ಈ ಸಂಖ್ಯೆಯ ಮತಗಳನ್ನು ಅನುಕೂಲಕರವೆಂದು ಪರಿಗಣಿಸಿ, ಚುನಾವಣಾ ಆಯೋಗವು ಪ್ರತಿ ಸುತ್ತಿನಲ್ಲಿ 14 ಇವಿಎಂಗಳ ಮತಗಳನ್ನು ಎಣಿಕೆ ಮಾಡುವ ನೀತಿ ಮಾಡಿದೆ.
- ಮೊದಲು ಅಂಚೆ ಮತಗಳ ಎಣಿಕೆ: ಅಂಚೆ ಮತಗಳನ್ನು ಮೊದಲು ಎಣಿಸಲಾಗುತ್ತದೆ. ಸಂಬಂಧಪಟ್ಟ ವಿಧಾನಸಭೆಯ ಚುನಾವಣಾಧಿಕಾರಿ ಅಂಚೆ ಮತಗಳನ್ನು ಸಂಬಂಧಪಟ್ಟ ವಿಧಾನಸಭೆಯ ಮತ ಎಣಿಕೆ ಟೇಬಲ್‌ಗೆ ಕಳುಹಿಸುತ್ತಾರೆ. ಅದಕ್ಕಾಗಿಯೇ ಅಂಚೆ ಮತಗಳ ಫಲಿತಾಂಶವನ್ನು ಮೊದಲು ಬಿಡುಗಡೆ ಮಾಡಲಾಗುತ್ತದೆ. ಅಭ್ಯರ್ಥಿಯ ಸೋಲು-ಗೆಲುವಿನಲ್ಲಿ ಅಂಚೆ ಮತಗಳು ಪ್ರಮುಖವಾಗುತ್ತಿರುವ ಸಂದರ್ಭದಲ್ಲಿ ಮತ್ತೆ ಅಂಚೆ ಮತಗಳ ಎಣಿಕೆ ಕಾರ್ಯ ನಡೆಯುತ್ತದೆ.
- ಇವಿಎಂ ಫಲಿತಾಂಶ: ಇವಿಎಂ ಯಂತ್ರದಲ್ಲಿರುವ ಫಲಿತಾಂಶವನ್ನು ಒತ್ತಿದ ನಂತರ ಯಾವ ಅಭ್ಯರ್ಥಿಗೆ ಎಷ್ಟು ಮತ ಬಿದ್ದಿದೆ ಎಂಬುದು ಗೊತ್ತಾಗುತ್ತದೆ. ಇದಕ್ಕಾಗಿ 2-3 ನಿಮಿಷಗಳನ್ನು ತೆಗೆದುಕೊಳ್ಳುತ್ತದೆ. ಇದು ಡಿಸ್ಪ್ಲೇ ಬೋರ್ಡ್‌ನಲ್ಲಿ ಕಾಣಿಸುತ್ತದೆ.
- ಫಾರ್ಮ್ 17C ನಲ್ಲಿ ಏಜೆಂಟ್‌ ಸಹಿ: ಎಲ್ಲ 14 ಟೇಬಲ್‌ಗಳಲ್ಲಿ ಇರುವ ಎಣಿಕೆ ಸಿಬ್ಬಂದಿ ಪ್ರತಿ ಸುತ್ತಿನಲ್ಲಿ ಫಾರ್ಮ್ 17-C ಅನ್ನು ಭರ್ತಿ ಮಾಡುತ್ತಾರೆ ಮತ್ತು ಏಜೆಂಟ್‌ನಿಂದ ಸಹಿ ಮಾಡಿದ ನಂತರ ಅದನ್ನು ROಗೆ ನೀಡುತ್ತಾರೆ. ROಗಳು ಪ್ರತಿ ಸುತ್ತಿನ ಮತಗಳ ಎಣಿಕೆಯನ್ನು ದಾಖಲಿಸುತ್ತಾರೆ.
ಈ ಫಲಿತಾಂಶವನ್ನು ಪ್ರತಿ ಸುತ್ತಿನ ನಂತರ ಕಪ್ಪು ಹಲಗೆಯಲ್ಲಿ ಬರೆಯಲಾಗುತ್ತದೆ ಮತ್ತು ಧ್ವನಿವರ್ಧಕಗಳ ಮೂಲಕ ಘೋಷಿಸಲಾಗುತ್ತದೆ. ಇದರಿಂದ ಸಂಪೂರ್ಣ ಪಾರದರ್ಶಕತೆ ಕಾಯ್ದುಕೊಳ್ಳಲಾಗುತ್ತದೆ.
ಮೊದಲ ಹಂತದ ಮತ ಎಣಿಕೆ ಮುಗಿದ ನಂತರ ಚುನಾವಣಾಧಿಕಾರಿ 2 ನಿಮಿಷ ಕಾಯುವ ಮೂಲಕ ಯಾವುದೇ ಅಭ್ಯರ್ಥಿಗೆ ಆಕ್ಷೇಪಣೆ ಇದ್ದಲ್ಲಿ ದಾಖಲಿಸಿಕೊಳ್ಳಬಹುದು. ಪ್ರತಿ ಸುತ್ತಿನ ನಂತರ, ಚುನಾವಣಾಧಿಕಾರಿಯು ಫಲಿತಾಂಶದ ಬಗ್ಗೆ ರಾಜ್ಯದ ಮುಖ್ಯ ಚುನಾವಣಾ ಅಧಿಕಾರಿಗೆ ತಿಳಿಸುತ್ತಾರೆ. ಮತ ಎಣಿಕೆ ಮುಗಿದ ನಂತರ ಚುನಾವಣಾಧಿಕಾರಿ ವಿಜೇತ ಅಭ್ಯರ್ಥಿಗೆ ಗೆಲುವಿನ ಪ್ರಮಾಣ ಪತ್ರ ನೀಡುತ್ತಾರೆ.
- ಇವಿಎಂಗಳ ಭದ್ರತೆ ಹೇಗೆ: ಮತದಾನದ ನಂತರ, ಕೇಂದ್ರ ಪಡೆಗಳ ಮೇಲ್ವಿಚಾರಣೆಯಲ್ಲಿ ಇವಿಎಂಗಳನ್ನು ಸುರಕ್ಷಿತ ಕೊಠಡಿಗಳಲ್ಲಿ ಇರಿಸಲಾಗುತ್ತದೆ. ನಂತರ ಅವುಗಳನ್ನು ಸ್ಟ್ರಾಂಗ್ ರೂಮ್‌ಗಳಿಂದ ಬ್ಯಾರಿಕೇಡ್ ಪ್ರದೇಶದ ಮೂಲಕ ತರಲಾಗುತ್ತದೆ.
ಇದನ್ನೂ ಓದಿ: ಚುನಾವಣೆಗೆ ಸ್ಪರ್ಧಿಸುವ ಇಂಗಿತ ವ್ಯಕ್ತಪಡಿಸಿದ ಪ್ರಿಯಾಂಕಾ ಪತಿ: ರಾಬರ್ಟ್ ವಾದ್ರಾ ಸ್ಪರ್ಧಿಸುವ ಕ್ಷೇತ್ರ ಯಾವುದು?
