ನವದೆಹಲಿ: ಅಕ್ಟೋಬರ್‌ನಲ್ಲಿ ಕೋವಿಡ್ 3ನೇ ಅಲೆ ಹೆಚ್ಚು ಬಾಧಿಸಲಿದೆ ಎಂದು ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಸಂಸ್ಥೆ (NIDM) ಎಚ್ಚರಿಕೆ ನೀಡಿದೆ. ಗೃಹ ವ್ಯವಹಾರಗಳ ಸಚಿವಾಲಯದ ಅಧೀನದಲ್ಲಿ ಬರುವ ಎನ್ಐಡಿಎಂ, 40 ತಜ್ಞರ ಅಭಿಪ್ರಾಯ ಸಂಗ್ರಹದ ಸಮೀಕ್ಷೆ ಆಧಾರದಲ್ಲಿ ಈ ಮುನ್ಸೂಚನೆ ಕೊಟ್ಟಿದೆ. ಮೂರನೇ ಅಲೆ 2021ರ ಜುಲೈ 15 ಹಾಗೂ ಅಕ್ಟೋಬರ್ 13ರ ನಡುವೆ ದೇಶವನ್ನು ಹೆಚ್ಚಾಗಿ ಕಾಡಲಿದೆ ಎಂದು ಭವಿಷ್ಯ ನುಡಿದಿದೆ.
ಡೆಲ್ಟಾ-ಪ್ಲಸ್ ವೇರಿಯೆಂಟ್ ಮೂರನೇ ಅಲೆಯ ಪ್ರಮುಖ ಕೇಂದ್ರ ಬಿಂದುವಾಗಿದ್ದು, ಡೆಲ್ಟಾ-ಪ್ಲಸ್ ರೂಪಾಂತರಿ B.1.617.2 (ಡೆಲ್ಟಾ ರೂಪಾಂತರ) ಎರಡನೇ ಅಲೆಯ ಉಲ್ಬಣಕ್ಕೂ ಕಾರಣವಾಗಿತ್ತು. ಈ ಹೊಸ ರೂಪಾಂತರಿ ಉಪ-ವಂಶಾವಳಿಯಾಗಿದ್ದು ಅದು ಸ್ಪೈಕ್ ಪ್ರೊಟೀನ್ ರೂಪಾಂತರ 'K417N' ಅನ್ನು ಪಡೆದುಕೊಂಡಿದೆ ಎಂದು ಹೇಳಿದೆ.
