ದೆಹಲಿ ಅಬಕಾರಿ ನೀತಿ ಹಗರಣ: ಇಂದು ಇಡಿಯಿಂದ ಬಿಆರ್​ಎಸ್​ ನಾಯಕಿ ಕವಿತಾ ವಿಚಾರಣೆ

ಹೈದರಾಬಾದ್​ ಉದ್ಯಮಿ ಅರುಣ್​ ಪಿಳ್ಳೈ ಬಂಧನ - ಎಂಎಲ್​ಸಿ ಕವಿತಾ ರೆಡ್ಡಿಗೂ ಇಡಿ ಸಮನ್ಸ್ -​ ಇಂದು ಸಿಎಂ ಕೆಸಿಆರ್​ ಪುತ್ರಿ ವಿಚಾರಣೆ

ನವದೆಹಲಿ: ಸಂಸತ್ತಿನಲ್ಲಿ ಮಹಿಳಾ ಮೀಸಲಾತಿ ಮಸೂದೆಯನ್ನು ಆದಷ್ಟು ಬೇಗ ಅಂಗೀಕರಿಸುವಂತೆ ಕೋರಿ ಬಿಆರ್​ಎಸ್​ ನಾಯಕಿ ಕೆ ಕವಿತಾ ಇಲ್ಲಿಯ ಜಂತರ್​ ಮಂತರ್​ನಲ್ಲಿ ಉಪವಾಸ ನಡೆಸಿದ ಮರುದಿನವೇ ಅಂದರೆ ಇಂದು ಅವರು ದೆಹಲಿ ಅಬಕಾರಿ ನೀತಿ ಪ್ರಕರಣ ಸಂಬಂಧ ಇಡಿ ವಿಚಾರಣೆಗೆ ಹಾಜರಾಗಲಿದ್ದಾರೆ. ದೆಹಲಿ ಮಾಜಿ ಡಿಸಿಎಂ ಮನಿಶ್​​ ಸಿಸೋಡಿಯಾ ಬಂಧನದ ಬಳಿಕ ದೆಹಲಿ ಅಬಕಾರಿ ನೀತಿಯ ಅಕ್ರಮ ಪ್ರಕರಣದ ಸಂಬಂಧ ವಿಚಾರಣೆಗೆ ಹಾಜರಾಗುವಂತೆ ಕವಿತಾ ಅವರಿಗೆ ಬುಧವಾರವೇ ಜಾರಿ ನಿರ್ದೇಶನಾಲಯ (ಇಡಿ) ಸಮನ್ಸ್​ ಜಾರಿ ಮಾಡಿತ್ತು.

ಕಿಕ್​ ಬ್ಯಾಕ್​ ಪಡೆದ ಆರೋಪ: ಸಮನ್ಸ್​​ ಜಾರಿಯಾಗಿರುವ ಹಿನ್ನೆಲೆ ಇಂದು ಅವರು ಇಡಿ ಮುಂದೆ ಹಾಜರಾಗಲಿದ್ದು, ವಿಚಾರಣೆಗೆ ಒಳಪಡಲಿದ್ದಾರೆ. ಈ ವೇಳೆ ಇಡಿ ಅಧಿಖಾರಿಗಳು ಬಿಆರ್​ಎಸ್​ ನಾಯಕಿ ವಿರುದ್ಧ ಮುಂದಿನ ಕ್ರಮ ಕೈಗೊಳ್ಳುವ ಸಾಧ್ಯತೆ ಇದೆ. ಈಗಾಗಲೇ ಈ ಪ್ರಕರಣ ಸಂಬಂಧ ಹೈದರಾಬಾದ್ ಮೂಲದ ಉದ್ಯಮಿ ಅರುಣ್ ರಾಮಚಂದ್ರನ್ ಪಿಳ್ಳೈ ಅವರನ್ನು ಇಡಿ ಬಂಧಿಸಿದೆ. ದೆಹಲಿ ಮದ್ಯ ಹಗರಣದಲ್ಲಿ ಕವಿತಾ ಕಿಕ್‌ಬ್ಯಾಕ್‌ ಪಡೆದಿದ್ದಾರೆ ಎಂದು ಇಡಿ ಗಂಭೀರ ಆರೋಪ ಮಾಡಿದೆ.

ಇಂದು ವಿಚಾರಣೆ ವೇಳೆ ಇಡಿ ಕವಿತಾ, ಅರುಣ್​ ಪಿಳ್ಳೈ ಜೊತೆಗೆ ಪ್ರಶ್ನೆಗಳನ್ನು ಎದುರಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.​ ಸೌತ್​​ ಗ್ರೂಪ್​ ನೊಂದಿಗೆ ಉದ್ಯಮಿ ಅರುಣ್​ ಪಿಳ್ಳೈ ಸಂಬಂಧ ಹೊಂದಿದ್ದು, ಇದರ ಮೂಲಕ ದೆಹಲಿಯಲ್ಲಿ ಆಮ್​ ಆದ್ಮಿ ಪಕ್ಷದ ನಾಯಕರಿಗೆ ನೂರಾರು ಕೋಟಿಯನ್ನು ನೀಡಿರುವ ಆರೋಪ ಕೇಳಿ ಬಂದಿದೆ. ಅರುಣ್​ ಪಿಳ್ಳೈ ಬಂಧನದ ಬೆನ್ನಲ್ಲೇ ಕವಿತಾ ಅವರಿಗೂ ಕೂಡ ಇಡಿ ಸಮನ್ಸ್​ ಜಾರಿ ಮಾಡಿದೆ.

ಅಬಕಾರಿ ಅಕ್ರಮ ಪ್ರಕರಣದಲ್ಲಿ ಕವಿತಾ ಪ್ರಮುಖ ಪಾತ್ರವನ್ನು ಹೊಂದಿರುವುದು ಕಂಡು ಬಂದಿದ್ದು, ಅವರನ್ನು ಬಂಧಿಸುವ ಸಾಧ್ಯತೆ ಇದೆ ಎಂದು ಬಿಜೆಪಿ ನಾಯಕರು ಹೇಳಿದ್ದಾರೆ. ಕೆಲವು ದಿನಗಳ ಹಿಂದೆ ಈ ಸಂಬಂಧ ಮಾತನಾಡಿದ್ದ ತೆಲಂಗಾಣ ಬಿಜೆಪಿ ಅಧ್ಯಕ್ಷ ಬಂಡಿ ಸಂಜಯ್​, ಎಎಪಿ ಮನೀಶ್​​ ಸಿಸೋಡಿಯಾ ಬಂಧನಕ್ಕೆ ಬಿಆರ್​ಎಸ್​ ನಾಯಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಶೀಘ್ರದಲ್ಲೇ ಅವರನ್ನು ಚೆನ್ನಾಗಿ ಬಲ್ಲ ಕವಿತಾ ಕೂಡ ಬಂಧನಕ್ಕೆ ಒಳಗಾಗುತ್ತಾರೆ ಎಂದಿದ್ದರು.

ಮೋದಿ ಸಮನ್ಸ್​ ಎಂದ ಎಂಎಲ್​ಸಿ: ಇಡಿ ಸಮನ್ಸ್​ ಕುರಿತು ಆಕ್ರೋಶ ವ್ಯಕ್ತಪಡಿಸಿದ ಕವಿತಾ ಮತ್ತು ಬಿಆರ್​ಎಸ್​ ಪಕ್ಷದ ನಾಯಕರು, ಇದು ಇಡಿ ಸಮನ್ಸ್​ ಅಲ್ಲ, ಮೋದಿ ಸಮನ್ಸ್​. ಇದು ನಮ್ಮನ್ನು ಬೆದರಿಸುವ ತಂತ್ರ. ಕೇಂದ್ರದ ವೈಫಲ್ಯಗಳನ್ನು ಬಹಿರಂಗಪಡಿಸಲು ನಮ್ಮ ಪಕ್ಷ ಹೋರಾಟ ಮುಂದಿವರೆಸುತ್ತೇನೆ ಎಂದಿದ್ದರು. ಮಾರ್ಚ್​ 9ರಂದು ವಿಚಾರಣೆಗೆ ಹಾಜರಾಗುವಂತೆ ಅವರಿಗೆ ಸಮನ್ಸ್​ ಜಾರಿಯಾಗಿತ್ತು.

ಈ ಮಧ್ಯೆ ಸಮನ್ಸ್​ ತನಿಖೆಗೆ ಸಹಕರಿಸುವುದಾಗಿ ಹೇಳಿದ್ದ ಅವರು, ವಿಚಾರಣೆಗೆ ಹಾಜರಾಗುವ ಕುರಿತು ಕಾನೂನು ಸಲಹೆಯನ್ನು ಕೂಡ ಪಡೆದಿದ್ದರು. ಈ ವೇಳೆ ಮಾರ್ಚ್​ 20ರಂದು ಜಂತರ್​ ಮಂತರ್​ನಲ್ಲಿ ಈಗಾಗಲೇ ಪ್ರತಿಭಟನೆ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದು, ವಿಚಾರಣೆಗೆ ಹಾಜರಾಗುವುದು ಕಷ್ಟವಾಗಲಿದೆ. ಈ ಹಿನ್ನೆಲೆ ಸಮನ್ಸ್​ ಮುಂದೂಡುವಂತೆ ಮನವಿಯನ್ನು ಕೂಡ ಮಾಡಿದ್ದರು.

ಇದನ್ನೂ ಓದಿ: ಕವಿತಾಗೆ ಕಳುಹಿಸಿದ್ದು ಇಡಿ ಸಮನ್ಸ್ ಅಲ್ಲ.. ಮೋದಿ ಸಮನ್ಸ್ : ಕೆಟಿಆರ್